ചെന്നൈ: കൊറോണ വൈറസ് പ്രതിരോധ മരുന്ന് സ്വയം വികസിപ്പിച്ച് പരീക്ഷിച്ച മരുന്ന് കമ്പനി മാനേജര്‍ മരിച്ചു. തമിഴ്‌നാട്ടിലെ ആയുര്‍വേദ മരുന്ന് ഉല്‍പാദക കമ്പനിയായ സുജാത ബയോടെക്കിലെ ഫാര്‍മസിസ്റ്റും പ്രൊഡക്ഷന്‍ മാനേജറുമായ ശിവനേശനാണ് (47) മരിച്ചത്. മരുന്ന് കഴിച്ച കമ്പനി മാനേജിങ് ഡയറക്ടര്‍ ഡോ. രാജ്കുമാറിന്റെ (67) ആരോഗ്യനില വഷളായെങ്കിലും അദ്ദേഹം ഇപ്പോള്‍ അപകടനില തരണം ചെയ്തിട്ടുണ്ട്.

സുജാത ബയോടെക്കിന്റെ ഉത്തര്‍പ്രദേശിലെ കാശിപൂരിലുള്ള പ്ലാന്റിലാണ് ശിവനേശന്‍ പ്രവര്‍ത്തിച്ചിരുന്നത്. ഇയാള്‍ രാജ്കുമാറുമായി ചേര്‍ന്ന് രക്തത്തില്‍ പ്ലേറ്റ്‌ലെറ്റ് കൗണ്ട് കൂട്ടാനുള്ള മരുന്നാണ് കണ്ടുപിടിക്കാന്‍ ശ്രമിച്ചത്. സ്വന്തമായ ഉണ്ടാക്കിയ മരുന്ന് ഇവര്‍ തങ്ങളുടെ തന്നെ ശരീരത്തില്‍ പ്രയോഗിച്ചു. മരുന്ന് കഴിച്ചയുടനെ ഇരുവരും തളര്‍ന്നുവീണു. ഉടനെ ആശുപത്രിയിലെത്തിച്ചെങ്കിലും ശിവനേശന്റെ ജീവന്‍ രക്ഷിക്കാനായില്ല. ശിവനേശന്‍ കൂടുതല്‍ മരുന്ന് കഴിച്ചിരുന്നു. രാജ്കുമാറാകട്ടെ രണ്ട് തുള്ളി മാത്രമാണ് കഴിച്ചത്. രാജ്കുമാറിന്റെ ആരോഗ്യനില മെച്ചപ്പെട്ടതായി ആശുപത്രി അധികൃതര്‍ അറിയിച്ചു.

നൈട്രിക് ഓക്‌സൈഡിന്റെയും സോഡിയം നൈട്രേറ്റിന്റെയും മിശ്രിതമായിരുന്നു മരുന്ന്. പരീക്ഷണത്തിനിടയില്‍ സോപ്പ് നിര്‍മ്മാണത്തിനും പെട്രോളിയം ശുദ്ധീകരണത്തിനും ഉപയോഗിക്കുന്ന സോഡിയം ഹൈഡ്രേറ്റും ഇവര്‍ കുടിച്ചിരുന്നു. സംഭവത്തില്‍ പൊലീസ് കേസെടുത്തിട്ടുണ്ട്.