ലണ്ടന്‍: കൊറോണ വൈറസ് ബാധയേറ്റ് മലയാളിയായ ഡോ. പൂര്‍ണ്ണിമാ നായര്‍ (55) മരിച്ചു. ഇംഗ്ലണ്ടിലെ കൗണ്ടി ഡർഹാമിലെ ബിഷപ്പ് ഓക്ക്‌ലാന്‍ഡിലെ സ്റ്റേഷന്‍ വ്യൂ മെഡിക്കല്‍ സെന്ററിലെ ജനറല്‍ പ്രാക്ടീഷണര്‍ ആയിരുന്നു. മാര്‍ച്ച് 27 മുതല്‍ ലൈഫ് സപ്പോര്‍ട്ടിലായിരുന്നു. അതിനു രണ്ടാഴ്ച മുമ്പാണ് രോഗം ബാധിച്ചത്. സ്റ്റോക്ക്ടണ്‍ ഓണ്‍ടീസിലെ നോര്‍ത്ത് ടീസ് ആശുപത്രിയില്‍ വെച്ചാണ് അവര്‍ മരിച്ചത്.
കൊറോണ വൈറസിനെ നിയന്ത്രിക്കാനുള്ള ശ്രമങ്ങള്‍ക്ക് നേരിട്ട് സംഭാവന നല്‍കുന്ന യുകെ മെഡിക്കല്‍ കമ്മ്യൂണിറ്റിയിലെ പത്താമത്തെ അംഗമാണ് പൂര്‍ണ്ണിമ നായര്‍.
ഞങ്ങളുടെ പ്രിയപ്പെട്ട, മൂല്യവത്തായ സഹപ്രവര്‍ത്തകയും സുഹൃത്തും ആയ ഡോ. പൂര്‍ണിമ നായരുടെ മരണം ഞങ്ങളെ അതീവ ദുഃഖത്തിലാഴ്ത്തി എന്ന് മെഡിക്കല്‍ സെന്‍റര്‍ ഒരു സന്ദേശത്തില്‍ പറഞ്ഞു.
ബിഷപ്പ് ഓക്ക്‌ലാന്‍ഡ് എംപി ഡെഹെ ഡേവിഡ്സണ്‍ തന്‍റെ ഫേസ്ബുക്ക് പേജില്‍ എഴുതി, ‘ഡോക്ടര്‍ ഞങ്ങളുടെ കമ്മ്യൂണിറ്റിയിലെ അറിയപ്പെടുന്നതും പ്രധാനപ്പെട്ടതുമായ ഒരു അംഗമായിരുന്നു. ഞങ്ങള്‍ക്ക് എല്ലാവര്‍ക്കും തീരാനഷ്ടമാണ് അവരുടെ മരണം. ഡോക്ടര്‍ നായരുടെ കുടുംബത്തിനും സുഹൃത്തുക്കള്‍ക്കും സഹപ്രവര്‍ത്തകര്‍ക്കും എന്‍റെ അനുശോചനം.’
ഡോ. നായരുടെ സഹപ്രവര്‍ത്തകരും സുഹൃത്തുക്കളും രോഗികളും സോഷ്യല്‍ മീഡിയ വഴി അവര്‍ക്ക് ആദരാഞ്ജലി അര്‍പ്പിച്ചു.
Please like our Facebook Page https://www.facebook.com/MalayalamDailyNews for all daily updated news
