Flash News

കാല്‍വരിയില്‍ നിന്ന് (കവിത): ജയന്‍ വര്‍ഗീസ്

April 13, 2017

kalvary size( കഠിന പീഡനങ്ങള്‍ ഏറ്റുവാങ്ങിക്കൊണ്ട് കുരിശുമരണത്തിലേക്ക് നടന്നടുക്കുന്ന അരുമപ്പുത്രനെ അകലെ നിന്ന് വീക്ഷിക്കുന്ന അമ്മമനസ്സിന്റെ തേങ്ങലുകളാണ് ഈ കവിത)

പൊന്നോമല്‍കരളേ നിന്‍
ചെന്നിണപൂമേനിയില്‍
ഒന്നുമ്മ വയ്ക്കാന്‍ പോലും
അമ്മക്കിന്നാവില്ലല്ലോ ?

ചമ്മട്ടി വീശാന്‍ മാത്രം
തെമ്മാടിക്കൂട്ടം നിന്റെ
യുള്ളിലെ സ്‌നേഹത്തിന്റെ
കിളിയെ കശക്കുമ്പോള്‍,

തറഞ്ഞ മുള്ളില്‍ നിന്നും
കിനിഞ്ഞ ചോരത്തള്ളി
പരന്നു വീണിട്ടേവ-
മുഴന്നു നീ നോക്കുമ്പോള്‍,

ചുമലില്‍ നീ പേറുന്ന
കുരിശിന്‍ ഭാരത്താലേ
കുനിഞ്ഞു പോകും നിന്റെ-
യുടലില്‍ നീ വീഴുമ്പോള്‍,

ഒന്നടുത്തെത്താന്‍ കൂലി-
പ്പടയെ രൗദ്രത്തിന്റെ
ചെങ്കനല്‍ത്തീയില്‍ തള്ളി
നിന്നെ വീണ്ടെടുക്കുവാന്‍,

അമ്മതന്‍ മോഹം പറ-
ന്നടുത്തെത്തുന്നൂ പക്ഷെ,
ഒന്നുമാവാതെ തക-
ര്‍ന്നടിഞ്ഞു വീണീടുന്നു!

എന്തപരാധം നിന്നെ
കൊലക്കു കൊടുക്കുവാന്‍?
ചിന്തയില്‍ സ്‌നേഹത്തിന്റെ
മുന്തിരി നിറച്ചതോ?

അദ്ധ്വന ഭാരം പേറി-
ത്തളര്‍ന്ന മനുഷ്യനോ-
രത്താണിയായി ത്തീര്‍ന്നീ
സത്യങ്ങള്‍ പറഞ്ഞതോ?

പാപ പുസ്തകത്തിന്റെ
താളുകള്‍ കീറിക്കീറി
പാപിനിപ്പെണ്ണിന്‍ ജീവന്‍
ഏറില്‍ നിന്നണച്ചതോ ?

കടലും, കാറ്റും, പിന്നെ
വയലില്‍പ്പൂവും, മീനും,
ഇടയപ്പാട്ടും, വിത-
ക്കിറങ്ങാ പ്പക്ഷികുഞ്ഞും,

ഒരുപോല്‍ കരളിലെ
കനവായ് പേറിത്തനി-
തെരുവിലലയുന്ന
തെണ്ടിയായ് നടന്നതോ?

തല ചായ്ക്കുവാന്‍ പോലു-
മിടമില്ലാതെ യൊറ്റ
തുണിയില്‍ വിശപ്പിന്റെ
വേദന യറിഞ്ഞതോ?

മാനവ സമൂഹത്തിന്‍
നീതി ശാസ്ത്രങ്ങള്‍ നിന്നെ-
യാണിയില്‍ തറക്കുമ്പോ-
ളൊന്നവരറിഞ്ഞില്ലാ,

കാലമാകുന്നൂ വധി-
ച്ചൊടുക്കാന്‍ കഴിയാത്ത
ഭാവമാകുന്നൂ വീണ്ടും
ജനിക്കാനിരിക്കുന്നു !

ഏതു കാലത്തും പീലാ-
ത്തോസുമാരുയിര്‍ക്കുന്നൂ ,
നീതി ശാസ്ത്രത്തിന്‍ കഴു-
മരങ്ങളുയര്‍ത്തുന്നു !

പിടഞ്ഞു പിടഞ്ഞു നീ
കുരിശില്‍ മരിക്കുമ്പോള്‍,
ഇരുളില്‍ പുലരിയായ്
ഇനിയുമുയിര്‍ക്കുന്നു !!


Like our page https://www.facebook.com/MalayalamDailyNews/ and get latest news update from USA, India and around the world. Stay updated with latest News in Malayalam, English and Hindi.

Print This Post Print This Post
To toggle between English & Malayalam Press CTRL+g

Leave a Reply

Your email address will not be published. Required fields are marked *

Read More

Scroll to top