Flash News

മനുഷ്യന്റെ അഹങ്കാരം (കവിത)

February 18, 2018 , ജയന്‍ വര്‍ഗീസ്

ahankaramമനുഷ്യന്റെ ‘അഹങ്കാരം’
മാനം മുട്ടുമ്പോള്‍,
മനുഷ്യ നിര്‍മ്മിത നീതി ശാസ്ത്രം
‘മത്സരം’ എന്നത് തിരുത്തുന്നു!
സഹ ജീവികളെ ചവിട്ടിത്താഴ്ത്തി
ഉയരങ്ങള്‍ കീഴടക്കുമ്പോള്‍,
പോരില്‍ ജയിക്കുന്നവനെ
വീരനാക്കുന്നു ലോക നീതി !
വീണടിയുന്നവന്റെ വേദനകള്‍
വെറുതേ വിലയിക്കുന്ന വനരോദനം ?

കലയും, സാഹിത്യവും വഴി തെറ്റുന്‌പോള്‍,
സംസ്കാരം ചാപിള്ളകളെ പ്രസവിക്കുന്നു.
മനുഷ്യ ശരീരത്തിന്റെ നിമ്‌നോന്നതങ്ങള്‍
മീഡിയകള്‍ ഒപ്പിയെടുത്തു വില്‍ക്കുന്‌പോള്‍,
‘പ്രണയം’ എന്നത് വ്യഭിചാരത്തിന്റെ മൊഴിമാറ്റം;
കട്ട് കടത്തുന്നവന്‍ ചക്രവര്‍ത്തി !
ലൈംഗിക വൈകൃതങ്ങളുടെ പുഴുക്കുത്തുകള്‍
നാക്കിലും മൂക്കിലുമായി വളരുന്‌പോള്‍,
ശൂന്യമാക്കുന്ന മ്ലേശ്ചതകള്‍
വിശുദ്ധ സ്ഥലത്തിരിക്കുന്നു ?

ആത്മാവിഷ്ക്കാരത്തിന്റെ
അനശ്വര രചനകള്‍,
അടിപൊളിയില്‍ മുങ്ങിത്താണ്
അപമൃത്യു വരിക്കുന്നു.
മനുഷ്യാവസ്ഥയെ മാറ്റേണ്ട രചനകള്‍
മത്ത് പിടിച്ചാടുന്ന
ഉത്തേജക മരുന്നുകള്‍ ?

ഇളിപ്പും കുലുക്കും ഇക്കിളിപ്പാട്ടും,
ജനപ്രിയ സിനിമയുടെ ജനനേന്ദ്രിയങ്ങള്‍.
ചതിച്ചും വഞ്ചിച്ചും പിടിച്ചുപറിച്ചും
ചാനല്‍ മുഖങ്ങളില്‍ കണ്ണീര്‍ പുഴകള്‍.
വയാഗ്രാ കലക്കിയ ചുടുപാലുമായി
കണവനെ കാക്കുന്ന പ്രിയതമമാര്‍.
അവരില്‍ നിന്ന് നിന്നൊളിച്ചോടുന്നവര്‍
ചുവന്ന തെരുവുകളില്‍ വീണുറങ്ങുന്നു ?

സഹിച്ചും ക്ഷമിച്ചും കാലവും പ്രകൃതിയും,
അനിവാര്യ ദിശകളില്‍ പ്രതികരിക്കുന്നു.
കടലുകള്‍ കരകളെ വിഴുങ്ങുന്ന സുനാമികള്‍,
കടല്‍ക്കാറ്റുകളുടെ നാവുകള്‍
കരകളെ നക്കുന്ന ഹെറിക്കേനുകള്‍,
നാടും നഗരവും തുടച്ചുനീക്കുന്ന മണ്ണിടിച്ചിലുകള്‍,
ഭൗമ ഘടനയുടെ അടിയിളക്കുന്ന ഭൂകന്പങ്ങള്‍,
വരള്‍ച്ച, പ്രളയം, ക്ഷാമം, പക്ഷിപ്പനി….
വിനാശത്തിന്റെ വിസ്മയ കാലടികളില്‍,
സര്‍വ നാശത്തിന്റെ പാദ പതന നാദം ?

നഗ്‌നനും നിസ്സഹായനുമായ മനുഷ്യാ,
അഹന്തയുടെ അഗ്‌നി ഗോപുരങ്ങളില്‍ നിന്ന്
അനുഗ്രഹത്തിന്റെ വെറും നിലത്ത് താഴെ വരിക !
ആരോ നല്‍കിയ ഔദാര്യമാണ് ജീവിതം എന്നതിനാല്‍,
അത് നല്‍കിയവനെ ആദരിക്കണമല്ലോ ?
അതോടൊപ്പം, സ്വന്തം സഹജീവിയെയും ?

Print This Post Print This Post
To toggle between English & Malayalam Press CTRL+g

Leave a Reply

Your email address will not be published. Required fields are marked *

Read More

Scroll to top