ന്യൂഡല്‍ഹി: പത്താന്‍കോട്ട് സ്ഫോടനവുമായി ബന്ധപ്പെട്ട് പാകിസ്താനിലെ തീവ്രവാദസംഘടനയായ ജെയ്ശെ മുഹമ്മദ് നേതാവ് മൗലാനാ മസ്ഊദ് അസ്ഹറിനെ പാകിസ്താന്‍ ഇനിയും അറസ്റ്റ് ചെയ്യുകയോ വീട്ടുതടങ്കലിലാക്കുകയോ ചെയ്തിട്ടില്ലന്ന് ഇന്ത്യന്‍ ഇന്റലിജന്‍സ്. എന്നാല്‍, മറ്റൊരു കേസില്‍ മസ്ഊദ് അസ്ഹറിന്റെ അനുയായികളായ മൂന്നുപേരെ അറസ്റ്റ് ചെയ്തിട്ടുള്ളതായി ഇന്റലിജന്‍സ് പറഞ്ഞു.

അതേസമയം, പത്താന്‍കോട്ട് ആക്രമണത്തിലും മറ്റ് സ്ഫോടനങ്ങളിലും മസ്ഊദ് അസ്ഹറിന് ബന്ധമുള്ളതായി തെളിവുകളൊന്നുമില്ലന്ന് സര്‍ക്കാര്‍ അറിയിച്ചു. ജെയ്ശെ മുഹമ്മദ് തലവനെ അറസ്റ്റ് ചെയ്തതായ വാര്‍ത്തകള്‍ക്കു പിന്നില്‍ നിക്ഷിപ്ത താല്‍പര്യങ്ങളുള്ള പാകിസ്താനിലെ ഏജന്‍സികളായിരിക്കാമെന്ന് ഇന്റലിജന്‍സ് പറഞ്ഞു.

പത്താന്‍കോട്ട് ആക്രമണവുമായി ബന്ധപ്പെട്ട് അറസ്റ്റുകള്‍ രേഖപ്പെടുത്തിയതായുള്ള വിവരങ്ങളൊന്നും പാകിസ്താന്‍ ഇതുവരെ ഒൗദ്യോഗികമായി ഇന്ത്യക്ക് കൈമാറിയിട്ടില്ല. പത്താന്‍കോട്ട് ഭീകരാക്രമണത്തില്‍ പങ്കെടുത്തവരില്‍നിന്ന് ലഭിച്ച ആറു നമ്പറുകള്‍ പാകിസ്താന് കൈമാറിയിട്ടുണ്ടെങ്കിലും ഉടമസ്ഥരെ കണ്ടത്തൊന്‍ പാകിസ്താനായിട്ടില്ല.