കൊറോണ വൈറസ് പിടിപെട്ട് രണ്ടു മലയാളികള്‍ യുഎ‌യിയിലും ഒരാള്‍ സൗദി അറേബ്യയിലും മരിച്ചു. മലപ്പുറം എടപ്പാള്‍ സ്വദേശി മൊയ്തൂട്ടി (50) അബുദാബിയിലും മലപ്പുറം കടുങ്ങാപുരം കട്ട്‌ലശ്ശേരി സ്വദേശി ഷാഹുല്‍ ഹമീദ് (37) അജ്മാനിലും, കോഴിക്കോട് പെരുമണ്ണ സ്വദേശി വി.പി.അബ്ദുള്‍ ഖാദര്‍ (55) സൗദി അറേബ്യയിലുമാണ് മരിച്ചത്.

സൗദി അറേബ്യയിലെ അല്‍ഖോബാറില്‍ വീട്ടു ഡ്രൈവറായി ജോലി ചെയ്തുവരികയായിരുന്നു അബ്ദുള്‍ ഖാദര്‍. ഭാര്യ സുഹറ. മക്കള്‍: അജാസ്, റാഷിദ്, ജസ്‌ന

കേരള സാംസ്‌കാരിക വേദി പ്രവര്‍ത്തകനായിരുന്ന മൊയ്തുട്ടി അബുദാബിയിലാണ് മരിച്ചത്. ഭാര്യ: റംല. മക്കള്‍: സഫ്വാന്‍, സുഹൈല്‍, സഹ്ല.

അജ്മാന്‍ ഖലീഫ ആശുപത്രിയില്‍ കോവിഡ് ബാധിച്ച് ചികിത്സയിലായിരുന്ന ഷാഹുല്‍ ഹമീദ് ഹൃദയാഘാതത്തെ തുടര്‍ന്നാണ് മരിച്ചത്. ഭാര്യ: റഹീന, മക്കള്‍: ഷഹാന നസ്രിന്‍, മുഹമ്മദ് ഷാദില്‍.