Flash News

പാര്‍ക്കുകള്‍ ശനിയാഴ്ച തുറക്കുന്നു, സമ്മര്‍ദ്ദത്തില്‍ നിന്നും മോചനം, ന്യൂജേഴ്‌സിക്ക് പുതുജീവന്‍

April 30, 2020 , ജോര്‍ജ് തുമ്പയില്‍

4-30 bannerന്യൂജേഴ്‌സി: പകര്‍ച്ചവ്യാധി കൊണ്ടുള്ള മരണനിരക്കില്‍ വ്യതിയാനമുണ്ടെങ്കിലും ബുധനാഴ്ച സംസ്ഥാന ഉദ്യോഗസ്ഥര്‍ കുറഞ്ഞത് 6,770 മരണങ്ങളും 116,264 കേസുകളും റിപ്പോര്‍ട്ട് ചെയ്തു. അതേസമയം, ലോക്ക്ഡൗണിനു വേണ്ടി നാലാഴ്ച കാത്തിരിക്കണമെന്ന് പറഞ്ഞ ഗവര്‍ണര്‍ ഫില്‍ മര്‍ഫി ഇന്നലെ വാക്കുമാറ്റി. ന്യൂജേഴ്‌സിയിലെ സംസ്ഥാന പാര്‍ക്കുകളും വനങ്ങളും വീണ്ടും തുറക്കുമെന്നും കൗണ്ടി പാര്‍ക്കുകളും ഗോള്‍ഫ് കോഴ്‌സുകളും വീണ്ടും തുറക്കാന്‍ അനുവദിക്കുമെന്നും ഗവര്‍ണര്‍ മര്‍ഫി ബുധനാഴ്ച പ്രഖ്യാപിച്ചു. ശനിയാഴ്ച രാവിലെ മുതല്‍ കര്‍ശനമായ വ്യവസ്ഥകളോടെയാണ് ഇതു തുറക്കുന്നത്. ഗാര്‍ഡന്‍ സ്‌റ്റേറ്റില്‍ വൈറസ് വ്യാപിക്കുന്നത് മന്ദഗതിയിലാക്കാനുള്ള ലോക്ക്ഡൗണ്‍ ഓര്‍ഡറുകള്‍ നീക്കംചെയ്യാനുള്ള മര്‍ഫിയുടെ ആദ്യ പ്രധാന നീക്കമാണിത്. പാര്‍ക്കുകളിലെ കളിസ്ഥലങ്ങളും വിശ്രമമുറികളും പോലുള്ളവ പരിധിക്ക് പുറത്തായിരിക്കുമെന്നും സന്ദര്‍ശകരും ഗോള്‍ഫ് കളിക്കാരും സാമൂഹിക അകലം പാലിക്കുന്നത് തുടരണമെന്നും മുഖംമൂടി ധരിക്കാന്‍ എല്ലാവരേയും ‘ശക്തമായി’ പ്രോത്സാഹിപ്പിക്കുമെന്നും അദ്ദേഹം പറഞ്ഞു. ആളുകള്‍ ഇത് പാലിക്കുന്നില്ലെങ്കില്‍ തീരുമാനം മാറ്റാനുള്ള അവകാശം തനിക്കുണ്ടെന്നും ഗവര്‍ണര്‍ മര്‍ഫി പറഞ്ഞു.

ട്രെന്‍ടണില്‍ നടന്ന പ്രതിദിന മാധ്യമസമ്മേളനത്തില്‍ ഗവര്‍ണര്‍ ഫില്‍ മര്‍ഫി 329 പുതിയ മരണങ്ങളും 2,481 പുതിയ പോസിറ്റീവ് ടെസ്റ്റുകളും പ്രഖ്യാപിച്ചു. ഒന്നാം ലോകമഹായുദ്ധം, കൊറിയന്‍ യുദ്ധം, വിയറ്റ്‌നാം യുദ്ധം, ഗള്‍ഫ് യുദ്ധങ്ങള്‍, ഇറാഖിലെയും അഫ്ഗാനിസ്ഥാനിലെയും യുദ്ധങ്ങള്‍, സാന്‍ഡി ചുഴലിക്കാറ്റ്, സെപ്റ്റംബര്‍ 11 എന്നിവയില്‍ മരിച്ച ന്യൂജേഴ്‌സി നിവാസികളുടെ എണ്ണത്തേക്കാള്‍ കൂടുതലാണ് ഇപ്പോഴത്തെ മരണനിരക്കെന്നു ഗവര്‍ണര്‍ മര്‍ഫി പറഞ്ഞു.

‘വരും ആഴ്ചകളില്‍ നാമെല്ലാവരും കര്‍ശനമായി സാമൂഹിക അകലം പാലിക്കുന്നതു തുടരുകയാണ് ന്യൂജേഴ്‌സി സംസ്ഥാനത്തിനു പഴയ അവസ്ഥയിലേക്ക് തിരികെ പോകാനുള്ള ഏക മാര്‍ഗ്ഗം,’ മര്‍ഫി കൂട്ടിച്ചേര്‍ത്തു. ‘നമ്മുടെ സംസ്ഥാനത്തെ മിക്ക സ്ഥലങ്ങളിലും മാത്രമല്ല, എല്ലാ സ്ഥലങ്ങളിലും കോവിഡ് 19 പരാജയപ്പെടുന്നത് നാം കാണേണ്ടതുണ്ട്.’ അദ്ദേഹം പറഞ്ഞു.

ബ്രീഫിംഗിന് തൊട്ടുമുന്‍പാണ് മര്‍ഫി തന്റെ ലോക്ക്ഡൗണ്‍ കൊറോണ വൈറസ് നിയന്ത്രണങ്ങള്‍ പിന്‍വലിക്കാനുള്ള ആദ്യത്തെ പ്രധാന പ്രഖ്യാപനം നടത്തിയത്. കൊറോണ വൈറസിനായി 216,000 ല്‍ അധികം താമസക്കാരെ ഇന്നുവരെ പരീക്ഷിച്ചു, 42% പേര്‍ പോസിറ്റീവ് പരീക്ഷിച്ചു.

ന്യൂജേഴ്‌സിയില്‍ വൈറസ് ബാധിച്ച് ആശുപത്രിയില്‍ പ്രവേശിപ്പിച്ചവരുടെ എണ്ണം ചൊവ്വാഴ്ച രാത്രിയോടെ 15 ദിവസത്തെ ഇടിവാണ് കാണിക്കുന്നത്. കൊറോണ വൈറസ് കേസുകളുള്ള രോഗികള്‍ 6,289 പേരാണ് വിവിധ ആശുപത്രികളിലുള്ളത്. ഏപ്രില്‍ 14 ന് ഉണ്ടായിരുന്ന 8,293 രോഗികളില്‍ നിന്ന് 24% കുറഞ്ഞു. സംസ്ഥാനത്ത് സൈറ്റുകള്‍ രോഗലക്ഷണമുള്ള താമസക്കാരെ മാത്രമേ പരീക്ഷിക്കുന്നുള്ളൂ, പരിശോധനാ ഫലങ്ങള്‍ ദിവസങ്ങളോളം പിന്നോട്ട് പോകാം, കൂടാതെ സംസ്ഥാനത്ത് പരിശോധനയില്‍ കാര്യമായ വര്‍ദ്ധനവ് റിപ്പോര്‍ട്ട് ചെയ്യാത്തതിനാല്‍ സംസ്ഥാനത്ത് എത്രത്തോളം വൈറസ് പടര്‍ന്നിട്ടുണ്ടെന്ന് കൃത്യമായി പറയാന്‍ പ്രയാസമാണ്.

ന്യൂജേഴ്‌സിക്ക് ആഴ്ചകളോളം ലോക്ക്ഡൗണ്‍ ആയിരിക്കുമെന്ന് ഗവര്‍ണര്‍ തിങ്കളാഴ്ച പറഞ്ഞെങ്കിലും ഇത് മാസങ്ങളോളം വ്യാപിക്കാന്‍ സാധ്യതയില്ല. ബുധനാഴ്ച രാവിലെ വരെ, ലോകമെമ്പാടുമുള്ള 3.1 ദശലക്ഷത്തിലധികം ആളുകള്‍ വൈറസ് ബാധിതരാണെന്ന് ജോണ്‍സ് ഹോപ്കിന്‍സ് സര്‍വകലാശാലയുടെ കണക്കുകള്‍ വ്യക്തമാക്കുന്നു. അമേരിക്കയില്‍ 1,064,572 പേര്‍ക്ക് രോഗബാധയുണ്ട്. 61699 പേര്‍ മരിച്ചു. 18671 ഗുരുതരാവസ്ഥയിലുണ്ട്. രോഗം ഭേദമായവര്‍ 147,411 പേരുണ്ട്.

ഗൃഹാതുരത്വം ഉണര്‍ത്തുന്ന ന്യൂവാര്‍ക്കില്‍ നിന്നും ഹൃദയപൂര്‍വ്വം
Newark Public Libraryലോകത്തിലെ ക്രിമിനല്‍ കേന്ദ്രങ്ങളിലൊന്നാണെങ്കിലും (മാറ്റങ്ങള്‍ കണ്ടു തുടങ്ങിയിട്ടുണ്ട്.) ന്യൂവാര്‍ക്ക് നഗരം ലേഖകന് പ്രിയപ്പെട്ടതാണ്. പൗരോഹിത്യ ശുശ്രൂഷയില്‍ 60 വര്‍ഷങ്ങള്‍ പിന്നിട്ട നല്ല ശമരിയക്കാരനായ ഫാ. മാത്യു കുന്നത്തിന്റെ സഹായത്താല്‍ അമേരിക്കയിലെത്തിയപ്പോള്‍, ആദ്യം താമസിച്ചതും ജീവിതം കരുപിടിപ്പിച്ചതും ഈ കോസ്‌മോപോളിറ്റന്‍ നഗരത്തില്‍ വെച്ചാണ്. കുഞ്ഞുങ്ങളുടെ പ്രാഥമിക വിദ്യാഭ്യാസങ്ങളും സെന്റ് ജയിംസ് ആശുപത്രിയിലെ (ഇന്നില്ല-അടച്ചു പോയി. അവിടുത്തെ ചാപ്ലെയ്ന്‍ ആയിരുന്നു മാത്യു അച്ചന്‍) ഭാര്യയുടെ ജോലി, ജീവസന്ധാരണത്തിന്റെ പുതിയ അധ്യായത്തില്‍ റെസ്പിറ്റോറി തെറാപ്പി എന്ന കേട്ടുകേഴ്‌വി പോലുമില്ലാതിരുന്ന ഒരു പ്രൊഫഷണലിലേക്കുള്ള ബാലപാഠങ്ങള്‍ അഭ്യസിച്ച യൂണിവേഴ്‌സിറ്റി ഓഫ് മെഡിസിന്‍ ആന്റ് ഡെന്റിസ്ട്രി (യുഎംഡി)യുടെ സ്‌കൂള്‍ ഓഫ് ഹെല്‍ത്ത് റിലേറ്റഡ് പ്രൊഫഷന്‍സ് തുടങ്ങി ന്യൂവാര്‍ക്ക് എന്ന നഗരം ഹൃദയത്തോടെ ചേര്‍ത്തുപിടിച്ചു അന്ന്. 28 വര്‍ഷങ്ങള്‍ക്കു ശേഷവും അങ്ങിനെതന്നെ, ഒരു മാറ്റവുമില്ലാതെ. ഈ ഇഴയടുപ്പത്തിന് ഒരു ഉദാഹരണം പറയാം. വന്ന സമയത്ത് തലമുടി വെട്ടാന്‍ നാല് അഞ്ച് ബാര്‍ബര്‍ ഷോപ്പുകളില്‍ (യൂണിസെക്‌സ് സലൂണ്‍ എന്നായിരുന്നു അന്നത്തെ ബോര്‍ഡ് എന്നാണ് ഓര്‍മ്മ-കൗതുകകരമായ തോന്നിയ സൈന്‍ ബോര്‍ഡ്) പോയെങ്കിലും ഫെറി സ്ട്രീറ്റിന് കോണോടു ചേര്‍ന്നു കിടക്കുന്ന ജഫേഴ്‌സണ്‍ സ്ട്രീറ്റിലെ മരിയാല്‍വാസ് എന്ന് പോര്‍ട്ടുഗീസ് ബാര്‍ബര്‍ഷോപ്പിലെ തലമുടി വെട്ടലാണ് മനസിന് ഇഷ്ടപ്പെട്ടത്. അന്റോണിയോ മരിയാല്‍വാസും ഭാര്യയുമാണ് വെട്ടുകാര്‍. ഈ കഥ ചുരുക്കട്ടെ. ന്യൂവാര്‍ക്കില്‍ നിന്നും വെസ്റ്റ് ഓറഞ്ചിലൂടെ, ഈസ്റ്റ് ഹാനോവറില്‍ എത്തി നങ്കൂരമിട്ട് 28 വര്‍ഷങ്ങള്‍ക്ക് ശേഷം ഇപ്പോഴും എല്ലാ മാസവും (നാട്ടില്‍ പോകുന്ന സമയത്ത് മാത്രം പോയിട്ടില്ല) മരിയാല്‍വാസിലേക്ക് 40 മൈല്‍ വണ്ടിയോടിച്ച് തലമുടി വെട്ടാന്‍ പോകുന്നു എന്നു പറയുമ്പോള്‍ ന്യൂവാര്‍ക്കിനോടുള്ള അഭിനിവേശം മനസിലാക്കുമല്ലോ. തലമുടി വെട്ടാന്‍ പോകുമ്പോള്‍ അച്ചട്ടായി ചെയ്യുന്ന മറ്റു ചില കാര്യങ്ങളുണ്ട്- ഫെറി സ്ട്രീറ്റിലൂടെ വെറുതേ ഒരു നടത്തം, എബിസി സ്റ്റോറില്‍ ഒരു ചെറിയ ഷോപ്പിങ്, സീബ്രാസ് സൂപ്പര്‍ മാര്‍ക്കറ്റില്‍ ഒരു ഗ്രോസറി ഷോപ്പിംഗും. വൃത്തിയാക്കിയ ഫ്രെഷ് ചിക്കന്‍ ഇത്രയും വിലക്കുറവില്‍ ന്യൂജേഴ്‌സിയില്‍ മറ്റൊരിടത്തും ലഭിക്കുകയില്ല. പിന്നെ, പച്ചക്കപ്പ, ചേമ്പ്, ഉണക്കമീന്‍ മുതലായ ഗൃഹാതുരത്വം ഉണര്‍ത്തുന്ന മറ്റ് പലതും. ഏറ്റവും ഒടുവില്‍ എലം സ്ട്രീറ്റിലെ ബാര്‍ബിക്യൂ കടയില്‍നിന്നും ഒരു പാഴ്‌സലും വാങ്ങി മടക്കം.
ഇപ്പോഴിങ്ങനെ ഒക്കെ ഓര്‍ക്കാന്‍ കാരണം എന്താണെന്നല്ലേ? ന്യൂജേഴ്‌സിയിലെ കൊറോണ വൈറസിന്റെ പ്രഭവകേന്ദ്രമായി (ടീനെക്ക്/ ബര്‍ഗന്‍ഫീല്‍ഡിനൊപ്പം) ന്യൂവാര്‍ക്കും ചരിത്രത്തില്‍ ഇടം പിടിക്കുമ്പോള്‍ ന്യൂവാര്‍ക്കിന്റെ ഹൃദയഭാഗത്ത് സ്ഥിതി ചെയ്യുന്ന ബെത്ത് ഇസ്രയേല്‍ മെഡിക്കല്‍ സെന്ററില്‍ കൊറോണയുടെ പിടിയിലമര്‍ന്ന അനേകരെ ശുശ്രൂഷിക്കാന്‍ അവസരം ഒരുങ്ങിയപ്പോള്‍ ഇതൊരു നിയോഗമായി എത്രയോ വര്‍ഷങ്ങള്‍ക്ക് മുന്‍പ് തന്നെ എഴുതി വച്ചിരുന്നതായി തോന്നുന്നു. എത്രയോ തവണ സന്ദര്‍ശിച്ചിട്ടുള്ള ന്യൂവാര്‍ക്ക് പബ്ലിക്ക് ലൈബ്രറി, നഗരവാസികളോട് ഒരു കാര്യം ആവശ്യപ്പെടുന്നു. അത് ഏതാണ്ട് ഇങ്ങനെയാണ്, ‘ഈ കൊറോണ കാലം ഡോക്യുമെന്റ് ചെയ്യാന്‍ ഞങ്ങള്‍ ഉദ്ദേശിക്കുന്നു. ഞങ്ങള്‍ക്കു നല്‍കുവാനായി നിങ്ങളുടെ കൈയില്‍ ഒരു ചിത്രമോ, വീഡിയോയോ, അതുമല്ലെങ്കില്‍ നല്ല വാക്കുകളോടു കൂടിയ ഒരു ലേഖനമുണ്ടോ? അതു ഞങ്ങള്‍ക്ക് ആവശ്യമുണ്ട്.’

Seabras Newarkകൊറോണ വൈറസ് പാന്‍ഡെമിക് അവസാനിക്കുമ്പോള്‍ പ്രദര്‍ശിപ്പിക്കാനായാണ് ന്യൂവാര്‍ക്ക് ലൈബ്രറി ഇത്തരമൊരു ശേഖരം നടത്തുന്നത്. നല്ല ലേഖനങ്ങള്‍, ഫോട്ടോകള്‍, വീഡിയോകള്‍ അല്ലെങ്കില്‍ ഡ്രോയിംഗുകളാണ് ഇവര്‍ ശേഖരിക്കുന്നത്. ന്യൂവാര്‍ക്കിന്റെ അയണ്‍ബൗണ്ട് ഏരിയായിലെ സീബ്ര സൂപ്പര്‍ മാര്‍ക്കറ്റില്‍ പ്രവേശിക്കാന്‍ വരിയില്‍ നില്‍ക്കുമ്പോള്‍ ഷോപ്പര്‍മാര്‍ സാമൂഹിക അകലം പാലിച്ച് ആറടി അകലെ നില്‍ക്കാന്‍ ശ്രമിക്കുന്നതു പോലെയുള്ള കൊറോണ ചിത്രങ്ങളെയാണ് അവര്‍ ഉദ്ദേശിക്കുന്നതെന്ന് ലൈബ്രറിയുടെ ഡയറക്ടര്‍ ടോം അങ്ക്‌നര്‍ പറഞ്ഞു. ‘ഞങ്ങള്‍ ഇത് മുമ്പ് ചെയ്തിട്ടില്ല. ഇന്നത്തെ ആളുകള്‍ക്ക് താല്‍പ്പര്യമുണര്‍ത്തുന്ന ഒരു നിമിഷത്തിന്റെ സ്‌നാപ്പ്‌ഷോട്ട് സൃഷ്ടിക്കുന്നതിനുള്ള ഒരു നല്ല മാര്‍ഗമാണിത്, എന്നാല്‍ ഇപ്പോള്‍ മുതല്‍ 20 മുതല്‍ 30 വര്‍ഷം വരെ ഗവേഷകര്‍ക്ക് ഞങ്ങള്‍ ശേഖരിക്കുന്ന ഈ വസ്തുക്കള്‍ ഉപയോഗിക്കാന്‍ കഴിയും.’ അദ്ദേഹം പറഞ്ഞു.
ചാള്‍സ് എഫ്. കമ്മിംഗ്‌സ് ന്യൂജേഴ്‌സി ഇന്‍ഫര്‍മേഷന്‍ സെന്ററിനടുത്താണ് ഈ ലൈബ്രറി.

കൊറോണ വൈറസ് അവശേഷിച്ച അനുഭവങ്ങളുടെ വലിയ ഈ ശേഖരം സമീപഭാവിയില്‍ പൊതുജനങ്ങള്‍ക്ക് ലഭ്യമാക്കുമെന്നും ചരിത്ര ഗവേഷണത്തിനായി നിലനിര്‍ത്തുമെന്നും അങ്ക്‌നര്‍ പറഞ്ഞു. ന്യൂവാര്‍ക്കില്‍ താമസിക്കുന്ന, ജോലി ചെയ്യുന്ന അല്ലെങ്കില്‍ സ്‌കൂളില്‍ പോകുന്നവര്‍ക്കായി എഴുതിയ ഓരോ ഓര്‍മ്മയും പാന്‍ഡെമിക് സമയത്ത് അവരുടെ വ്യക്തിപരമായ അനുഭവങ്ങള്‍ വിവരിക്കുന്നതായിരിക്കണം. ഇത് 1,500 വാക്കുകളില്‍ കൂടുതലാകരുത്. അടിക്കുറിപ്പ് നല്‍കിയ ഫോട്ടോകള്‍ സ്വാഗതം ചെയ്യുന്നു, അഞ്ച് മിനിറ്റില്‍ കൂടാത്ത ഹ്രസ്വ വീഡിയോകളും.

Social distancing at Seabras Newarkയൂണിയന്‍ ടൗണ്‍ഷിപ്പ് ലൈബ്രറി ആന്‍ഡ് ഹിസ്‌റ്റോറിക്കല്‍ സൊസൈറ്റി, മോണ്‍മൗത്ത് കൗണ്ടി ഹിസ്‌റ്റോറിക്കല്‍ അസോസിയേഷന്‍, ടക്കര്‍ട്ടണ്‍ പോര്‍ട്ട് എന്നിവയും സമാനമായ പ്രോജക്ടുകള്‍ ചെയ്യുന്നുണ്ടെന്ന് അങ്ക്‌നര്‍ പറഞ്ഞു. ഇങ്ങനെ നല്‍കുന്നതില്‍ പേര്, പ്രായം, നിങ്ങള്‍ ഉള്‍പ്പെടുത്താന്‍ ആഗ്രഹിക്കുന്ന നിങ്ങളെക്കുറിച്ചുള്ള മറ്റേതെങ്കിലും വിവരങ്ങള്‍ എന്നിവ ഉണ്ടായിരിക്കണം. എന്‍ട്രികള്‍ മെയ് 31 നകം ചാള്‍സ് എഫ്. കമ്മിംഗ്‌സ് ന്യൂജേഴ്‌സി ഇന്‍ഫര്‍മേഷന്‍ സെന്റര്‍, ന്യൂവാര്‍ക്ക് പബ്ലിക് ലൈബ്രറി, 5 വാഷിംഗ്ടണ്‍ സ്ട്രീറ്റ്, പിഒ ബോക്‌സ് 630, ന്യൂവാര്‍ക്ക്, എന്‍ജെ 07101.

ഫണ്ടിങ് ഫോര്‍മുല തെറ്റിയെന്നു പരാതി, ന്യൂജേഴ്‌സി വിഹിതത്തില്‍ വലിയ കുറവ്
ന്യൂജേഴ്‌സിയിലെ ആശുപത്രികള്‍ക്കായി ഫെഡറല്‍ സര്‍ക്കാര്‍ 144 മില്യണ്‍ ഡോളര്‍ കൂടി നല്‍കുന്നു. എന്നാല്‍ പണം വീണ്ടും വിതരണം ചെയ്യാന്‍ ഉപയോഗിച്ച ഫോര്‍മുല പ്രകാരം ന്യൂജേഴ്‌സിക്കു ലഭിക്കുന്ന വിഹിതത്തില്‍ വലിയ കുറവാണെന്ന ആരോപണം ഉയര്‍ന്നു കഴിഞ്ഞു. ഫണ്ടിങ് വിതരണത്തിനായുള്ള ഫോര്‍മുല കൈകാര്യം ചെയ്ത രീതി തെറ്റാണെന്നാണ് വിമര്‍ശനം. കൊറോണ വൈറസ് ഏറ്റവും കൂടുതല്‍ ബാധിച്ച സംസ്ഥാനങ്ങളെ കണക്കിലെടുക്കാതെ പൊതുവായാണ് ഫണ്ട് വിതരണം ചെയ്യാന്‍ ഫെഡറല്‍ സര്‍ക്കാര്‍ തയ്യാറായിരിക്കുന്നത്.

രാജ്യത്തെ കോവിഡ് 19 കേസുകളില്‍ ഇന്നുവരെ 11 ശതമാനം കൊറോണ വൈറസ് കേസുകളുള്ള ന്യൂജേഴ്‌സിക്ക് യുഎസ് ആരോഗ്യ സേവന വകുപ്പ് നല്‍കിയ 9 ബില്യണ്‍ ഡോളറിന്റെ 2 ശതമാനം മാത്രമാണ് ലഭിച്ചത്. ന്യൂജേഴ്‌സിയിലെ ആശുപത്രികള്‍ക്കും മറ്റ് ആരോഗ്യ പരിരക്ഷാ സൗകര്യങ്ങള്‍ക്കും 919 മില്യണ്‍ ഡോളര്‍ ലഭിച്ചപ്പോള്‍, 30 ബില്യണ്‍ ഡോളറിന്റെ ആദ്യ വിഹിതത്തില്‍ നിന്ന് സംസ്ഥാനത്തിന് ലഭിച്ച 3 ശതമാനത്തേക്കാള്‍ വളരെ കുറവാണ് ഇത്.

ഏറ്റവും പുതിയ ഫോര്‍മുല 2018-ലെ രോഗിയുടെ വരുമാനത്തെ അടിസ്ഥാനമാക്കിയുള്ളതായിരുന്നു. 2019 ല്‍ ലഭിച്ച പരമ്പരാഗത മെഡികെയറിനുള്ള പേയ്‌മെന്റുകളുടെ അടിസ്ഥാനത്തിലായിരുന്നു ആദ്യ വിഹിതം.

‘ന്യൂജേഴ്‌സിയിലെ കോവിഡ് 19 പ്രവര്‍ത്തനത്തിന്റെ തീവ്രത പ്രതിഫലിപ്പിക്കുന്നതില്‍ പരാജയപ്പെട്ട ഫണ്ടിംഗ് ഫോര്‍മുല അടിസ്ഥാനമാക്കിയുള്ള ഈ പുതിയ വിതരണം,’ ന്യൂജേഴ്‌സി ഹോസ്പിറ്റല്‍ അസോസിയേഷന്റെ സര്‍ക്കാര്‍ ബന്ധങ്ങളുടെയും നയത്തിന്റെയും വൈസ് പ്രസിഡന്റ് നീല്‍ ഐഷര്‍ പറഞ്ഞു.

‘ഫെഡുകള്‍ ഓരോ സംസ്ഥാനത്തെയും കൃത്യമായി പരിഗണിക്കുന്ന ഒരു ഫോര്‍മുല ഉപയോഗിച്ചു, തല്‍ഫലമായി, ന്യൂ ജേഴ്‌സിയിലെ ഓരോ കോവിഡ് കേസിനുമുള്ള ധനസഹായം രാജ്യത്തെ ഏറ്റവും താഴ്ന്ന നിലയിലേക്ക് വീണു പോയിരിക്കുന്നു. ഫണ്ടിംഗിനെ ഞങ്ങള്‍ വിലമതിക്കുമ്പോള്‍, ന്യൂ ജേഴ്‌സിയുടെ ആരോഗ്യ പരിരക്ഷാ സൗകര്യങ്ങള്‍ കോവിഡ് 19 ല്‍ നിന്ന് തിരിച്ചുപിടിക്കാന്‍ സഹായിക്കുന്നതിന് ഈ സമീപനം പര്യാപ്തമല്ല.’ കൊറോണ വൈറസ് കേസുകളില്‍ സംസ്ഥാനത്തിന്റെ പങ്ക് അടിസ്ഥാനമാക്കി 10 ബില്യണ്‍ ഡോളര്‍ ആശുപത്രികളിലേക്ക് പോകുമെന്ന് എച്ച്എച്ച്എസ് അറിയിച്ചു, എന്നാല്‍ ആ ഫണ്ടുകള്‍ ഇതുവരെ നല്‍കിയിട്ടില്ല. എന്നിട്ടും, ഈ വിഹിതം ‘ഈ രാജ്യത്തെ ഏറ്റവും ദുര്‍ബലരായവരെ ചികിത്സിക്കുന്നതിനായുള്ള ചെലവുകളെയും വരുമാനനഷ്ടത്തെയും അപേക്ഷിച്ച് തുല്യമാണ്’ എന്ന് ഐഷര്‍ പറഞ്ഞു. ഏറ്റവും പുതിയ ഫോര്‍മുല പ്രകാരം, ഫണ്ടുകള്‍ കൂടുതലും ലഭിക്കുന്നത് കാലിഫോര്‍ണിയ, ടെക്‌സസ്, ഒഹായോ എന്നീ സംസ്ഥാനങ്ങള്‍ക്കാണ്.

തിങ്കളാഴ്ച വരെ 86,615 കൊറോണ വൈറസ് കേസുകള്‍ ഇവയ്ക്കുണ്ടായതായി ജോണ്‍സ് ഹോപ്കിന്‍സ് സെന്റര്‍ ഫോര്‍ സിസ്റ്റംസ് സയന്‍സ് ആന്‍ഡ് എഞ്ചിനീയറിംഗ് കണക്കുകള്‍ വ്യക്തമാക്കുന്നു. ന്യൂജേഴ്‌സിയില്‍ മാത്രം 111,118 കേസുകളാണുള്ളത്. ചൊവ്വാഴ്ച ഇത് 113,856 ആയി ഉയര്‍ന്നു.

‘ന്യൂയോര്‍ക്കിനോടും ന്യൂജേഴ്‌സിയോടും സൗഹൃദമില്ലാത്ത ഒരു അഡ്മിനിസ്‌ട്രേഷനുമായാണ് ഞാന്‍ പ്രവര്‍ത്തിക്കുന്നത്, തീര്‍ച്ചയായും ഞാന്‍ നിരാശനാണ്,’ ആരോഗ്യ സംരക്ഷണത്തിന് അധികാരപരിധിയിലുള്ള ഹൗസ് എനര്‍ജി ആന്‍ഡ് കൊമേഴ്‌സ് കമ്മിറ്റി ചെയര്‍മാനും റിപ്പബ്ലിക്കനുമായ ഇന്ത്യക്കാരുടെ സുഹൃത്ത് ഫ്രാങ്ക് പലോണ്‍ ജൂനിയര്‍ പറഞ്ഞു.

2 ട്രില്യണ്‍ ഡോളര്‍ ഉത്തേജക നിയമത്തില്‍ ഉള്‍പ്പെടുത്തിയിട്ടുള്ള ആശുപത്രികള്‍ക്കും മറ്റ് ആരോഗ്യ പരിരക്ഷാ സൗകര്യങ്ങള്‍ക്കുമായി 100 ബില്യണ്‍ ഡോളറിന്റെ ഭാഗമായിരുന്നു ഈ വിഹിതം. ഏറ്റവും പുതിയ നിയമം 75 ബില്യണ്‍ ഡോളര്‍ ആശുപത്രികള്‍ക്കായി നീക്കിവച്ചിട്ടുണ്ട്.

മലയാളി നന്മയ്ക്ക് ഭാവുകങ്ങള്‍
മലയാളി സന്നദ്ധ സംഘടനകളും പ്രസ്ഥാനങ്ങളും വ്യക്തികളും കൂടുതല്‍ ഊര്‍ജസ്വലതയോടെ കൊറോണയുമായി ബന്ധപ്പെട്ട ഒരു പിടി കാര്യങ്ങള്‍ക്കു ചുക്കാന്‍ പിടിച്ച് കൊണ്ട് അല്‍പ്പം താമസിച്ചാണെങ്കിലും മുന്നോട്ടിറങ്ങിയിട്ടുണ്ടെന്നത് ശുഭോദാര്‍ക്കമാണ്. കേവലം അധരവ്യായാമങ്ങളായി മാറാതെ ഈ കര്‍മ്മഭൂമിയിലെ പ്രവര്‍ത്തനങ്ങള്‍ ഏകോപിപ്പിക്കാന്‍ എല്ലാവര്‍ക്കും കഴിയട്ടെ എന്നാശംസിക്കുന്നു. ഫോട്ടോ അവസരങ്ങള്‍ക്കായി കിണഞ്ഞു പരിശ്രമിക്കുന്നവരെയും മീഡിയ അറ്റന്‍ഷന്‍ മാത്രം ലാക്കാക്കി പ്രവര്‍ത്തിക്കുന്നവരെയും തിരിച്ചറിയാന്‍ പൊതുജനത്തിന് റോക്കറ്റ് സയന്‍സൊന്നും തേടിപ്പോകേണ്ടി വരില്ല എന്ന ഒരോര്‍മ്മപ്പെടുത്തല്‍ മാത്രം നടക്കട്ടെ.

കൊറോണയെ പ്രതിരോധിക്കാന്‍ മുന്‍നിരയിലുള്ള മലയാളി ഡോക്ടര്‍മാര്‍, നേഴ്‌സുമാര്‍, എന്റെ പ്രിയ സഹ റെസ്പിറ്റോറി സുഹൃത്തുക്കള്‍, ഫയര്‍, പോസ്റ്റല്‍, ക്ലര്‍ജി തുടങ്ങിയ സേവനദാതാക്കള്‍ എല്ലാവരുടെയും എല്ലാ പ്രവര്‍ത്തനങ്ങള്‍ക്കും ആശംസകള്‍. കൊറോണ ഒഴിഞ്ഞു പോകുവാന്‍ ഇനി കുറച്ചു ദിവസങ്ങള്‍ മാത്രം, നമുക്കൊന്നിച്ചു പിടിച്ചു നില്‍ക്കാം.


Like our page https://www.facebook.com/MalayalamDailyNews/ and get latest news update from USA, India and around the world. Stay updated with latest News in Malayalam, English and Hindi.

Print This Post Print This Post
To toggle between English & Malayalam Press CTRL+g

Leave a Reply

Your email address will not be published. Required fields are marked *

Read More

Scroll to top