ചെന്നൈ: മഴ പെയ്യാന്‍ വരുണനെ പ്രീതിപ്പെടുത്താന്‍ പ്രത്യേക പൂജ നടത്തണമെന്ന് തമിഴ്നാട് ജലവിഭവശേഷി വകുപ്പ് ചീഫ് എന്‍ജിനീയറുടെ സര്‍ക്കുലര്‍. ഇക്കൊല്ലം മഴ കുറവാകുമെന്ന് കാലാവസ്ഥാ കേന്ദ്രങ്ങള്‍ പ്രവചിച്ച സാഹചര്യത്തിലാണ് മേയ് 26ന് ചീഫ് എന്‍ജിനീയറായ എസ്. അശോകന്‍ സര്‍ക്കുലര്‍ പുറപ്പെടുവിച്ചത്.

മതപുരോഹിതരും മറ്റും വെള്ളത്തിലിറങ്ങി നിന്ന് നടത്തുന്ന ‘വരുണ ജപം’ ഉള്‍പ്പെടെ പ്രാര്‍ഥനകളും പൂജാ വഴിപാടുകളും നടത്തിയശേഷം ഇതിന്‍െറ വിവരങ്ങള്‍ ഇ-മെയിലില്‍ അറിയിക്കണമെന്നും ഉത്തരവില്‍ പറയുന്നു. ഇതിനുശേഷം തിരുച്ചിയില്‍ ചേര്‍ന്ന അസി. എന്‍ജിനീയര്‍മാരുടെ യോഗത്തിലും പൂജകള്‍ സംഘടിപ്പിക്കാന്‍ ഇദ്ദേഹം കര്‍ശന നിര്‍ദേശം നല്‍കി.

മഴ ലഭ്യമാവാത്തപക്ഷം കാവേരി ഡെല്‍റ്റ പ്രദേശങ്ങളില്‍ കടുത്ത വരള്‍ച്ച അനുഭവപ്പെടുമെന്നും അദ്ദേഹം മുന്നറിയിപ്പ് നല്‍കി. സര്‍ക്കാര്‍ വകുപ്പ് മേധാവി ഇത്തരത്തിലൊരു സര്‍ക്കുലര്‍ അയച്ചത് വേദനയും ഞെട്ടലുമുളവാക്കിയതായി തമിഴ്നാട് കോണ്‍ഗ്രസ് അധ്യക്ഷന്‍ ഇ.വി.കെ.എസ്. ഇളങ്കോവന്‍ പ്രസ്താവിച്ചു. സര്‍ക്കാര്‍ നടപടികളില്‍ മതനിരപേക്ഷ സ്വഭാവം കൈവെടിയുന്നത് ഗുരുതര പ്രത്യാഘാതങ്ങള്‍ സൃഷ്ടിക്കും. പ്രത്യേക മതാചാരങ്ങള്‍ നടപ്പാക്കാന്‍ ഉത്തരവിടുന്ന ഉന്നത ഉദ്യോഗസ്ഥനെതിരെ നടപടിയെടുക്കണമെന്നും ഇളങ്കോവന്‍ ആവശ്യപ്പെട്ടു.