ന്യൂഡല്‍ഹി: ഏക സിവില്‍ കോഡ് നടപ്പാക്കല്‍, മുത്തലാഖ് നിര്‍ത്തലാക്കല്‍ എന്നിവയെക്കുറിച്ച് നിയമ കമീഷന്‍ പൊതുജനാഭിപ്രായം തേടി. ഏക സിവില്‍ കോഡ് ഐച്ഛികമാക്കേണ്ടതുണ്ടോ, മുത്ത്വലാഖ് രീതി നിരോധിക്കേണ്ടതുണ്ടോ എന്നീ ചോദ്യങ്ങളാണ് നിയമ കമീഷന്‍ ഉന്നയിച്ചിരിക്കുന്നത്. പൊതുജനാഭിപ്രായം തേടി 16 ചോദ്യങ്ങളാണ് കമീഷന്‍ ഉന്നയിച്ചിരിക്കുന്നത്. നിലവിലെ വ്യക്തിനിയമങ്ങളും കീഴ്വഴക്കങ്ങളും ചിട്ടപ്പെടുത്തുന്നത് ജനങ്ങള്‍ക്ക് പ്രയോജനപ്പെടുമോ എന്നതിനെക്കുറിച്ച് ചോദ്യാവലിയില്‍ അഭിപ്രായം തേടിയിട്ടുണ്ട്. വിവാഹം, വിവാഹ മോചനം, ദത്തെടുക്കല്‍, പിന്തുടര്‍ച്ച, കുട്ടികളുടെ സംരക്ഷണം തുടങ്ങിയ വിഷയങ്ങള്‍ ഏക സിവില്‍ കോഡില്‍ ഉള്‍പ്പെടുത്തേണ്ടതുണ്ടോ എന്നും ആരാഞ്ഞിട്ടുണ്ട്. മുത്തലാഖ് എടുത്തുകളയണോ, നിലനിര്‍ത്തണോ, അനുയോജ്യമായ ഭേദഗതികള്‍ നടത്തി നിലനിര്‍ത്തണമോ എന്നും കമീഷന്‍ ചോദിച്ചു.

ഏക സിവില്‍ കോഡിന്‍െറ പ്രായോഗികതയെക്കുറിച്ച് ആരോഗ്യകരമായ സംവാദത്തിന് ഇപ്പോഴത്തെ നടപടി തുടക്കമിടുമെന്ന് കമീഷന്‍ ചെയര്‍മാന്‍ റിട്ട. ജസ്റ്റിസ് ബി.എസ്. ചൗഹാന്‍ പറഞ്ഞു. എല്ലാ സമുദായങ്ങളുടെയും കുടുംബ നിയമങ്ങള്‍, കീഴ്വഴക്കങ്ങളുടെ വൈവിധ്യം എന്നിവക്കും സംവാദം ഊന്നല്‍ നല്‍കണം. കുടുംബ നിയമ പരിഷ്ക്കാരങ്ങളുടെ സ്വഭാവത്തില്‍ ഏതെങ്കിലും സമൂഹത്തിനോ വര്‍ഗത്തിനോ സംഘത്തിനോ മേധാവിത്വം നല്‍കാത്ത വിധം വിഷയം കമീഷന്‍ പരിഗണിക്കുമെന്നും ആമുഖക്കുറിപ്പില്‍ പറഞ്ഞു.  ഈ വിഷയത്തില്‍ നിയമ കമീഷന്‍ പൊതുജനാഭിപ്രായം തേടുന്നത് ആദ്യമായാണ്.