തിരുവനന്തപുരം: കടുത്ത വിമര്‍ശനങ്ങള്‍ക്കിടയാക്കി 2014ലെ ചലച്ചിത്ര അവാര്‍ഡുകള്‍ പ്രഖ്യാപിച്ചു. മുന്നറിയിപ്പ്, ഞാന്‍ സ്റ്റീവ് ലോപ്പസ്, ഐന്‍ തുടങ്ങി കഴിഞ്ഞ വര്‍ഷം ഇറങ്ങിയ മികച്ച സിനിമകളെ തഴഞ്ഞ് ന്യൂ ജെന്‍ ചിത്രങ്ങള്‍ക്ക് ജോണ്‍ പോള്‍ ചെയര്‍മനായ ജൂറി അവാര്‍ഡുകള്‍ വാരിക്കോരി നല്‍കി.

മികച്ച നടന്‍, നടി എന്നിവരുടെ കാര്യത്തിലാണ് ഏറ്റവും രൂക്ഷമായ വിമര്‍ശനം. നിവിന്‍ പോളിയെ മികച്ച നടനായും നസ്രിയയെ മികച്ച നടിയായും തെരഞ്ഞെടുത്തതിനെതിരെ സോഷ്യല്‍ മീഡിയയിലും സിനിമാലോകത്തും കടുത്ത എതിര്‍പ്പുയരുകയാണ്.

‘മുന്നറിയിപ്പ്’ എന്ന ചിത്രത്തിലെ മമ്മൂട്ടിയുടെ വേഷമായിരുന്നു ഇത്തവണ മികച്ച നടന് പരിഗണിക്കപ്പെടുക എന്നായിരുന്നു ഏവരുടെയും പ്രതീക്ഷ. ഇത്തവണ ദേശീയഅവാര്‍ഡിന്‍െറ അന്തിമഘട്ടം വരെയും മമ്മൂട്ടിയുടെ വേഷം പരിഗണനയിലുണ്ടായിരുന്നു. എന്നാല്‍, പൊടുന്നനെയാണ് നിവിന്‍പോളിക്ക് ഭാഗ്യക്കുറി അടിച്ചത്. നിവിന്‍പോളിയുടെ പേര് അതുവരെ എവിടെയും പറഞ്ഞു കേട്ടിരുന്നില്ല. മാത്രമല്ല, മികച്ച നടനുള്ള അവാര്‍ഡിന് അര്‍ഹനാകാന്‍ മാത്രമുള്ള അഭിനയം 1983, ബാംഗ്ളൂര്‍ ഡെയ്സ് എന്നീ ചിത്രങ്ങളില്‍ നിവിന്‍ പോളി കാഴ്ചവച്ചിട്ടില്ലന്നാണ് പൊതുവെയുള്ള വിമര്‍ശനം. മമ്മൂട്ടിക്ക് പ്രത്യേകമായി അവാര്‍ഡ് നല്‍കാം എന്ന നിര്‍ദേശമുണ്ടായിരുന്നുവെങ്കിലും അത് വിവാദമാകുമെന്ന് ഭയന്ന് ജൂറി പിന്മാറുകയായിരുന്നു.

ഇതേപോലെയാണ് നസ്റിയയുടെ അവാര്‍ഡും. വെറും അപ്പിയറന്‍സ് എന്ന തലത്തില്‍ മാത്രമാണ് ബാംഗ്ലൂര്‍ ഡെയ്സിലും ഓം ശാന്തി ഓശാനയിലെയും നസ്റിയയുടെ പ്രകടനം വിലയിരുത്താനാകുക. ഹൗ ഓള്‍ഡ് ആര്‍ യുവിലെ മഞ്ജുവാര്യരുടെ അഭിനയവുമായി താരതമ്യപ്പെടുത്തിയാല്‍ ഇത് കൂടുതല്‍ വ്യക്തമാകും. നിവിന്‍പോളിയെയും നസ്റിനെയും അവസാനനിമിഷം തിരുകിക്കയറ്റിയതാണെന്ന ആരോപണമാണ് ജൂറിക്കെതിരെ ഉയരുന്നത്.

യേശുദാസിന് മികച്ച ഗായകനുള്ള അവാര്‍ഡ് നല്‍കിയതിലും എതിര്‍പ്പുണ്ട്. കഴിഞ്ഞവര്‍ഷം അത്ര മികച്ച പാട്ട് യേശുദാസ് പാടിയിട്ടില്ല. മാത്രമല്ല, 30ലേറെ സംസ്ഥാന അവാര്‍ഡുകള്‍ നേടിയിട്ടുള്ള അദ്ദേഹത്തിന് ഇനിയും സംസ്ഥാന അവാര്‍ഡ് നല്‍കുക എന്നത് പുതിയ ഒരു ഗായകന് നല്‍കേണ്ട അംഗീകാരം ഇല്ലാതാക്കുമെന്നാണ് വിമര്‍ശനം.