Flash News

വൈറ്റ് ഹൗസിലെ ഭ്രാന്തന്‍ വെള്ളിയാഴ്ച്ചകള്‍ (വാല്‍ക്കണ്ണാടി)

February 7, 2017

white houe sizeസൂര്യന്‍ അസ്തമിക്കാനുള്ള സമയം അടുത്തുവരുന്നു . ആകെ പരിഭ്രാന്തരായ വൈറ്റ്ഹൗസ് ഏതോ നിഗൂഢമായ സംഭവങ്ങളെ വരവേല്‍ക്കാന്‍ തുടങ്ങുക ആയിരുന്നു. പുറത്തെ ശീതകാറ്റില്‍ വിറങ്ങലിച്ചു നില്‍ക്കുന്ന പൈന്‍ മരങ്ങളും ഒന്ന് നിച്ഛലമായതുപോലെ. ഡാഡി ട്രംപ് എക്‌സിക്യൂട്ടീവ് ഓര്‍ഡറുകള്‍ ഒപ്പിട്ടു കൈ കുഴഞ്ഞു തിരികെ ഓവല്‍ ഓഫീസിന്റെ ലൈബ്രറിയില്‍ അസ്വസ്ഥനായി ഇരിക്കുന്നു. വൈസ് പ്രസിഡന്റ് മൈക്ക് പെന്‍സ് അപ്പോഴും ഡാഡി ട്രംപിനു പിറകില്‍ നില്‍ക്കെയാണ്.

“ഇരിക്ക് മൈക്ക്, എന്റെ പുറകെ ഒത്തിരി നേരമായല്ലോ ഈ നടപ്പും നില്‍പ്പും തുടങ്ങിയിട്ട്, രാത്രിയായി, ഇനി നമുക്ക് ഒന്ന് അടിച്ചു പൊളിക്കേണ്ടെ?” ”

എസ് ബോസ്, ആകാമല്ലോ” എന്ന് മൈക്ക് .

Trump & Penseപെട്ടന്ന് ഡാഡി ട്രംപിനു ബൈ പറഞ്ഞു മരുമകന്‍ ജറേഡ് കുഷ്‌നെര്‍ തന്റെ മുറിയിലേക്ക് പോകുന്നു, ഇവങ്ക മോളും പിന്നാലെ അനുഗമിക്കുന്നു. സാന്ദ്രമായി അലയടിച്ചുകൊണ്ടിരുന്ന മൊസാര്‍ട് സംഗീതത്തില്‍ അവര്‍ കടന്നു പോകുമ്പോള്‍ പിന്നാലെ വാതില്‍ അടയുന്നു, അവരുടെ മുറിയിലെ ഇലക്ട്രിക്ക് വിളക്ക് അണയുന്നു. ചെറിയ ഒരു മെഴുകുവിളക്ക് അവിടെ തെളിഞ്ഞതായി കാണാനായി , പതുക്കെ മുറിയില്‍ നിന്നും “ലെച്ച ടോയ്ഡി, വരുക സുഹൃത്തേ, പരിശുദ്ധ ശബ്ബത്ത്, നിങ്ങളെ സ്വാഗതം ചെയ്യുന്നു ” എന്ന് തുടങ്ങുന്ന യഹൂദ ശബ്ബത്ത് ഗാനം കേള്‍ക്കാനായി.

“മൈക്ക്, നിങ്ങള്‍ക്ക് എന്ത് തോന്നുന്നു, നമ്മള്‍ കൊടുത്ത വാഗ്ദാനങ്ങള്‍ സമയബന്ധിതമായി നടപ്പാക്കും എന്ന് ആളുകള്‍ക്ക് ബോധ്യമായി വരുന്നല്ലോ, ഏതായാലും നമ്മുടെ ചെക്കന്‍ കുഷ്ണര്‍ മിടുമിടുക്കനല്ലേ, ഇനി അവന്‍ ഒന്ന് റസ്റ്റ് എടുക്കട്ടെ, നാളെ വീണ്ടും തുടങ്ങേണ്ടേ പണികള്‍. ഒബാമ കാട്ടിക്കൂട്ടിയ ഓരോന്നും ശരിയാക്കണമെങ്കില്‍ ഒരു മൂന്നു തവണ പ്രസിഡന്റ് ആയാലും പറ്റില്ല, അത്രയ്ക്ക് കൊളമാക്കിയിട്ടാണ് അയാള്‍ സ്ഥലം വിട്ടത്, നാടിനോട് കൂറില്ലാത്തവന്‍!”

വീണ്ടും പതുക്കെ കസേരയില്‍ നിന്നും എഴുന്നേറ്റുകൊണ്ട് മൈക്ക്‌ പെന്‍സു പറഞ്ഞു തുടങ്ങി..

“ബോസ്, താങ്കള്‍ അതിസമര്‍ത്ഥന്‍ തന്നെ എന്ന് വീണ്ടും വീണ്ടും തെളിയിച്ചുകൊണ്ടിരിക്കയല്ലേ, ഒരാഴ്ചകൊണ്ട് നമ്മള്‍ എന്തൊക്കെയാണ് പ്രവര്‍ത്തിച്ചത്. ലോകം മുഴുവന്‍ നമ്മുടെ അടുത്ത വാക്കുകള്‍ക്കായി കാതോര്‍ത്ത്ഇ രിക്കയല്ലേ, ഇപ്പോള്‍ അമേരിക്കയെ എല്ലവര്‍ക്കും ഭയമായി തുടങ്ങി. ഇന്നലെ ആസ്‌ട്രേലിയക്കാരന് കൊടുത്ത പണിയാണ് എനിക്ക് ശരിക്കും ബോധിച്ചത് . ഇനി അടുത്ത കാലത്തൊന്നും ആസ്‌ത്രേലിയന്‍ പ്രധാന മന്ത്രി മാല്‍കം ശരിക്കു കിടന്നു ഉറങ്ങില്ല, അത്രക്കിട്ടു ഒരു കീറാണ് ബോസ് നിങ്ങള്‍ അയാള്‍ക്ക് കൊടുത്തത്. അവന്റെ റെഫ്യൂജീസിനെ അവരുടെ തൊഴുത്തില്‍ കൊണ്ടു കെട്ടാന്‍ പറ, അല്ലെങ്കില്‍ ഒബാമയുടെ കെനിയയിലെ അങ്കിളിന്റെ വീട്ടില്‍ കൊണ്ട് താമസിപ്പിക്കാന്‍ പറ, ഹല്ല , പിന്നെ, ട്രമ്പിനോടാ കളി !!! ഈയുള്ള മേത്തനെയെല്ലാം ഇവിടെ കൊണ്ടുവന്നു നമ്മുടെ ആളുകളുടെ ടാക്‌സ് മണി കൊടുത്തു ജീവിപ്പിക്കാനോ ? എന്നിട്ടു ഇവനൊക്കെ നമ്മുടെ കാലിന്റെ അടിയില്‍ ബോംബ് വച്ച് കളിക്കണോ? ഒരു ഒറ്റ ക്രിസ്ത്യാനി ആ കൂട്ടത്തില്‍ ഉണ്ടാവില്ല, ഒബാമ എത്ര ക്രിസ്ത്യാനികളെ രക്ഷിച്ചു? ശത്രു മുസ്ലിം തീവ്രവാദം ആണെന്ന് അയാളെക്കൊണ്ട് ഒന്ന് പറയിപ്പിക്കാന്‍ സാധിച്ചോ? ശത്രുവിനെ പേരെടുത്തു പറയാതെ എങ്ങനെ ഇതിനെ ഒതുക്കാന്‍ ഒക്കും? ഇനി അത് നടപ്പില്ല. എന്തൊരു അഹങ്കാരമാണ് ഇവറ്റകള്‍ക്ക്? ന്യൂയോര്‍ക്ക് എയര്‍പോര്‍ട്ടില്‍ അവന്മാര്‍ കൂട്ടപ്രാര്‍ഥന നടത്തി പ്രതിഷേധിക്കുന്നു, അവന്റെ ഒക്കെ മുസ്ലിം രാജ്യത്തു ഒരു ക്രിസ്ത്യാനി പ്രാര്‍ത്ഥിച്ചാലോ ബൈബിള്‍ പിടിച്ചാലോ കൊന്നുകളയും അവന്മാര്‍. ഇത് കൊറേ കൂടിപ്പോയി.”

kushner & Trump“ബോസ്, ഫോണ്‍ അടിക്കുന്നല്ലോ, റഷ്യയില്‍നിന്നും പ്രസിഡന്റ് പൂട്ടിന്‍ ആണെന്ന് തോന്നുന്നു, കുഷ്ണര്‍മോനെ വിളിച്ചാലോ?”

പിന്നെ വിളിക്കാം, റഷ്യക്കാരന്‍ എപ്പഴാ പണി പണിയുന്നതിന് അറിയില്ല, റഷ്യന്‍ പെണ്ണുങ്ങളെ എനിക്ക് താല്പര്യമാണെന്നു പറഞ്ഞു അവനൊരു മാമന്റെ അധികാരത്തിലാണ് വിളി. വേണ്ട, വേണ്ട പെന്‍സ്, കുഷ്ണര്‍മോന്‍ ശബ്ബത് തുടങ്ങി ഇനി നാളെ മാത്രമേ പുറം ലോകവുമായി അവന്‍ ബന്ധപ്പെടുകയുള്ളു. ഇവങ്കമോളും യഹൂദ മതം സ്വീകരിച്ചമുതല്‍ അവര്‍ അങ്ങനെയാണ്. എല്ലാ വെള്ളിയാഴ്ച രാത്രിയിലും പ്രാര്‍ഥനയും പാട്ടുമായി അങ്ങനെ കൂട്ടില്‍ ഒളിക്കും. കാര്യം അവന്റെ അപ്പന്‍ ചാള്‍സ് തരികിട കളിച്ചു രണ്ടു വര്‍ഷം ജയിലില്‍ കിടന്നതാണ് എങ്കിലും മില്യന്‍ കണക്കിന് ഡൊണേഷന്‍ കൊടുത്തിട്ടാണ് മക്കളെ ഹാര്‍വാര്‍ഡിലും ന്യൂയോര്‍ക്ക് യൂണിവേഴ്‌സിറ്റിയിലും പഠിപ്പിച്ചത്. ടാക്‌സ് കൊടുക്കാതെ എങ്ങനെ റിയല്‍ എസ്‌റ്റേറ്റ് സാമ്രാജ്യം ഉണ്ടാക്കാമെന്ന് ആശയം തന്നത് ചാള്‍സ് അല്ലെ?. അപ്പന്റെ കാഞ്ഞ ബുദ്ധി അവനും കിട്ടിയിട്ടുണ്ട്. കോളേജില്‍ പഠിച്ചുകൊണ്ടിരുന്നപ്പോള്‍ അവിടടുത്തുള്ള കെട്ടിടങ്ങള്‍ മറിച്ചു വിറ്റ് അവന്‍ ഇരുപതു മില്യണ്‍ ഡോളര്‍ആണ് ഉണ്ടാക്കിയത്. കോളേജ് പോലും വിറ്റുകളയുമോ എന്നാണ് കൂട്ടുകാര്‍ ഭയന്നത് . പിന്നെ അടിവച്ചു അങ്ങോട്ട് കയറ്റമായിരുന്നല്ലോ. എന്നാലും കുഷ്ണര്‍മോന്‍ നടത്തികൊണ്ടിരുന്ന ഒബ്‌സര്‍വേര്‍ വാരിക അടിച്ചു കുളമായപ്പോള്‍ അതിന്റെ ചീഫ് എഡിറ്റര്‍ പീറ്റര്‍ കപ്ലാന്‍ പറഞ്ഞത് എന്റെ ചെവിയില്‍ അങ്ങനെ ഇടക്കിടെ മുഴങ്ങും , ‘അവന് ഒന്നും അറിയില്ല എന്ന കാര്യം പോലും അവനു അറിയില്ലെന്ന്’ ചിലപ്പോള്‍ എനിക്കും അത് തോന്നാറുണ്ട് . എന്നാലും നമ്മുടെ ഇവങ്കമോളെ ഓര്‍ത്തു, പോട്ടെ ….. എന്നാലും, പത്രക്കാര് നമ്മളെ അമ്മാനമാടിയപ്പോള്‍, പണവും ആളും സംവിധാനങ്ങളും ഒന്നും ഇല്ലാതെ ഇത്തരം ഒരു വന്‍ വിജയത്തിന് കാരണം നമ്മുടെ കുഷ്ണര്‍മോന്റെ മിടുക്കാണ് സംശയമില്ല !

Kushner and Ivankaഇസ്രായലിലെ ഏറ്റവും വലിയ ബാങ്കായ ഹാപോളീം അവനു കുറെ ലോണ്‍ കൊടുത്തിട്ടുണ്ട് , അതുകൊണ്ടു വെസ്റ്റ് ബാങ്കില്‍ അവര്‍ക്കു കുറെ സഹായമൊക്കെ നമുക്ക് ചെയ്‌തേ പറ്റുള്ളൂ , ഫലസ്തീനികള്‍ പോയി പണി നോക്കാന്‍ പറ, കൂടുതല്‍ ബഹളം വെച്ചാല്‍ അവന്മാര്‍ക്കിട്ടും നമുക്ക് നേരിട്ട് ചില പണികള്‍ ചെയ്യണം. ഇറാനികള്‍ ഉണ്ടാക്കുന്ന ഉടായി മിസൈലുകള്‍ ഒക്കെ പണിഞ്ഞു നോക്കുന്നത് ഈ ഫലസ്റ്റീനി ചവറുകളാണ്. ഇറാനി മുല്ലാക്കമാരുടെ കറുത്ത ളോഹയുടെ അടിയിലൊക്കെ എന്തോ ഒളിച്ചു കൊണ്ട് നടക്കയാണെന്നാണ് സംസാരം.

ചൈനക്കാരനെയും ഇന്ത്യാക്കാരനെയും ഒക്കെ നമുക്ക് നല്ല കത്തി മൂര്‍പ്പിച്ചു പിടിച്ചു നിര്‍ത്തണം എന്നാല്‍ മാത്രമേ ഇവനെയൊക്കെ വരച്ച വരയില്‍ നിര്‍ത്താനൊക്കുകയുള്ളൂ. ചൈനക്കാരന്‍ ബിസിനെസ്സില്‍ കുറെ സഹകരിക്കാമെന്നു പറഞ്ഞിരുന്നതാണ് , ഇന്ത്യക്കാരന്‍ മോഡി , അയാള്‍ വെറും “മോഡിയാണ് ” നമ്മള്‍ പറയുന്നിടത്ത് കിടക്കാന്‍ പറഞ്ഞാല്‍ അവിടെ കിടന്നോളും. വലിയ ബഹളം വച്ചാല്‍ പാക്കികളെ കൂട്ട് പിടിക്കുമെന്നു ഒരു കൊട്ട് കൊടുത്താല്‍ മതി. മെക്‌സിക്കോക്കാരന്‍ നമ്മള്‍ പറയുന്നതില്‍ മുകളില്‍ പോകില്ല , ഉറപ്പാണ്. എണ്‍പതു ശതമാനം ബിസിനസ് നമ്മളാണ് അവര്‍ക്കു കൊടുക്കുന്നത്, അത് നിര്‍ത്തിയാല്‍ അവന്മാര്‍ പട്ടണിയാകും. പിന്നെ മതില്‍ പണി , അവര്‍ തന്നെ കെട്ടാന്‍ എല്ലാ പണിയും ഞാന്‍ ഒപ്പിച്ചിട്ടുണ്ട്. അവരുടെ കുറെ സ്ഥലങ്ങള്‍ നമ്മുടേതാണെന്നു പറഞ്ഞു അങ്ങ് കയറുക .. കുറെ കയറുമ്പോള്‍ അവര്‍തന്നെ പറയും കെട്ടിക്കോ കെട്ടിക്കോ ഞങ്ങളും കൂടാമല്ലോ എന്ന്.

trump, kushner bannonആരാ ഇത് വരുന്നത്, നമ്മുടെ സ്റ്റീവ് ബാന്നോന്‍ അല്ലെ , സ്റ്റീവ് , ഇരിക്ക് , നിങ്ങള്‍ ഒരു സംഭവമല്ല , ഒരു മഹാ സംഭവം തന്നെയാണ്. നോക്ക് പെന്‍സ് , നമ്മുടെ സ്റ്റീവിന് ഈയിടെയായി എല്ലാ വെള്ളിയാഴ്ച വൈകുന്നേരങ്ങളിലും ഒരു പ്രത്യേക വെളിപാട് ഉണ്ടാകാറുണ്ട്. ഒരാഴ്ചകൊണ്ട് നിറച്ചെടുത്ത പടക്കമെല്ലാം പൊട്ടിക്കുന്നത് വെള്ളിയാഴ്ചകളിലാണ്. എന്റെ ട്വിറ്റെര്‍നു ഇനിയും വിശ്രമല്ല. ബോസ്,പത്രക്കാര്‍ക്ക് മുഖമടിച്ചു ഒരു കീച്ചു കൊടുത്തിട്ടു ഒരുത്തനും ഇതുവരെ പൊങ്ങിയിട്ടില്ല. ന്യൂ യോര്‍ക്ക് ടൈംസ് കാരന്‍ പത്രക്കട നിര്‍ത്തി ഇനി പാത്രക്കട തുടങ്ങാനുള്ള പുറപ്പാടിലാണ്. എന്താണ് സ്റ്റീവ് നിങ്ങളുടെ തൊലിനിറം കുറച്ചു ടാന്‍ ആയല്ലോ, ഇതിനിടെ എവിടെ ബീച്ചില്‍ പോയി ? അത് മെക്‌സിക്കോ ബോഡറില്‍ പോയി കുറച്ചു ടാന്‍ ആയതാ, മതില്‍ പണിക്കു ഉടനെ കാലു നാട്ടണമല്ലോ . അതിനു പറ്റിയ സമയം കുറിക്കാന്‍ പോയതായിരുന്നു. അവിടെല്ലാം തുരപ്പന്മാരുടെ ശല്യം ഉണ്ടെന്നാണ് ബോര്‍ഡര്‍ സെക്യൂരിറ്റി പറയുന്നത് , അതുകൊണ്ടു മതില് കെട്ടുകയാണെങ്കില്‍ ചൈന വന്‍ മതില്‍ പോലെ തന്നെയാകണം , അതിനു ട്രംപ് വന്‍ മതില്‍ എന്ന് പേര് കൊടുക്കണം , നമ്മുടെ ബോസ്സിന്റെ പേര് എല്ലാ കാലത്തും ഓര്‍ക്കപ്പെടണം.

Stephen-Bannon-Jared-Kushnerകൊള്ളാം സ്റ്റീവ് , എനിക്ക് ഇഷ്ട്ടപ്പെട്ടു , ഏതായാലും കുഷ്ണര്‍മോന്‍ സമാധിയിലായി, ഇനിം പറ ഞാന്‍ എന്താ ട്വിറ്റെര്‍ ചെയ്യേണ്ടത് ? നമ്മുടെ സെക്രട്ടറിമാരെ അപ്പോയ്ന്റ് ചെയ്യാന്‍ പറ്റുന്നില്ല, ഡെമോക്രറ്റുകള്‍ മീറ്റിങ്ങില്‍നിന്നു മുങ്ങുകയാണ് . റിപ്പബ്ലിക്കന്‍ പാര്‍ട്ടിക്കാര്‍ തന്നെ നമുക്ക് പ്രതിപക്ഷം ആണെന്ന് തോന്നിയപ്പോഴാണ് പത്രക്കാരാണ് നമ്മുടെ പ്രതിപക്ഷം എന്ന് ഞാന്‍ പറഞ്ഞത്. അതുകൊണ്ടു ആരാണ് പ്രതിപക്ഷം എന്ന് എല്ലാവര്ക്കും ഒരു സംശയം. ഏതായാലും ലോകയുദ്ധം തുടങ്ങി എന്ന് ഒരു തോന്നലാണ് എല്ലാവര്ക്കും, അമേരിക്ക ഗ്രേറ്റ് ആയങ്കിലേ ലോകത്തെ സേഫ് ആക്കാന്‍ പറ്റുള്ളൂ എന്ന ബോധപൂര്‍വമായ ശ്രമം നല്ലതുപോലെ ഏല്‍ക്കുന്നുട് ബോസ്. ഒന്ന് രണ്ടു ആശയം എനിക്ക് വരുന്നുണ്ട്, അത് ഇച്ചിരി തീവ്രമായ ആശയം ആയതിനാല്‍ ഒന്ന് മിനിക്കിയിട്ടു ഞാന്‍ ഉടനെ തിരിച്ചു വരാം .

ആ, സ്റ്റീവ് പോയല്ലോ , നോക്ക് മൈക്ക്, എനിക്ക് ഇവനെ പണ്ടേ അറിയാം, ഒരുമാതിരി സാധനമാണ് സൂക്ഷിച്ചു ഉപയോഗിച്ചില്ലെങ്കില്‍ നമ്മുടെ ഇടപാടുതന്നെ ഇവന്‍ തീര്‍ക്കും. വെറും ലൈന്‍മാന്റെ സന്തതിയാണ്, സൂക്ഷിക്കണം. ഞാന്‍ ഇലെക്ഷനില്‍ മുന്നോട്ടു വരാന്‍ താമസിച്ചപ്പോള്‍ അവന്‍ പറഞ്ഞുനടന്നതു , ട്രംപ് വെറും ഒഴിഞ്ഞ കുടമാണെന്ന്, അവനെന്തും നിറക്കാന്‍ പറ്റിയ ഓട്ടപാത്രമാണെന്ന് . കുറേനാള്‍ കഥയും സിനിമയുമായി നടപ്പായിരുന്നു. അതൊക്കെ അയാളുടെ പ്രത്യേകതരം വലതുപക്ഷ തീവ്രവാദം പ്രചരിപ്പിക്കാനാണ് അയാള്‍ ശ്രമിച്ചത്. വെള്ളക്കാരന്‍ ക്രിസ്ത്യാനികളുടെ മാത്രം രാജ്യമാണ് അമേരിക്ക എന്ന് തന്നെയാണ് അയാളുടെ ഉള്ളില്‍ ഇരിപ്പു, ഇപ്പോള്‍ അയാള്‍ ഇല്ലാതെ നമുക്ക് പിടിച്ചുനില്‍ക്കാനാവില്ലല്ലോ. എന്നെപ്പോലെതന്നെ മൂന്നു പ്രാവശ്യം കല്യാണം കഴിച്ചു കുളമാക്കിയ കുടുംബ പശ്ചാത്തലം, ഗാര്‍ഹിക പീഡനത്തിന് ജയില്‍ ശിക്ഷ അനുഭവിച്ച ചൂടനാണ് അയാള്‍. മുസ്ലിംകളെ മാത്രമല്ല യഹൂദനെയും അയാള്‍ക്ക് അത്ര പിടിയില്ല, അതല്ലേ നമ്മുടെ കുഷ്ണര്‍മോന്‍ ശബ്ബത്ത് കൂടിയപ്പോള്‍ ട്വിറ്റ് ചെയ്തു കൂട്ടുകയാണ്. ശരിക്കും ദേശീയതയും വര്‍ഗീയതയും വിഭാഗീകതയും ഇല്ലാതെ നമുക്ക് പിടിച്ചു നില്‍ക്കാനാവില്ല, അതിനു ഗംഭീര പാര്‍ട്ടിയാണ് സ്റ്റീവ്. സാത്താനും അന്ധകാരവുമാണ് നല്ലതെന്നു അയാള്‍ ഈയ്യിടെ പറയുന്ന കേട്ടു, എന്താണ് ആ പറഞ്ഞതെന്ന് എനിക്കത്ര പിടിയില്ല, പക്ഷെ, അയാള്‍ പുതിയ അമിട്ടുകള്‍ കണ്ടുപിടിച്ചുകൊണ്ടു വരാന്‍ മിടുക്കനാണ്.

steve bannonഇപ്പോള്‍ സിയാറ്റലിലെ ജഡ്ജ് ജെയിംസ് റൊബര്‍ട്ട്, എന്റെ എക്‌സിക്യൂട്ടീവ് ഓര്‍ഡറിന് എതിരെ ദേശീയ വിധി പ്രസ്താവിച്ചത് അപകടമാണ്, അമേരിക്കക്കാരന്റെ സംരക്ഷണമാണ് എന്റെ പ്രധാന ഉത്തരവാദിത്തം അല്ലെ ?, അല്ലാതെ നുഴഞ്ഞു കയറി വരുന്നവരെ അഴിച്ചുവിടുന്ന സമീപനമല്ല, അയ്യാളുടെ തലയില്‍ എന്ത് മണ്ണാങ്കട്ടയാണെന്നുഎന്ന് എനിക്കറിയില്ല. ഒരു തൊണ്ണൂറ് ദിവസത്തേക്ക് ഒബാമ പോന്നവഴി എറിഞ്ഞു കത്തിച്ച തീരുമാനങ്ങള്‍ ഒന്ന് ഹോള്‍ഡ് ചെയ്യാനേ ഞാന്‍ പറഞ്ഞുള്ളൂ . ഈ ലിബറല്‍സിനു തീരെ രാജ്യസ്‌നേഹം ഇല്ല.എനിക്ക് ആകെ ചൂട് എടുക്കുന്നു, മെലാനിയയെ ഇങ്ങോട്ടു കൂട്ടികൊണ്ടുവരാന്‍ പറ, ഞാന്‍ ഫ്ലോറിഡയില്‍ പോയി ഒന്ന് ഗോള്‍ഫ് കളിച്ചിട്ട് വരുമ്പോഴേക്കും നമ്മുടെ സ്റ്റീവ് എന്തെങ്കിലും തീ പിടിപ്പിക്കാതിരിക്കില്ല. മൈക്ക്, നിങ്ങള്‍ പോയി ഒന്ന് നന്നായി കുളിച്ചിട്ടു കിടന്നുറങ്ങ്, രാവിലെയാകുമ്പോഴേക്കും ഞാന്‍ നല്ല ഒരു ട്വിറ്റ് അടിച്ചു ഗംഭീരമാക്കാം, ഗുഡ് നൈറ്റ് !!


Like our page https://www.facebook.com/MalayalamDailyNews/ and get latest news update from USA, India and around the world. Stay updated with latest News in Malayalam, English and Hindi.

Print This Post Print This Post
To toggle between English & Malayalam Press CTRL+g

Leave a Reply

Your email address will not be published. Required fields are marked *

Read More

Scroll to top