വില്ല്യം- കെയ്റ്റ് ദമ്പതികളുടെ പെണ്‍കുഞ്ഞിന്‍റെ പേര് എന്തായിരിക്കുമെന്ന് ഉറ്റു നോക്കുകയാണ് ലോകം. വാതുവയ്പ്പുകാര്‍ പറയുന്നത് ഷാര്‍ലെറ്റ് എന്നായിരിക്കും കുഞ്ഞിന്‍റെ പേരെന്നാണ്. ആലീസ് എന്ന പേരും പലരും പറയുന്നുണ്ട്. ഒലിവിയയാണ് മറ്റൊരു പേര്. വിക്ടോറിയ, എലിസബത്ത് എന്നീ പേരുകളും കുഞ്ഞിനായി ആരാധകര്‍ നിര്‍ദേശിച്ചിട്ടുണ്ട്. കുഞ്ഞിന്‍റെ പേര് ഉടന്‍ വെളിപ്പെ‌ടുത്തുമെന്നാണ് സൂചന.

കുഞ്ഞു രാജകുമാരി കെന്‍സിങ്ടണ്‍ കൊട്ടാരത്തില്‍ തന്‍റെ ആദ്യ ദിനം ചെലവിട്ടു. നാലംഗ കുടുംബം കഴിഞ്ഞ ദിവസമാണ് കൊട്ടാരത്തില്‍ തങ്ങളുടെ ആദ്യ ദിനം ചെലവിട്ടത്.

ശനിയാഴ്ചയാണ് കെയ്റ്റ് ലണ്ടനിലെ സെന്‍റ് മേരി ആശുപത്രിയില്‍ പെണ്‍ കുഞ്ഞിന് ജന്മം നല്‍കിയത്. 3.7 കിലോയാണ് കുഞ്ഞിന്‍റെ ഭാരം. ആശുപത്രിയില്‍ നിന്ന് കൊട്ടാരത്തില്‍ തിരിച്ചെത്തുമ്പോള്‍ കുഞ്ഞിന്‍റെ പേര് വെളിപ്പെടുത്തുമെന്നാണ് കരുതിയിരുന്നത്. എന്നാല്‍ അതുണ്ടായില്ല.

2013-ല്‍ വില്ല്യം- കെയ്റ്റ് ദമ്പതികള്‍ക്ക് ജോര്‍ജ് രാജകുമാരന്‍ പിറന്നപ്പോള്‍ ആശുപത്രിയില്‍ നിന്ന് കൊട്ടാരത്തില്‍ എത്തിയ ഉടന്‍ പേര് വെളിപ്പെ‌ടുത്തിയിരുന്നു. അതേസമയം കുഞ്ഞു രാജകുമാരിയുടെ ആദ്യ ചിത്രങ്ങള്‍ പുറത്തു വന്നു. കുഞ്ഞുമായി കെയ്റ്റും വില്ല്യവും ആശുപത്രിയില്‍ നിന്നു പുറത്തു വരുന്ന ചിത്രങ്ങളാണ് തരംഗമാകുന്നത്.