ഫ്ലോറിഡ: ഫ്ലോറിഡാ ബ്രണ്ടന്‍ പ്രദേശങ്ങളിലുള്ള മൂന്ന് ബാങ്കുകള്‍ 30 മിനിറ്റിനുള്ളില്‍ കൊള്ളയടിച്ച് രക്ഷപ്പെട്ട 50 വയസ്സുകാരി സിന്‍‌ഡി കരാബൊയെ റെക്കോര്‍ഡ് സമയത്തിനുള്ളില്‍ തന്നെ പോലീസ് അറസ്റ്റ് ചെയ്ത് ജയിലില്‍ അടച്ചു.

മേയ് 11 തിങ്കളാഴ്ച ഉച്ചയ്ക്ക് ശേഷം 3.19നാണ് ആദ്യമായി ബി.ബി ആന്‍ഡ് ടി ബാങ്ക് കൊള്ളയടിച്ചത്. കൗണ്ടറില്‍ എത്തിയ സിന്‍‌ഡി ഒരു കുറിപ്പ് കാഷ്യര്‍ക്ക് നല്‍കി. ‘എന്റെ കൈവശം തോക്കുണ്ട് ഉടന്‍ പണം എന്നെ ഏല്പ്പിക്കണം’ പരിഭ്രമിച്ച കാഷ്യര്‍ പണം നല്‍കി.

അവിടെ നിന്നും രക്ഷപ്പെട്ട പ്രതി 16 മിനിറ്റിനു ശേഷം വെല്‍സ് ഫര്‍ഗോ ബാങ്കിലെത്തി ഇതേ തന്ത്രം തന്നെ പുറത്തെടുത്തു. അവിടെ നിന്നും കൈക്കലാക്കിയ പണവുമായി അടുത്ത ബാങ്കിനെ ലക്ഷ്യമാക്കി നടന്നകന്നു.

8 മിനിറ്റിനു ശേഷം 3.43നായിരുന്നു അടുത്ത ഊഴം. ഫ്ലോറിഡാ സെന്‍ഡ്രല്‍ ക്രെഡിറ്റി യൂണിയനില്‍ നിന്നും കവര്‍ച്ച ചെയ്ത പണവുമായി ഇവര്‍ രക്ഷപ്പെട്ടു.

ഇതിനിടെ ഹില്‍സ് ബറോ കണ്ടി ഷെറിഫിന് ഇവരുടെ കാര്‍ നമ്പര്‍ ലഭിച്ചിരുന്നു. കാര്‍ നമ്പര്‍ അന്വേഷിച്ച് ചെന്നെത്തിയത് ഇവരുടെ അപ്പാര്‍ട്ട്മെന്റില്‍ ആയിരുന്നു. മൂന്ന് ബാങ്കില്‍ നിന്നും ലഭിച്ച തുകയുമായി അപ്പാര്‍ട്ട്മെന്റില്‍ എത്തിയ പ്രതിയെ പോലീസ് അറസ്റ്റ് ചെയ്തു. കവര്‍ച്ച, ഭീഷണി എന്നീ വകുപ്പുകള്‍ ഉള്‍പ്പെടുത്തി കേസ്സെടുത്തതിന് ശേഷം ഇവരെ ജയിലിലേക്ക് മാറ്റി.

സാഹസീകമായ ഈ ബാങ്ക് കവര്‍ച്ചയെ കുറിച്ച് പോലീസാണ് മാധ്യമങ്ങളെ അറിയിച്ചത്.