ചിക്കാഗോ: ചിക്കാഗോയില്‍ നിന്നുള്ള പ്രമുഖ സംഘടനാ നേതാവും ചിക്കാഗോ മിഡ്‌വെസ്റ്റ് റീജിയണില്‍ രാഷ്ട്രീയ സാമൂഹിക രംഗത്ത് തനതായ വ്യക്തിമുദ്ര പതിപ്പിച്ച സതീശന്‍ നായര്‍ ഫൊക്കാനയുടെ 2020-22 വര്‍ഷത്തെ ഭരണസമിതിയില്‍ നാഷണല്‍ കമ്മിറ്റി അംഗമായി മത്സരിക്കുന്നു. ആദ്യത്തെ കേരള ലോക്സഭാ അംഗമായിരുന്ന സതീശന്‍ നായര്‍ ജോര്‍ജി വര്‍ഗീസ് നേതൃത്വം നല്‍കുന്ന ടീമില്‍ നിന്നായിരിക്കും മത്സരിക്കുക.

മിഡ്‌വെസ്റ്റ് മലയാളി അസ്സോസിയേഷനെ പ്രതിനിധീകരിക്കുന്ന അദ്ദേഹം അസ്സോസിയേഷന്‍റെ മുന്‍ പ്രസിഡണ്ടും ട്രസ്റ്റീ ബോര്‍ഡ് ചെയര്‍മാന്‍, ട്രസ്റ്റീ ബോര്‍ഡ് മെമ്പര്‍ എന്നീ പദവികളും വഹിച്ചിട്ടുണ്ട്. കേരള ഹിന്ദൂസ് ഓഫ് നോര്‍ത്ത് അമേരിക്ക (കെ.എച്ച്.എന്‍.എ) മുന്‍ വൈസ് പ്രസിഡണ്ടായിരുന്ന അദ്ദേഹം ഇപ്പോള്‍ ട്രസ്റ്റീ ബോര്‍ഡ് മെമ്പര്‍ ആണ്. എ വി ഏവിയേഷനില്‍ സീനിയര്‍ എഞ്ചിനീയര്‍ ആയ സതീശന്‍ നായര്‍ കോട്ടയം ഏറ്റുമാനൂര്‍ സ്വദേശിയാണ്.

ഫൊക്കാനയുടെ അഡിഷണല്‍ അസോസിയേറ്റ് ട്രഷറര്‍ ആയ വിജി എസ്. നായര്‍ ആണ് ഭാര്യ. വരുണ്‍ നായര്‍, നിത്യ നായര്‍ എന്നിവര്‍ മക്കളാണ്.

ഫൊക്കാനയുടെ ചിക്കാഗോ മിഡ്‌വെസ്റ്റ് മേഖലയില്‍ നിന്ന് ഏറ്റവും അനുഭവസമ്പത്തുള്ള കരുത്തനായ നേതാവ് സതീശന്‍ നായരുടെ നാഷണല്‍ കമ്മിറ്റിയിലേക്കുള്ള സ്ഥാനാര്‍ത്ഥിത്വം ഫൊക്കാനയ്ക്കും തങ്ങളുടെ ടീമിനും ഏറേ കരുത്തേകുമെന്നും കേരള ലോക്‌സഭയില്‍ പ്രതിനിധീകരിച്ച ഫൊക്കാന നേതാവെന്ന നിലയിലുള്ള അനുഭവ സമ്പത്തും ചിക്കാഗോ മലയാളികളുടെ സ്വാധീനവും തങ്ങളുടെ ടീമിന്‍റെ കെട്ടുറപ്പിനും വിജയത്തിനും കരുത്തേകുമെന്നും ഫൊക്കാനാ പ്രസിഡന്‍റ് സ്ഥാനാര്‍ഥി ജോര്‍ജി വര്‍ഗീസ് പ്രസ്താവിച്ചു.