ന്യൂഡല്‍ഹി: 24 ഹൈകോടതികളിലായി കെട്ടിക്കിടക്കുന്നത് 45 ലക്ഷം കേസുകള്‍. 2014 ജൂണ്‍ അവസാനം വരെയുള്ള കണക്കാണിത്. അതായത്, ഓരോ ഹൈകോടതിയിലും കെട്ടിക്കിടക്കുന്നത് ശരാശരി രണ്ടു ലക്ഷം കേസുകള്‍. അലഹബാദ് ഹൈകോടതിയില്‍ മാത്രം ഏഴു ലക്ഷം കേസുകള്‍ തീര്‍പ്പാകാതെ കിടക്കുന്നുണ്ട്.

കോടതികളില്‍ ആവശ്യത്തിന് ജഡ്ജിമാരില്ലാത്തതാണ് കേസുകള്‍ കെട്ടിക്കിടക്കാന്‍ മുഖ്യകാരണം. 2014 ജൂണ്‍ അവസാനം വരെയുള്ള കണക്കുകളനുസരിച്ച് ഹൈകോടതികളില്‍ 265 ജഡ്ജിമാരുടെ ഒഴിവുകളാണുള്ളത്. 906 ജഡ്ജിമാര്‍ വേണ്ടിടത്താണിത്. 30 ശതമാനം കുറവാണുള്ളത്. അലഹബാദ് ഹൈകോടതിയില്‍ ജഡ്ജിമാരുടെ 160 തസ്തികയില്‍ 70ഉം ഒഴിഞ്ഞു കിടക്കുകയാണ്. 44 ശതമാനമാണ് ഇവിടെ കുറവ്. തീര്‍പ്പാകാത്ത കേസുകളില്‍ 10.3 ലക്ഷം ക്രിമിനല്‍ കേസുകളാണ്.