ന്യൂഡല്‍ഹി: രണ്ട് ലക്ഷം രൂപക്കു മുകളിലുള്ള എല്ലാ പണമിടപാടുകള്‍ക്കും ജനുവരി ഒന്നു മുതല്‍ പാന്‍ നമ്പര്‍ (പെര്‍മനന്റ് അക്കൗണ്ട് നമ്പര്‍) നിര്‍ബന്ധം. 10 ലക്ഷം രൂപ മുതല്‍ മൂല്യമുള്ള സ്ഥാവര വസ്തുക്കളുടെ ക്രയവിക്രയത്തിന് ഇനി പാന്‍ നമ്പര്‍ നിര്‍ബന്ധമാണ്. 50,000 രൂപക്ക് മുകളിലുള്ള ഹോട്ടല്‍, റെസ്റ്റേറന്റ് ബില്ലുകള്‍ക്കും വിദേശ വിമാനയാത്ര ടിക്കറ്റുകള്‍ക്കും ലക്ഷം രൂപക്ക് മുകളിലുള്ള, ലിസ്റ്റുചെയ്യാത്ത കമ്പനികളുടെ ഓഹരികളുടെ വാങ്ങലിനും വില്‍പ്പനക്കും പാന്‍ നമ്പര്‍ നിര്‍ബന്ധമാവും.
ഒരു ലക്ഷം രൂപക്കു മുകളിലുള്ള എല്ലാ ക്രയവിക്രയങ്ങള്‍ക്കും പാന്‍ നിര്‍ബന്ധമാക്കുമെന്ന് കേന്ദ്ര ധനമന്ത്രി ബജറ്റില്‍ പ്രഖ്യാപിച്ചിരുന്നു. എന്നാല്‍, വിവിധ മേഖലകളില്‍ നിന്ന് ലഭിച്ച നിവേദനങ്ങള്‍ പരിഗണിച്ചാണ് പരിധി രണ്ട് ലക്ഷമാക്കി നിര്‍ണയിച്ചത്. എല്ലാ വിധത്തിലുമുള്ള പണമിടപാടുകള്‍ക്കും ഇത് ബാധകമാണ്.
പാന്‍ കാര്‍ഡില്ലാത്തവര്‍ ഏതെങ്കിലും തിരിച്ചറിയല്‍ രേഖക്കൊപ്പം പ്രത്യേകം അപേക്ഷ പൂരിപ്പിച്ചു നല്‍കണം. 50,000 രൂപക്ക് മുകളിലുള്ള പോസ്റ്റ് ഓഫിസ് നിക്ഷേപങ്ങള്‍ക്ക് പാന്‍ വേണമെന്ന നിബന്ധന ഒഴിവാക്കിയിട്ടുണ്ട്.
Please like our Facebook Page https://www.facebook.com/MalayalamDailyNews for all daily updated news