അഹമ്മദാബാദിലെ മോട്ടേര ക്രിക്കറ്റ് സ്റ്റേഡിയത്തില്‍ ഒരു ലക്ഷത്തിലധികം ആളുകളെ അഭിസംബോധന ചെയ്യുന്നതിന് മുമ്പ് യുഎസ് പ്രസിഡന്‍റ് ഡൊണാള്‍ഡ് ട്രംപ് തിങ്കളാഴ്ച (ഫെബ്രുവരി 24) സബര്‍മതി ആശ്രമം സന്ദര്‍ശിക്കും. ഇന്ത്യയുടെ അഹിംസാ സ്വാതന്ത്ര്യസമരത്തിന് മഹാത്മാഗാന്ധി നേതൃത്വം നല്‍കിയ സ്ഥലമാണ് സബര്‍മതി ആശ്രമം.

അഹമ്മദാബാദിലെ മോട്ടേര സ്റ്റേഡിയത്തില്‍ നടക്കാനിരിക്കുന്ന ‘നമസ്തേ ട്രംപ്’ പരിപാടിക്ക് മുമ്പ് ഡൊണാള്‍ഡ് ട്രംപ് സബര്‍മതി ആശ്രമത്തില്‍ കുറച്ച് സമയം ചെലവഴിക്കുമെന്ന് ഔദ്യോഗിക വൃത്തങ്ങള്‍ അറിയിച്ചു. വാസ്തവത്തില്‍, കഴിഞ്ഞ കുറച്ച് ദിവസങ്ങളായി ട്രംപ് സബര്‍മതി ആശ്രമത്തിലേക്ക് പോകുമോ ഇല്ലയോ എന്ന കാര്യത്തില്‍ ആശയക്കുഴപ്പം ഉണ്ടായിരുന്നു. അമേരിക്കന്‍ പ്രസിഡന്‍റിന്‍റെ സന്ദര്‍ശനത്തിന് മുമ്പ് പ്രാദേശിക അധികൃതര്‍ ആശ്രമം അലങ്കരിച്ചിട്ടുണ്ട്. അടുത്ത കാലത്തായി ചൈനീസ് പ്രസിഡന്‍റ് സിന്‍ ജിന്‍പിംഗ്, ജാപ്പനീസ് പ്രധാനമന്ത്രി ഷിന്‍സോ അബെ എന്നിവരുള്‍പ്പെടെ നിരവധി ലോക നേതാക്കള്‍ സബര്‍മതി ആശ്രമം സന്ദര്‍ശിച്ചിരുന്നു.

ഫെബ്രുവരി 24 ന് ഏകദിന സന്ദര്‍ശനത്തിനിടെ യുഎസ് പ്രസിഡന്‍റ് ഡൊണാള്‍ഡ് ട്രംപ് സബര്‍മതി ആശ്രമം സന്ദര്‍ശിക്കുമോ എന്ന് വൈറ്റ് ഹൗസ് തീരുമാനിക്കണമെന്ന് ഗുജറാത്ത് മുഖ്യമന്ത്രി വിജയ് രൂപാനി വെള്ളിയാഴ്ച (ഫെബ്രുവരി 21) പറഞ്ഞിരുന്നു. കഴിഞ്ഞ രണ്ട് ദിവസമായി യുഎസ് പ്രസിഡന്‍റ് സബര്‍മതി ആശ്രമം സന്ദര്‍ശിക്കില്ലെന്ന അഭ്യൂഹങ്ങള്‍ക്ക് പിന്നാലെയാണ് രൂപാനിയുടെ പ്രസ്താവന. മഹാത്മാഗാന്ധിക്ക് സബര്‍മതി ആശ്രമവുമായി ആഴത്തിലുള്ള ബന്ധം ഉണ്ടായിരുന്നു.

ഗുജറാത്ത് യാത്രയില്‍ ഇന്ത്യയുടെ സാംസ്കാരിക വൈവിധ്യത്തെക്കുറിച്ച് ട്രംപിന് നേര്‍ക്കാഴ്ച ലഭിക്കും. ട്രംപിന്‍റെയും പ്രധാനമന്ത്രി നരേന്ദ്ര മോദിയുടെയും സംയുക്ത പ്രസംഗത്തില്‍ തിങ്കളാഴ്ച (ഫെബ്രുവരി 24) റോഡ്ഷോയിലും അഹമ്മദാബാദിലെ ക്രിക്കറ്റ് സ്റ്റേഡിയത്തിലും ഇന്ത്യയുടെ സാംസ്കാരിക വൈവിധ്യവും സമ്പന്ന പാരമ്പര്യങ്ങളും പ്രദര്‍ശിപ്പിക്കും. ഗുജറാത്തിലെ ചരിത്രപരമായ സ്ഥലങ്ങളുടെ തനിപ്പകര്‍പ്പുകള്‍ റോഡ് ഷോയില്‍ റോഡരികില്‍ സ്ഥാപിക്കും.

റോഡ്ഷോയില്‍ 28 സംസ്ഥാനങ്ങളില്‍ നിന്നുള്ള കലാകാരന്മാര്‍ പങ്കെടുക്കും
റോഡ് ഷോ റൂട്ടിലൂടെ നഗരത്തിലെ മോട്ടേര പ്രദേശത്ത് പുതുതായി നിര്‍മ്മിച്ച ക്രിക്കറ്റ് സ്റ്റേഡിയത്തില്‍ ഗുജറാത്ത് ഉള്‍പ്പടെ രാജ്യത്തിന്‍റെ വിവിധ ഭാഗങ്ങളില്‍ നിന്നുള്ള ഡാന്‍സ് ഗ്രൂപ്പുകളും ഗായകരും പരിപാടികള്‍ അവതരിപ്പിക്കുമെന്ന് അധികൃതര്‍ അറിയിച്ചു. 28 സംസ്ഥാനങ്ങളില്‍ നിന്നുള്ള ആര്‍ട്ടിസ്റ്റുകള്‍ക്ക് റോഡ്ഷോ റൂട്ടിലൂടെ നിര്‍മ്മിച്ച പ്ലാറ്റ്ഫോമുകള്‍ അനുവദിച്ചിട്ടുണ്ട്. ഈ റോഡ്ഷോയില്‍ റോഡിന്‍റെ ഇരുവശത്തും നില്‍ക്കുന്ന ആളുകള്‍ രണ്ട് നേതാക്കളെയും സ്വാഗതം ചെയ്യും. പരമ്പരാഗത ഗുജറാത്തി നൃത്തമായ ഗര്‍ബയും വേദിയില്‍ ഉണ്ടായിരിക്കുമെന്ന് അധികൃതര്‍ അറിയിച്ചു. ഈ അവതരണങ്ങള്‍ രാജ്യത്തിന്‍റെ വൈവിധ്യമാര്‍ന്ന സംസ്കാരത്തിന്‍റെ നേര്‍ക്കാഴ്ച നല്‍കുമെന്ന് അധികൃതര്‍ പറഞ്ഞു.

ബോളിവുഡ് ഗായകരും അവതരിപ്പിക്കും
നാടോടി നൃത്തങ്ങള്‍ക്കു പുറമെ ബോളിവുഡ് ഗായകരും മോട്ടേര സ്റ്റേഡിയത്തില്‍ നടക്കുന്ന ‘നമസ്തെ ട്രംപ്’ പ്രോഗ്രാമിനായി രൂപകല്‍പ്പന ചെയ്ത വേദിയില്‍ അവതരിപ്പിക്കും. ട്രംപും മോദിയും മോട്ടേര സ്റ്റേഡിയത്തില്‍ ഒരു ലക്ഷത്തിലധികം ആളുകളെ അഭിസംബോധന ചെയ്യും. ബോളിവുഡ് ഗായകരായ കൈലാഷ് ഖേര്‍, പാര്‍ത്ഥീവ് ഗോഹില്‍, കീര്‍ത്തിദാന്‍ ഗാദ്‌വി, ഗീത റബാരി, പുരുഷോത്തം ഉപാധ്യായ, സൈറം ഡേവ് എന്നിവര്‍ സ്റ്റേഡിയത്തില്‍ പ്രകടനം നടത്തുമെന്ന് ഗുജറാത്ത് ക്രിക്കറ്റ് അസോസിയേഷന്‍ അധികൃതര്‍ അറിയിച്ചു. സാംസ്കാരിക പരിപാടിയില്‍ അവതരണത്തിനായി വിവിധ സര്‍ക്കാര്‍, സ്വകാര്യ സ്കൂളുകളിലെ വിദ്യാര്‍ത്ഥികളെയും സമീപിച്ചിട്ടുണ്ടെന്ന് ഒരു ഉദ്യോഗസ്ഥന്‍ പറഞ്ഞു. പ്രോഗ്രാമിന് ഒരാഴ്ച മുമ്പ് ഈ വിദ്യാര്‍ത്ഥികളോട് പരിശീലനം നടത്താന്‍ ആവശ്യപ്പെട്ടിരുന്നു.

റോഡ് ഷോയിലേക്കുള്ള യാത്രാമധ്യേ ഗുജറാത്തിലെ ചരിത്ര സ്മാരകങ്ങളുടെ തനിപ്പകര്‍പ്പുകള്‍ റോഡിന്റെ ഇരുശങ്ങളില്‍ സ്ഥാപിച്ചിട്ടുണ്ട്. ട്രംപിനെ സ്വാഗതം ചെയ്യുന്നതിനു പുറമേ, പ്രധാനമന്ത്രി നരേന്ദ്ര മോദിയുടെ ജന്മനാടായ വദ്‌നഗറില്‍ ഗുജറാത്തിലെ മഹേശാന ജില്ലയിലെ അഹമ്മദാബാദ് വിമാനത്താവളത്തിന് പുറത്ത് പന്ത്രണ്ടാം നൂറ്റാണ്ടിലെ ‘കീര്‍ത്തി തോരണ’ത്തിന്റെ കട്ടൗട്ട് സ്ഥാപിച്ചിട്ടുണ്ട്.