കേരള സോഷ്യല്‍ സെന്‍റര്‍ ‘കേരളോത്സവം 2017’ ഈ മാസം 28,29,30 തിയ്യതികളില്‍ വൈകീട്ട് 5 മണി മുതല്‍ രാത്രി 11 മണി വരെ സെന്‍റര്‍ അങ്കണത്തില്‍ നടക്കും. 2018 മോഡല്‍ നിസാന്‍ സണ്ണി കാര്‍ ഒന്നാം സമ്മാനവും മറ്റ് ആകര്‍ഷകങ്ങളായ 100 സമ്മാനങ്ങളും അടങ്ങിയ നറുക്കെടുപ്പ് 30ന് ശനിയാഴ്ച രാത്രി നടത്തപ്പെടുന്നതാണ്. മൂന്നു ദിവസങ്ങളിലായി നടക്കുന്ന കേരളോത്സവത്തില്‍ നാടന്‍ തട്ടുകടകള്‍, മറ്റു വൈവിദ്ധ്യമാര്‍ന്ന ഭക്ഷണ ശാലകള്‍, പുസ്തക ശാലകള്‍, ശാസ്ത്ര പ്രദര്‍ശനം, മെഡിക്കല്‍ ക്യാമ്പ്, വിവിധ വാണിജ്യ സ്റ്റാളുകള്‍ തുടങ്ങിയവ ഉണ്ടാകും. നാടന്‍ പാട്ടുകള്‍, ഗാനമേള, സംഘ നൃത്തം, മാപ്പിള പാട്ടുകള്‍ തുടങ്ങിയ വിവിധ കലാപരിപാടികള്‍ മൂന്നു ദിവസങ്ങളിലായി അരങ്ങേറും. കൂടാതെ ആകര്‍ഷകങ്ങളായ സമ്മാനങ്ങള്‍ ഉള്ള ഇന്‍സ്റ്റന്‍റ് നറുക്കെടുപ്പ്, ഗൃഹാതുരത്വ ഓര്‍മ്മകള്‍ നിറഞ്ഞ ലേലം വിളികള്‍ തുടങ്ങി അക്ഷരാര്‍ത്ഥത്തില്‍ നാട്ടിലെ ഉത്സവ പ്രതീതി ഉണര്‍ത്തുന്ന മൂന്നു രാവുകളാവും കേരള സോഷ്യല്‍ സെന്‍ററില്‍.

കേരള സോഷ്യല്‍ സെന്‍റര്‍ ഏറ്റെടുത്തിരിക്കുന്ന നവീകരണ പ്രവര്‍ത്തനങ്ങള്‍ക്കുള്ള സാമ്പത്തിക സമാഹരണവും കൂടിയാണ് ഈ വര്‍ഷത്തെ കേരളോത്സവം.

പത്തു ദിര്‍ഹം വിലയുള്ള പ്രവേശന കൂപ്പണ്‍ മുഖേനയാണ് മൂന്നു ദിവസവും കേരളോത്സവത്തില്‍ പ്രവേശനം. ഈ പ്രവേശനകൂപ്പണുകളിലൂടെയാണ് മൂന്നാം ദിവസം നറുക്കെടുപ്പ് നടത്തുക.

മൂന്നു ദിവസങ്ങളിലായി പതിനായിരത്തോളം ആളുകള്‍ പങ്കെടുക്കുന്ന ഈ മഹോത്സവം കേരള സോഷ്യല്‍ സെന്‍ററിന്‍റെ ഏറ്റവും വലിയ ജനകീയ പരിപാടിയാണ്.