Flash News

അലാസ്കയിലെ മഞ്ഞും കത്തും (വീഡിയോ)

October 5, 2018

FIREഅലാസ്‌ക: വെള്ളത്തില്‍ തീയിട്ടാല്‍ വെള്ളം കത്തുകയില്ല പകരം തീ കെട്ടുപോകും. അതുതന്നെയാണ് മഞ്ഞിന്റെ കാര്യത്തിലും. പക്ഷെ, അലാസ്കയിലെ മഞ്ഞും കത്തുമെന്ന് തെളിയിച്ചിരിക്കുകയാണ് ഗവേഷകര്‍. മഞ്ഞ് അല്ല കത്തുന്നതെങ്കിലും മഞ്ഞു മൂടിയ സ്ഥലമാണ് കത്തുന്നത്. മൈലുകളോളം പരന്നു കിടക്കുന്ന മഞ്ഞ് പാളികള്‍. അവയില്‍ ചിലയിടത്ത് ദ്വാരമിട്ട് തീപ്പൊരി ഇട്ടാല്‍ ആളികത്തും. ഒരു അഗ്‌നിപര്‍വ്വതത്തിന് സമാനമായിട്ടാണ് കത്തുക. ഇതിനു പിന്നിലെ സത്യാവസ്ഥയാണ് ഇപ്പോള്‍ വെളിപ്പെടുന്നത്.

വടക്കന്‍ അലാസ്‌കയില്‍ നിന്നാണ് മഞ്ഞില്‍ തീ പടരുന്ന ഈ കാഴ്ച എത്തിയിരിക്കുന്നത്. അവിടെ എസിയ തടാകത്തില്‍ കെട്ടിക്കിടക്കുന്ന മീഥെയ്ന്‍ വാതകമാണ് തീപ്പിടിത്തത്തിനു പിന്നിലെ രഹസ്യം. ഹരിതഗൃഹ വാതകമായാണ് മീഥെയ്‌നിനെ കണക്കാക്കുന്നത്. ഇവയെങ്ങനെയാണ് തണുത്തുറഞ്ഞ എസിയ തടാകത്തിനടിയില്‍ എത്തിയതെന്നായിരുന്നു ഗവേഷകര്‍ പരിശോധിച്ചത്. ഗവേഷകര്‍ അതിനുത്തരവും കണ്ടെത്തി. ‘പെര്‍മഫ്രോസ്റ്റ്’ എന്ന വസ്തുവാണ് അതിനു കാരണം.

ആര്‍ട്ടിക് പ്രദേശങ്ങളിലാണ് ഇതു പ്രധാനമായും കാണാനാകുക. മണ്ണ്, ചരല്‍, എന്നിവയെല്ലാം മഞ്ഞിനാല്‍ കൂട്ടിച്ചേര്‍ക്കപ്പെട്ട നിലയിലായിരിക്കും ഇവിടം. ഇങ്ങനെ ഏകദേശം രണ്ടു വര്‍ഷമെങ്കിലും ജലത്തിന്റെ ഖരാങ്കത്തില്‍ താഴെ ഊഷ്മാവില്‍ സ്ഥിതി ചെയ്യുന്ന മണ്ണാണ് പെര്‍മഫ്രോസ്റ്റ്. ഇലകള്‍ വീണും മറ്റും ചീഞ്ഞളിഞ്ഞ് മീഥെയ്‌നും കാര്‍ബണും ഇതില്‍ ഉല്‍പാദിപ്പിക്കപ്പെടാറുണ്ട്. ലോകത്തിലെ എല്ലാ പെര്‍മഫ്രോസ്റ്റുകളിലുമായി ഏകദേശം 1500 ബില്യന്‍ ടണ്‍ കാര്‍ബണ്‍ ‘അടക്കി വയ്ക്കപ്പെട്ട’ നിലയിലുണ്ടെന്നാണു കരുതുന്നത്.

എസിയ തടാകത്തിന്റെ പല ഭാഗത്തും പെര്‍മഫ്രോസ്റ്റുകള്‍ രൂപപ്പെട്ടിട്ടുണ്ട്. ചുറ്റിലുമുള്ള മരങ്ങളുടെ ഇലകളും മറ്റും വീണ് ജീര്‍ണിച്ച് ഇവയില്‍ മീഥെയ്ന്‍ വാതകവും വന്‍തോതില്‍ രൂപപ്പെട്ടിരിക്കുന്നു. എന്നാല്‍ അടിത്തട്ടില്‍ നിന്നു മുകളിലേക്കു വരാന്‍ ഇവയ്ക്കു വഴിയില്ല.വേനല്‍ക്കാലത്തു മഞ്ഞുരുകുമ്പോള്‍ മീഥെയ്ന്‍ കുമിളകളായി മുകളിലേക്കു വരും. അതിനു തീകൊടുത്താലും കത്തിപ്പിടിക്കും. ശീതകാലത്ത് ഈ കുമിളകളിലേക്കു മഞ്ഞ് നിറയും. പെര്‍മഫ്രോസ്റ്റ് പ്രദേശങ്ങളില്‍ നോക്കിയാല്‍ ഇത്തരത്തില്‍ ഫംഗസ് പിടിച്ചതു പോലെ മഞ്ഞിന്‍പാളികളില്‍ മീഥെയ്ന്‍ കുമിളകള്‍ കാണാനാകും.

ഈ കുമിളകളെ വടി കൊണ്ടോ മറ്റോ കുത്തിപ്പൊട്ടിച്ചാല്‍ അതില്‍ നിന്നു പുറത്തു ചാടുക മീഥെയ്‌നായിരിക്കും. അന്തരീക്ഷത്തിലേക്കു രക്ഷപ്പെടും’ മുന്‍പ് തീ കൊടുത്താല്‍ സംഗതി ആളിക്കത്തും. മഞ്ഞിനടിയില്‍ ‘ഒളിച്ചിരുന്ന’ മീഥെയ്ന്‍ ഇത്തരത്തില്‍ പുറത്തു ചാടുന്നതാണ് എസിയയില്‍ ഗവേഷകര്‍ തീയിട്ടു തെളിയിച്ചത്. ഇവ കൂട്ടത്തോടെ പുറത്തേക്കു വന്നാലും പ്രശ്‌നമാണ്. സ്വാഭാവികമായും അന്തരീക്ഷത്തിലെ ചൂടു കൂടും. അതോടെ മഞ്ഞുരുകും. അതുവഴി പെര്‍മഫ്രോസ്റ്റുകളിലെ കൂടുതല്‍ മീഥെയ്ന്‍ വാതകം പുറത്തെത്തുകയും ചൂട് പിന്നെയും കൂടുകയും ചെയ്യും.

Print This Post Print This Post
To toggle between English & Malayalam Press CTRL+g

Leave a Reply

Your email address will not be published. Required fields are marked *

Read More

Scroll to top