ന്യൂഡല്‍ഹി: ലോക്ക്ഡൗണിന് ഇളവുകള്‍ അനുവദിച്ചത് തിരിച്ചടിയായി രാജ്യത്ത് കൊവിഡ്-19 രോഗികളുടെ എണ്ണം അനുദിനം വര്‍ദ്ധിക്കുന്നു. മെയ് 15-ാം തിയ്യതിയോടുകൂടി കൊവിഡ്-19 രോഗികളുടെ എണ്ണം 65,000 ആകുമെന്നായിരുന്നു നീതി ആയോഗ് നേരത്തെ റിപ്പോര്‍ട്ട് ചെയ്തിരുന്നത്. എന്നാല്‍ 15-ാം തിയതിയാകാന്‍ നാല് ദിവസം ശേഷിക്കെ ഇന്നലെ രോഗികളുടെ എണ്ണം 67,152 ആയി. ലോക്ക്ഡൗണ്‍ നിബന്ധനകളിലെ ഇളവുകളാണ് രോഗികള്‍ വര്‍ധിക്കാന്‍ കാരണമായതെന്നാണ് വിലയിരുത്തല്‍. ഈ രീതിയില്‍ മുന്നോട്ടുപോയാല്‍ അടുത്ത 15 ദിവസം കൊണ്ട് ഒരു ലക്ഷം പുതിയ കേസുകള്‍ ഉണ്ടാകുമെന്ന് വിദഗ്ധര്‍ അഭിപ്രായപ്പെടുന്നു.

ഓഗസ്റ്റ് പകുതിയോടെ രാജ്യത്ത് 2.74 കോടി ആളുകള്‍ക്ക് കൊവിഡ് ബാധിക്കുമെന്നാണ് ഏപ്രില്‍ 27ന് നീതി ആയോഗ് വിലയിരുത്തിയത്. അന്ന് 12 ദിവസമെന്ന നിരക്കിലായിരുന്നു രോഗികളുടെ എണ്ണം ഇരട്ടിച്ചിരുന്നത്. ഇത് ഇടയ്ക്ക് മെച്ചപ്പെട്ടാലും ലോക്ക്ഡൗണ്‍ മാറുമ്പോള്‍ സ്ഥിതി രൂക്ഷമാകാമെന്നാണ് നിഗമനം.

അതേസമയം മുംബൈയില്‍ കൊവിഡ് സാമൂഹ്യവ്യാപനത്തിന്റെ സൂചനയുണ്ടെന്ന് മഹാരാഷ്ട്ര രോഗ നിരീക്ഷണ- നിയന്ത്രണ ചുമതലയുള്ള ഡോ. പ്രദീപ് അവാതെ അറിയിച്ചു. സംസ്ഥാനത്തെ മറ്റ് ചില കേന്ദ്രങ്ങളിലും സമൂഹവ്യാപനത്തിന് സമാനമായ അവസ്ഥയാണെന്നും അദ്ദേഹം പറഞ്ഞു. എന്നാല്‍ ആരോഗ്യമന്ത്രി ഇക്കാര്യം സ്ഥിരീകരിച്ചിട്ടില്ല.

മഹാരാഷ്ട്രയില്‍ കൊവിഡ് രോഗികള്‍ 23,401 ആയി. ഇന്നലെ 36 പേര്‍ മരിച്ചു. 1230 പേര്‍ക്കാണ് ഇന്നലെ ഇവിടെ രോഗം ബാധിച്ചത്. ആകെ മരണം 868 ആയി.