എന്റെ ഏകാന്ത പുലരികളില്‍ എന്നില്‍ നീ ചിരി പടര്‍ത്തി..
ഉച്ചകളില്‍ തളര്‍ച്ചക്ക്, തകര്‍ച്ചക്ക് കൂട്ടായ് നീ എത്തി
സന്ധ്യകളിന്റെ വിഷാദമൗനങ്ങളില്‍ നീ നിഴല്‍ തീര്‍ത്തു
അതിനുമപ്പുറം… നീയവളിലേക്ക് മുഖം പൂഴ്ത്തവേ
കാത്തിരുപ്പ് ഒരു കടലാണെനിക്ക്..

എരിഞ്ഞ് തീരാന്‍ ശേഷിച്ച തീപാതിചത്തോരുടല്‍ മാത്രം
സ്വപ്നങ്ങള്‍ കാണാന്‍ മറന്ന ഞാന്‍ കൂട്ടിന് സ്വപ്നങ്ങള്‍ മാത്രം
രാത്രി, മഴയിലൂടെ വളരവെ ഞാന്‍ തേടുന്നത് നിലാവിനെ മാത്രം
ഇന്നെനിക്ക്… കൈമോശം വന്ന മനസ്സ് മാത്രം
കാത്തിരുപ്പ് ഒരു കനവാണെനിക്ക്..

അലറിക്കരഞ്ഞ രാവുകള്‍ നാളുംനാഴികയും അറിയാതെ നീങ്ങവെ
ചിറകറ്റ ശലഭക്കുഞ്ഞ്, മരണനിദ്രതന്‍ ആഴത്തെ പുല്‍‌കവെ
പറഞ്ഞ് തീരാത്ത കഥകളുമായെന്‍ ചുണ്ട് വിറയാര്‍ന്ന് നില്‍ക്കവെ
ഇനിയുമെന്ത്… ജ്വലിക്കുന്നോര്‍മകള്‍ മാത്രം
കാത്തിരുപ്പ് ഒരു കനലാണെനിക്ക്..

എന്റെ കണ്ണിലെ നിന്‍ മുഖം പോലുമിന്നെനിക്കന്യം
പേരറിയാത്തൊരീ ബന്ധത്തിന്നാഴമ്മിന്നെത്രയോ ധന്യം
നെഞ്ചിലെ ഘനശ്യാമമോലെമിന്ന് പെയ്‌തിറങ്ങുന്നു, വന്യം
നാളേക്ക്… കൂട്ടിവെച്ചൊരീ സ്നേഹമോ അനന്യം
കാത്തിരുപ്പ് ഒരു നോവാണെനിക്ക്..

ഇരുളിന്റെ കൊടുംനിദ്രയില്‍ നിന്നുണര്‍ത്തി നീയെന്നെ
മോഹങ്ങളുടെ സപ്തവര്‍ണ്ണ പീലിതന്നു, നീയെനിക്ക്
തളരാതെ, താഴാതെ പറക്കുവാനായിരു ചിറകും നീയേകി
എപ്പൊഴോ ഹൃദയശിഖരത്തില്‍ ഒരുകൂടും
കാത്തിരുപ്പ് ഒരു ഓര്‍മ്മയാണെനിക്ക്…