തിരുവനന്തപുരം: കേരളത്തില്‍ മദ്യവില്‍പ്പന ഓണ്‍ലൈനിലൂടെയാക്കാമെന്ന് പൊലീസ്. ഇക്കാര്യം വ്യക്തമാക്കിക്കൊണ്ടുള്ള റിപ്പോര്‍ട്ട് ഡിജിപി ലോക്‌നാഥ് ബെഹ്‌റ സര്‍ക്കാരിന് കൈമാറി. മദ്യവില്‍പ്പന വരുമ്പോള്‍ തിരക്ക് നിയന്ത്രിക്കാനും സുരക്ഷ ഒരുക്കാനും ആവശ്യമായ സംവിധാനങ്ങള്‍ പൊലീസ് ഒരുക്കാമെന്ന് റിപ്പോര്‍ട്ടില്‍ അറിയിച്ചിട്ടുണ്ട്.

കേരളത്തില്‍ മദ്യശാലകള്‍ തുറക്കുന്നതുമായി ബന്ധപ്പെട്ട് മുഖ്യമന്ത്രി പിണറായി വിജയന്‍ പൊലീസിനോട് റിപ്പോര്‍ട്ട് തേടിയിരുന്നു. ഒരേ സമയം എത്ര പേര്‍ ക്യൂവിലുണ്ടാകണം. ശാരീരിക അകലം എങ്ങനെ പാലിക്കണം തുടങ്ങിയ കാര്യങ്ങളിലാണ് റിപ്പോര്‍ട്ട് നല്‍കാന്‍ ആവശ്യപ്പെട്ടത്. മറ്റ് സംസ്ഥാനങ്ങളില്‍ മദ്യശാലകള്‍ തുറന്നപ്പോള്‍ വലിയ തിരക്കും ക്രമസമാധാന പ്രശ്‌നങ്ങളും ഉണ്ടായ സാഹചര്യത്തിലാണ് റിപ്പോര്‍ട്ട് തേടിയത്.

മദ്യശാലകള്‍ തുറന്നാല്‍ ആദ്യദിവസങ്ങളില്‍ വലിയ തിരക്കിന് സാധ്യതയുണ്ട്. അതിനാല്‍ ഓണ്‍ലൈന്‍ ബുക്കിംഗിനെക്കുറിച്ച് ആലോചിക്കണമെന്നും ഡിജിപി ലോക്‌നാഥ് ബെഹ്‌റ സര്‍ക്കാരിന് നല്‍കിയ റിപ്പോര്‍ട്ടില്‍ പറയുന്നു. ഓണ്‍ലൈന്‍ ബുക്കിംഗിലൂടെയുള്ള വില്‍പ്പനയാണ് അഭികാമ്യം എന്നാണ് ഡിജിപി വ്യക്തമാക്കിയിരിക്കുന്നത്. ഓരോ മണിക്കൂറിലും ഓണ്‍ലൈന്‍ ബുക്കിങ് നടത്തണം. അതിനായി സോഫ്റ്റ്‌വെയര്‍ തയ്യാറാക്കണം. ബുക്കിംഗിന്റെ കൂപ്പണുമായി ആവശ്യക്കാര്‍ മദ്യവില്‍പ്പന ശാലകളില്‍ എത്തണമെന്നാണ് നിര്‍ദേശം. തുടര്‍നടപടികള്‍ക്കായി സര്‍ക്കാര്‍ ബെവ്‌കോ എംഡിയെ ചുമതലപ്പെടുത്തിയിട്ടുണ്ട്.

പൊലീസിന്റെ റിപ്പോര്‍ട്ടിന്റെ അടിസ്ഥാനത്തില്‍ ബെവ്‌കോയും കണ്‍സ്യൂമര്‍ഫെഡും തയ്യാറെടുപ്പുകള്‍ നടത്തുമെന്നാണ് അറിയുന്നത്. അതേസമയം ലോക്ക്ഡൗണിന് ശേഷം മദ്യശാലകള്‍ തുറന്നാല്‍ മതിയെന്നാണ് സിപിഎം നിലപാട്.