ന്യൂഡല്‍ഹി: ഏകദേശം 20 ദിവസത്തോളമായി അദ്ദേഹം ആശുപത്രിയില്‍ ചികിത്സയിലായിരുന്നു. വെള്ളിയാഴ്ച ഉച്ചകഴിഞ്ഞ് 3:30 നാണ് 74 കാരനായ ജോഗി അന്ത്യശ്വാസം വലിച്ചതെന്ന് റായ്പൂരിലെ ശ്രീ നാരായണ ഹോസ്പിറ്റല്‍ മാനേജിംഗ് ഡയറക്ടര്‍ ഡോ. സുനില്‍ ഖേംക പറഞ്ഞു. ആരോഗ്യസ്ഥിതി മോശമായതിനെ തുടര്‍ന്ന് മെയ് 9 നാണ് ആശുപത്രിയില്‍ പ്രവേശിപ്പിച്ചത്. രണ്ടു തവണ ഹൃദയാഘാതം വന്നതോടെ നില ഗുരുതരമായി തുടരുകയായിരുന്നു.
അജിത് ജോഗിയുടെ ശവസംസ്കാരം ശനിയാഴ്ച ജന്മനാടായ ഗോറേലയില്‍ നടക്കുമെന്ന് അജിത് ജോഗിയുടെ മകന്‍ അമിത് ജോഗി ട്വീറ്റ് ചെയ്തു.
വെള്ളിയാഴ്ച ഉച്ചയ്ക്ക് 1.30 ഓടെയാണ് അദ്ദേഹത്തിന് രണ്ടാമത്തെ ഹൃദയാഘാതം ഉണ്ടായതെന്നും ഡോക്ടര്‍മാര്‍ അദ്ദേഹത്തെ രക്ഷിക്കാന്‍ ശ്രമിച്ചെങ്കിലും വിജയിച്ചില്ലെന്ന് ആശുപത്രി അധികൃതര്‍ വ്യക്തമാക്കി.
മെയ് 9 ന് പൂന്തോട്ടത്തില്‍ വീല്‍ചെയറില്‍ ഇരിക്കുകയായിരുന്ന അദ്ദേഹം പെട്ടെന്ന് ബോധരഹിതനാകുകയും ആശുപത്രിയില്‍ പ്രവേശിപ്പിക്കുകയും ചെയ്തെന്ന് കുടുംബാംഗങ്ങള്‍ പറഞ്ഞു. അദ്ദേഹത്തിന്‍റെ നില വഷളായിക്കൊണ്ടിരിക്കുകയായിരുന്നു.
ജോഗിയുടെ മൃതദേഹം ശനിയാഴ്ച രാവിലെ ഒന്‍പതിന് റായ്പൂരിലെ തേക്ക് ബംഗ്ലാവില്‍ നിന്ന് ബിലാസ്പൂരിലെ വസതിയായ മാര്‍വാഹി സദനിലേക്ക് കൊണ്ടുപോകുമെന്ന് കുടുംബാംഗങ്ങള്‍ പറഞ്ഞു. അവിടെ ആദരാഞ്ജലി അര്‍പ്പിച്ച ശേഷം ബിലാസ്പൂര്‍ ജില്ലയിലെ രത്തന്‍പൂരിലെ കോട്ട വഴി അദ്ദേഹത്തിന്‍റെ പൂര്‍വ്വികരുടെ സ്ഥലത്ത് സംസ്കരിക്കും.
ഇന്ത്യന്‍ അഡ്മിനിസ്ട്രേറ്റീവ് സര്‍വീസില്‍ നിന്ന് രാഷ്ട്രീയത്തിലേക്ക് വന്ന അജിത് ജോഗി നിലവില്‍ മാര്‍വാഹി നിയമസഭാ സീറ്റിനെ പ്രതിനിധീകരിക്കുകയായിരുന്നു. ഭാര്യ രേണു ജോഗി കോട്ട മേഖലയിലെ എംഎല്‍എയാണ്.
2000 ല്‍ സംസ്ഥാനം രൂപീകരിച്ചതിനുശേഷം ജോഗി ഛത്തീസ്ഗഢിലെ ആദ്യത്തെ മുഖ്യമന്ത്രിയായി. 2003 വരെ ഈ പദവിയില്‍ തുടര്‍ന്നു. 2003 ല്‍ സംസ്ഥാന നിയമസഭയിലേക്കുള്ള ആദ്യ തിരഞ്ഞെടുപ്പില്‍ കോണ്‍ഗ്രസിനെ ഭാരതീയ ജനതാ പാര്‍ട്ടി പരാജയപ്പെടുത്തി.
സംസ്ഥാനത്തെ കോണ്‍ഗ്രസ് നേതാക്കളുമായുള്ള അഭിപ്രായവ്യത്യാസത്തെത്തുടര്‍ന്ന് ജോഗി 2016 ല്‍ ജനത കോണ്‍ഗ്രസ് ഛത്തീസ്ഗഢ് (ജെ) എന്ന പുതിയ പാര്‍ട്ടി രൂപീകരിച്ചു.
അജിത് ജോഗിയുടെ നിര്യാണത്തില്‍ രാഷ്ട്രപതി രാം നാഥ് കോവിന്ദ്, വൈസ് പ്രസിഡന്റ് വെങ്കയ്യ നായിഡു, പ്രധാനമന്ത്രി നരേന്ദ്ര മോദി എന്നിവര്‍ അനുശോചിച്ചു.
ഛത്തീസ്ഗഢിലെ ആദ്യത്തെ മുഖ്യമന്ത്രി ശ്രീ അജിത് ജോഗിയുടെ നിര്യാണത്തില്‍ ഖേദം പ്രകടിപ്പിക്കുന്നതായി പ്രസിഡന്റ് രാംനാഥ് കോവിന്ദ് ട്വീറ്റ് ചെയ്തു. ‘ബഹുമുഖ വ്യക്തിത്വത്തില്‍ സമ്പന്നനും പ്രഗത്ഭനുമായിരുന്നു അദ്ദേഹം. ഛത്തീസ്ഗഢ് സംസ്ഥാനത്തിന്‍റെയും അവിടുത്തെ ജനങ്ങളുടെയും വികസനത്തിനായി അദ്ദേഹം വളരെ സജീവമായിരുന്നു. അദ്ദേഹത്തിന്‍റെ കുടുംബത്തിനും സുഹൃത്തുക്കള്‍ക്കും പിന്തുണക്കാര്‍ക്കും എന്‍റെ അനുശോചനം അറിയിക്കുന്നു,’ പ്രസിഡന്റ് എഴുതി.
Shri Ajit Jogi Ji was passionate about public service. This passion made him work hard as a bureaucrat and as a political leader. He strived to bring a positive change in the lives of the poor, especially tribal communities. Saddened by his demise. Condolences to his family. RIP.
— Narendra Modi (@narendramodi) May 29, 2020
അജിത് ജോഗി പൊതുസേവനത്തിനായി സമര്‍പ്പിക്കപ്പെട്ട വ്യക്തിത്വമായിരുന്നു എന്ന് പ്രധാനമന്ത്രി നരേന്ദ്ര മോദി ട്വീറ്റ് ചെയ്തു. അദ്ദേഹം ഒരു ബ്യൂറോക്രാറ്റായും രാഷ്ട്രീയക്കാരനായും കഠിനാധ്വാനം ചെയ്തു. ദരിദ്രരുടെ, പ്രത്യേകിച്ച് ആദിവാസി സമൂഹങ്ങളുടെ ജീവിതത്തില്‍ നല്ല മാറ്റങ്ങള്‍ വരുത്താന്‍ അദ്ദേഹം ശ്രമിച്ചുകൊണ്ടിരുന്നു. അദ്ദേഹത്തിന്‍റെ നിര്യാണത്തില്‍ സങ്കടമുണ്ട് അദ്ദേഹത്തിന്‍റെ കുടുംബത്തിന് അനുശോചനം.
അജിത് ജോഗിയുടെ മരണത്തില്‍ കോണ്‍ഗ്രസ് മുന്‍ പ്രസിഡന്റ് രാഹുല്‍ ഗാന്ധി ദുഃഖം രേഖപ്പെടുത്തുകയും കുടുംബത്തിന് അനുശോചനം അറിയിക്കുകയും ചെയ്തു.
I’m sorry to hear about the passing of Shri Ajit Jogi, former Parliamentarian & Chhattisgarh’s first CM. My condolences to his family, friends & followers in this time of grief. May he rest in peace.
— Rahul Gandhi (@RahulGandhi) May 29, 2020
ആദ്യത്തെ മുഖ്യമന്ത്രി അജിത് ജോഗിയുടെ മരണത്തില്‍ ഛത്തീസ്ഗഢ് സര്‍ക്കാര്‍ മൂന്ന് ദിവസത്തെ ദുഃഖാചരണം പ്രഖ്യാപിച്ചു.
ഈ സമയത്ത് ദേശീയ പതാക പകുതി താഴ്ത്തി കെട്ടും. ഔദ്യോഗിക ചടങ്ങുകളൊനും നടക്കില്ല. ജോഗിയുടെ സംസ്കാരം മെയ് 30 ന് ഗോറെല്ലയില്‍ സംസ്ഥാന ബഹുമതികളോടെ നടക്കും.
ഗവര്‍ണര്‍ അനുസുയ ഉയ്കെ, മുഖ്യമന്ത്രി ഭൂപേഷ് ബാഗേല്‍, പ്രതിപക്ഷ നേതാവ് ധരംലാല്‍ കൗശിക് എന്നിവര്‍ അനുശോചനം അറിയിച്ചു.
ജോഗിയുടെ മരണത്തില്‍ മുഖ്യമന്ത്രി ഭൂപേഷ് ബാഗേല്‍ കടുത്ത ദുഃഖം രേഖപ്പെടുത്തി. ജോഗിയുടെ മരണം ഛത്തീസ്ഗഢിന് നികത്താനാവാത്ത നഷ്ടമാണെന്ന് അദ്ദേഹം അനുശോചന സന്ദേശത്തില്‍ പറഞ്ഞു. സംസ്ഥാനത്തിന്റെ വികസനത്തിന് ജോഗി നല്‍കിയ സംഭാവനകളെ അനുസ്മരിച്ച അദ്ദേഹം, ഛത്തീസ്ഗഢിന്റെ ദ്രുതഗതിയിലുള്ള വികസനത്തിന് തയ്യാറെടുക്കുകയും വിദഗ്ദ്ധനായ രാഷ്ട്രീയക്കാരനും ഭരണാധികാരിയും എന്ന നിലയില്‍ സംസ്ഥാനത്തിന്റെ മുന്നേറ്റത്തില്‍ പ്രധാന പങ്ക് വഹിക്കുകയും ചെയ്തു.
ഛത്തീസ്ഗഢ് സംസ്ഥാനം രൂപീകരിച്ചതിനുശേഷം ജോഗിയുടെ നേതൃത്വത്തിലുള്ള സര്‍ക്കാരില്‍ കാബിനറ്റ് മന്ത്രിയായി പ്രവര്‍ത്തിക്കാന്‍ അവസരം ലഭിക്കാന്‍ ഭാഗ്യമുണ്ടായി എന്ന് മുഖ്യമന്ത്രി പറഞ്ഞു. ഛത്തീസ്ഗഢ് സംസ്ഥാനത്തെ ഗ്രാമങ്ങളുടെയും ദരിദ്രരുടെയും കര്‍ഷകരുടെയും ക്ഷേമത്തിനായി പ്രവര്‍ത്തിക്കാന്‍ ജോഗി നിര്‍ദ്ദേശം നല്‍കിയതായി അദ്ദേഹം പറഞ്ഞു.
നിയമസഭയിലെ പ്രതിപക്ഷ നേതാവ് ധരംലാല്‍ കൗശിക്കും ജോഗിയുടെ നിര്യാണത്തില്‍ അനുശോചിച്ചു. ഇന്ത്യന്‍ രാഷ്ട്രീയത്തിലും സാമൂഹിക ജീവിതത്തിലും ഏറ്റവും ഉയര്‍ന്ന സ്ഥാനം അജിത് ജോഗി നേടിയിട്ടുണ്ടെന്ന് കൗശിക് പറഞ്ഞു. ജോഗിയുടെ നിര്യാണം നമുക്കെല്ലാവര്‍ക്കും ഒരു വലിയ നഷ്ടമാണെന്നും അദ്ദേഹം പറഞ്ഞു.
Please like our Facebook Page https://www.facebook.com/MalayalamDailyNews for all daily updated news
