മൂന്നാര്‍: പെമ്പിളൈ ഒരുമൈ നേതാവ് ഗോമതി മൂന്നാറില്‍ തിരിച്ചത്തെി. എങ്കിലും ദുരൂഹത ബാക്കിയാണ്. ഗോമതിയോടൊപ്പം കാണാതായ ഒരുമൈ നേതാക്കളുടെ സഹായി മനോജും തിങ്കളാഴ്ച രാത്രി മൂന്നാറില്‍ മടങ്ങിയത്തെി. നല്ലതണ്ണി ബ്ലോക്കില്‍ നിന്ന് വിജയിച്ച ഗോമതി ദേവികുളത്ത് വിജയഘോഷം നടത്തുന്നതിനിടെ അനിഷ്ട സംഭവങ്ങള്‍ അരങ്ങേറുകയായിരുന്നു.

വോട്ടെണ്ണല്‍ പൂര്‍ത്തിയായി രണ്ടുദിവസം കഴിഞ്ഞ് ദേവികുളത്തത്തെിയ ഗോമതിയും സംഘവും തൊഴിലാളികളുമായി ഏറ്റുമുട്ടുകയായിരുന്നു. സംഭവത്തില്‍ പൊലീസ് ഇരുവിഭാഗങ്ങള്‍ക്കുമെതിരെ കേസെടുത്തിരുന്നു. എന്നാല്‍, ഗോമതിയും സംഘവും ജാമ്യമെടുക്കാതെ മൂന്നാറില്‍ നിന്ന് പോകുകയായിരുന്നു. പൊലീസും സ്പെഷല്‍ ബ്രാഞ്ചും ഊര്‍ജിത അന്വേഷണം നടത്തിയെങ്കിലും കണ്ടത്തൊന്‍ കഴിഞ്ഞില്ല. എ.ഐ.എ.ഡി.എം.കെയില്‍ ചേരാന്‍ ഗോമതി തമിഴ്നാട്ടില്‍ പോയതായ അഭ്യൂഹവും ശക്തമായിരുന്നു. ദേവികുളത്ത് നടന്ന അടിപിടിയില്‍ പരിക്കേറ്റ് ചികിത്സയിലിരിക്കെ എ.ഐ.എ.ഡി.എം.കെ പ്രവര്‍ത്തകര്‍ ഗോമതിയെ ആശുപത്രിയില്‍ സന്ദര്‍ശിച്ചിരുന്നു. തൊട്ടുപിന്നാലെയായിരുന്നു മനോജിന്‍െറയും ഗോമതിയുടെയും തിരോധാനം.

കഴിഞ്ഞദിവസം ശമ്പള വര്‍ധനയുമായി ബന്ധപ്പെട്ട് മൂന്നാറില്‍ ലിസി സണ്ണി വിളിച്ചുചേര്‍ത്ത വാര്‍ത്താ സമ്മേളനത്തിലും ഗോമതിയും മനോജും പങ്കെടുത്തിരുന്നില്ല. ഗോമതി എവിടെയെന്ന ചോദ്യത്തിന് അവര്‍ പാര്‍ട്ടി രൂപവത്കരിക്കാന്‍ തമിഴ്നാട്ടില്‍ പോയതായി ലിസി പറയാതെ പറയുകയുമുണ്ടായി.

പെമ്പിളൈ പ്രവര്‍ത്തകര്‍ തമിഴ്നാട്ടിലെ പാര്‍ട്ടി നേതാക്കളുമായി ചര്‍ച്ച നടത്തുന്നതായി ഇന്റലിജന്റ്സ് റിപ്പോട്ടുകള്‍ സര്‍ക്കാറിന് ലഭിച്ചതായി അറിയുന്നു. തോട്ടം മേഖലകളില്‍ തമിഴ് രാഷ്ട്രീയ പാര്‍ട്ടികളുടെ സ്വാധീനം ചൂണ്ടിക്കാട്ടി അടുത്ത നിയമസഭാ തെരഞ്ഞെടുപ്പിനെ പ്രയോജനപ്പെടുത്താനുള്ള നീക്കങ്ങള്‍ നടക്കുന്നുണ്ട്.