ദാവോസ്: താനൊരു രാഷ്ട്രീയക്കാരൻ അല്ലെന്നും അടുത്ത ലോക്സഭാ തെരഞ്ഞെടുപ്പിൽ കോൺഗ്രസ് അധികാരത്തിലെത്തിയാല്‍ കേന്ദ്ര ധനമന്ത്രിയാകുമെന്ന രീതിയിൽ പ്രചരിക്കുന്നത് അവാസ്തവം ആണെന്നും ആര്‍ബിഐ മുന്‍ ഗവര്‍ണര്‍ രഘുറാം രാജന്‍. രാഷ്ട്രീയത്തിൽ ഇല്ല എങ്കിലും എല്ലാ രാഷ്ട്രീയ നേതാക്കളുമായും സംവദിക്കാറുണ്ടെന്നും അദ്ദേഹം പറഞ്ഞു. ദാവോസില്‍ നടക്കുന്ന ലോക സാമ്പത്തിക ഫോറത്തില്‍ പങ്കെടുത്ത ശേഷം ഒരു ദേശീയ മാധ്യമത്തിനു നല്‍കിയ അഭിമുഖത്തിലാണ് രഘുറാം രാജന്‍ മനസുതുറന്നത്‌.

വരുന്ന ലോക്‌സഭാ തിരഞ്ഞെടുപ്പിനു ശേഷം സഖ്യസര്‍ക്കാര്‍ അധികാരത്തിലെത്തിയാല്‍ രാജ്യത്തിന്റെ സാമ്പത്തിക വളര്‍ച്ചയെ പ്രതികൂലമായി ബാധിക്കുമെന്ന് അദ്ദേഹം അഭിപ്രായപ്പെട്ടു. പുതിയ സർക്കാരിന് മുന്നിലുള്ളത് രാജ്യത്ത് കാര്‍ഷിക മേഖലയില്‍ നിലനില്‍ക്കുന്ന പ്രശ്‌നങ്ങള്‍ പരിഹരിക്കുക എന്നതാണ്. കഴിഞ്ഞ അഞ്ച് വര്‍ഷത്തിനുള്ളില്‍ വ്യക്തമായ സാമ്പത്തിക വളര്‍ച്ചയുണ്ടായിട്ടുണ്ട്. രാജ്യത്ത് കൂടുതല്‍ തൊഴിലവസരങ്ങള്‍ സൃഷ്ടിക്കപ്പെടണം. ഇപ്പോൾ തൊഴിലില്ലായ്മ നിലനില്‍ക്കുന്നുണ്ടെന്നും അദ്ദേഹം ചൂണ്ടിക്കാട്ടി. റിസര്‍വ് ബാങ്കിന്റെ ഭരണഘടനാപരമായ സ്വയംഭരണാവകാശം സംരക്ഷിക്കപ്പെടണം. ഊര്‍ജിത് പട്ടേൽ രാജിവെച്ചത് ഗൗരവത്തോടെ പരിഗണിക്കേണ്ട വിഷയമാണെന്നും അദ്ദേഹം ചൂണ്ടിക്കാട്ടി.