ബംഗളൂരു: മാഗ്നറ്റിക് കാര്‍ഡ് റീഡറുകള്‍ ഉപയോഗിച്ച് എ.ടി.എം കാര്‍ഡ് വിവരങ്ങള്‍ ചോര്‍ത്തി പണം തട്ടുന്ന വനിതകളടങ്ങുന്ന ആഫ്രിക്കന്‍ സംഘത്തെ ബാനസ്വാഡി പൊലീസ് അറസ്റ്റ് ചെയ്തു.

നൈജീരിയക്കാരായ എറേംഹെന്‍ സ്മാര്‍ട്ട് (33), കെന്നി എന്ന അജനി (23), ഒലോദജി ഓലയേം (34), ഉഗാണ്ടക്കാരായ മാര്‍ട്ടിന്‍ എന്‍സാംബ (25), ജോളി എന്ന നംബൂസ് (23), ടിന, ബംഗളൂരു സ്വദേശി വിക്രം റാവു (40) എന്നിവരാണ് പിടിയിലായത്. സംഘത്തില്‍നിന്ന് 21 ലക്ഷം രൂപയും പിടിച്ചെടുത്തു.

സോഫ്റ്റ്‌വെയര്‍ എഞ്ചിനീയറായ പായല്‍ മണ്ഡലിന്‍െറ പരാതിയെ തുടര്‍ന്ന് നടത്തിയ അന്വേഷണത്തിലാണ് പ്രതികള്‍ വലയിലായത്. ഇവരുടെ എച്ച്.ഡി.എഫ്.സി ബാങ്കിന്‍െറ ഡെബിറ്റ് കാര്‍ഡ് വിവരങ്ങള്‍ ചോര്‍ത്തി 94,318 രൂപ പിന്‍വലിച്ചെന്നായിരുന്നു പരാതി. വിവിധ ബാങ്കുകളിലെ എ.ടി.എം കാര്‍ഡ് വിവരങ്ങള്‍ ചോര്‍ത്തി പണം പിന്‍വലിച്ചതുമായി ബന്ധപ്പെട്ട് ഒരാഴ്ചക്കിടെ ബാനസ്വാഡി പൊലീസ് സ്റ്റേഷനില്‍ 11 പരാതികള്‍ ലഭിച്ചിരുന്നു. എല്ലാ അക്കൗണ്ടുടമകളുടെയും ബാങ്ക് സ്റ്റേറ്റ്മെന്‍റ് പരിശോധിച്ചപ്പോള്‍ സമാനതകള്‍ കണ്ടെത്തുകയായിരുന്നു.