പൗരത്വ നിയമ ഭേദഗതി: കേരളത്തിന്റെ എതിര്‍പ്പും പ്രമേയവും നിലനില്‍ക്കുകയില്ലെന്ന് ഗവര്‍ണ്ണര്‍; ഗവര്‍ണ്ണക്കെതിരെ സര്‍ക്കാരും പ്രതിപക്ഷവും

paurathamകേന്ദ്ര സര്‍ക്കാരിന്റെ പൗരത്വ നിയമ ഭേദഗതി അംഗീകരിക്കില്ലെന്നും ഭരണഘടനാവിരുദ്ധവുമാണെന്ന് കേരളമടക്കം നിരവധി സംസ്ഥാനങ്ങള്‍ പ്രഖ്യാപിച്ചതോടെ വെട്ടിലായത് കേന്ദ്രം തന്നെ. ഈ ഭേദഗതിക്കെതിരെ കേരള നിയമസഭ പാസാക്കിയ പ്രമേയത്തിനെതിരെ ഗവര്‍ണര്‍ ആരിഫ് മുഹമ്മദ് ഖാൻ രംഗത്തു വന്നതോടെ വിഷയത്തിൽ വിവാദം കൊഴുത്തു. നിയമസഭ പാസാക്കിയ പ്രമേയം ഭരണഘടനാവിരുദ്ധമാണെന്നും നിയമസാധുതയില്ലെന്നുമാണ് ആരിഫ് മുഹമ്മദ് ഖാന്‍റെ പ്രസ്താവന. എന്നാൽ ഇതിനെതിരെ സംസ്ഥാന മന്ത്രിമാര്‍ തന്നെ രംഗത്തു വന്നതോടെ ഗവര്‍ണര്‍ ഒറ്റപ്പെട്ടു. കേന്ദ്രം പാസാക്കിയ നിയമം നടപ്പാക്കാൻ സംസ്ഥാനങ്ങള്‍ക്ക് ബാധ്യതയുണ്ടെന്നിരിക്കേ പ്രമേയം ഭരണഘടനാവിരുദ്ധമാണെന്നാണ് പ്രധാന ആരോപണം.

പൗരത്വ വിഷയത്തിൽ കേന്ദ്രസര്‍ക്കാരിനൊപ്പം ശക്തമായ നിലപാടെടുത്ത ഗവര്‍ണര്‍ ആരിഫ് മുഹമ്മദ് ഖാൻ കേരള നിയമസഭയുടെ പ്രമേയം ഭരണഘടനാവിരുദ്ധമാണെന്നാണ് അഭിപ്രായപ്പെട്ടത്. പ്രമേയത്തിന് നിയമസാധുതയും ഭരണഘടനാസാധുതയുമില്ലെന്നും ഇതിന് ഒരര്‍ത്ഥവും ഇല്ലെന്നും ഗവര്‍ണര്‍ മാധ്യമങ്ങളോട് പറഞ്ഞു. പൗരത്വം കേന്ദ്രത്തിന്‍റെ പരിധിയിൽ വരുന്ന വിഷയമാണെന്നും സംസ്ഥാനങ്ങള്‍ അവരുടെ അധികാരപരിധിയിൽ വരുന്ന കാര്യങ്ങള്‍ക്കായി സമയം ചെലവഴിക്കണമെന്നും ഗവര്‍ണര്‍ അഭിപ്രായപ്പെട്ടു. കേരളത്തിൽ അനധികൃത കുടിയേറ്റക്കാരില്ലെന്നും നിയമം കേരളത്തെ ഒരുതരത്തിലും ബാധിക്കില്ലെന്നും ഗവര്‍ണര്‍ വ്യക്തമാക്കി.

അതേസമയം, പാര്‍ലമെന്‍റ് പാസാക്കിയ നിയമം നടപ്പാക്കാൻ സംസ്ഥാനങ്ങള്‍ക്ക് ബാധ്യതയുണ്ടെന്നിരിക്കേ പ്രമേയത്തിന് പ്രത്യേകിച്ച് നിയമസാധുതയില്ലെന്നാണ് നിയമവിദഗ്ധര്‍ പറയുന്നത്. എന്നാൽ കേന്ദ്രം കൊണ്ടു വന്ന നിയമ ഭേദഗതിയ്ക്കെതിരെ സംസ്ഥാനത്ത് ഉയര്‍ന്ന വലിയ പ്രതിഷേധം കേന്ദ്രസര്‍ക്കാരിനു മുന്നിൽ അവതരിപ്പിക്കാനാണ് സര്‍ക്കാര്‍ പ്രമേയത്തിലൂടെ ലക്ഷ്യമിട്ടത്. പൗരത്വ വിഷയത്തിൽ പതിമൂന്നോളം സംസ്ഥാനങ്ങള്‍ കേന്ദ്രസര്‍ക്കാരിനെതിരെ രംഗത്തു വന്നിട്ടുണ്ടെങ്കിലും ഇത്തരത്തിൽ പ്രമേയം പാസാക്കുന്ന ആദ്യ സംസ്ഥാനം കേരളമാണ്.

എന്നാൽ പ്രമേയത്തെ ബിജെപി അംഗമായ ഒ രാജഗോപാലും എതിര്‍ക്കാതിരുന്നത് കൗതുകമായി. പ്രമേയത്തെ തന്‍റെ പ്രസംഗത്തിൽ ശക്തമായി എതിര്‍ത്തെങ്കിലും ഒ രാജഗോപാൽ പ്രമേയത്തിൽ വോട്ടെടുപ്പ് ആവശ്യപ്പെടുകയോ എതിര്‍ത്ത് വോട്ട് ചെയ്യുകയോ ചെയ്തില്ല. ഇതോടെ 140 അംഗങ്ങളും പ്രമേയം ഏകകണ്ഠമായി പാസാക്കിയെന്നായിരിക്കും രാഷ്ട്രപതിയ്ക്ക് മുൻപിൽ അവതരിപ്പിക്കപ്പെടുക. എന്നാൽ സഭയിലെ 139 അംഗങ്ങളും അനുകൂലിച്ചപ്പോള്‍ താൻ മാത്രം വോട്ടെടുപ്പ് ചോദിച്ച് അപഹാസ്യനാകേണ്ടെന്ന് കരുതിയാണ് ഇത് വേണ്ടെന്ന് വെച്ചതെന്നാണ് ഒ രാജഗോപാൽ പിന്നീട് മാധ്യമങ്ങളോട് പറഞ്ഞത്.

പൗരത്വ വിവാദം കത്തിയതോടെ പൗരത്വ രജിസ്റ്ററും പൗരത്വ ഭേദഗതിയും നടപ്പാക്കില്ലെന്ന് കേരള സര്‍ക്കാര്‍ നിലപാടെടുത്തിരുന്നു. ബിജെപി ഒഴികെയുള്ള സംസ്ഥാനത്തെ എല്ലാ പ്രമുഖ രാഷ്ട്രീയ പാര്‍ട്ടികളും പൗരത്വ നിയമ ഭേദഗതിയ്ക്കെതിരെ രംഗത്തു വന്നതോടെയാണ് നിയമസഭയിൽ പ്രമേയം പാസാക്കാൻ സാഹചര്യമൊരുങ്ങിയത്. വിഷയത്തിൽ മുഖ്യമന്ത്രി വിളിച്ച സര്‍വകക്ഷിയോഗത്തിനു പിന്നാലെയാണ് പ്രത്യേക മന്ത്രിസഭാ യോഗത്തിൽ പ്രമേയം പാസാക്കാൻ തീരുമാനിച്ചത്. യോഗത്തിൽ ബിജെപി പ്രതിനിധികളും ക്ഷണം സ്വീകരിച്ചെങ്കിലും ഇവര്‍ യോഗത്തിൽ നിന്ന് ഇറങ്ങിപ്പോയി.

കേരളത്തിനു പിന്നാലെ വിവിധ സംസ്ഥാനങ്ങളിൽ പൗരത്വ ഭേദഗതിയ്ക്കെതിരെ പ്രമേയം പാസാക്കാൻ ആവശ്യപ്പെട്ട് രാഷ്ട്രീയ കക്ഷികള്‍ രംഗത്തെത്തിയിട്ടുണ്ട്. കേരളത്തിനു സമാനമായ പ്രമേയം തമിഴ്നാട്ടിൽ പാസാക്കാനായി ഡിഎംകെ അധ്യക്ഷൻ എം കെ സ്റ്റാലിന്‍റെ നേതൃത്വത്തിൽ എംഎൽഎമാര്‍ നിയമസഭാ സെക്രട്ടറിയ്ക്ക് അപേക്ഷ നല്‍കി. മഹാരാഷ്ട്രയിൽ പ്രമേയം ചര്‍ച്ച ചെയ്ത് പാസാക്കാൻ പ്രത്യേക മന്ത്രിസഭായോഗം വിളിക്കണമെന്ന് സംസ്ഥാന കോൺഗ്രസ് ഉപാധ്യക്ഷൻ മുഹമ്മദ് ആരിഫ് നസീമും ആവശ്യപ്പെട്ടിട്ടുണ്ട്.



Print Friendly, PDF & Email

Please like our Facebook Page https://www.facebook.com/MalayalamDailyNews for all daily updated news

Related News

Leave a Comment