തിരുവനന്തപുരം: കോവിഡ്-19 ന്റെ പിടിയില്‍ നിന്ന് സംസ്ഥാനം മുക്തി നേടിയിട്ടില്ലെന്ന് മുഖ്യമന്ത്രി പിണറായി വിജയന്‍. സമൂഹവ്യാപനമെന്ന വിപത്ത് നമ്മളെ പിന്തുടരുന്നുണ്ട്. അതുകൊണ്ട് ഈ സ്ഥിതിയെ ഗൗരവമായി കണക്കാക്കേണ്ടതുണ്ടെന്നും അദ്ദേഹം പറഞ്ഞു

സമൂഹവ്യാപനം എന്നതും സമ്പര്‍ക്കത്തിലൂടെ രോഗം വരുന്നതും വെവ്വേറെ കാര്യങ്ങളാണ്. രോഗം പിടിപ്പെട്ടത് എങ്ങിനെയെന്ന് ഒരു തരത്തിലും മനസ്സിലാകാതിരിക്കുമ്പോഴാണ് അത് സമൂഹവ്യാപനമായി കണക്കാക്കുക എന്നും അദ്ദേഹം ചൂണ്ടിക്കാട്ടി. അത്തരമൊരു അവസ്ഥയിലേക്ക് സംസ്ഥാനം എത്തിയിട്ടില്ല. ചില കേസുകള്‍ ഉണ്ടെങ്കിലും അതിനെ സമൂഹവ്യാപനമായി കണക്കാക്കാന്‍ കഴിയില്ലെന്നും മുഖ്യമന്ത്രി പറഞ്ഞു.

വിദഗ്ധര്‍ പറയുന്നത് ഒരു ഘട്ടത്തില്‍ സമൂഹവ്യാപനം ഉണ്ടായേക്കാമെന്നാണ്. അത് തടയാന്‍ നമ്മള്‍ പരമാവധി ശ്രമിക്കും. നാടാകെ ഒരുപോലെ ജാഗ്രത പാലിച്ചാല്‍ മാത്രമേ അത് തടയാന്‍ നമ്മുക്ക് സാധിക്കുകയുള്ളൂവെന്നും മുഖ്യമന്ത്രി പറഞ്ഞു.

സംസ്ഥാനത്ത് ഇന്ന് 111 പേര്‍ക്കാണ് കൊവിഡ് സ്ഥിരീകരിച്ചിരിക്കുന്നത്. ഇതാദ്യമായാണ് സംസ്ഥാനത്ത് ഒറ്റ ദിവസം കൊവിഡ് രോഗികളുടെ എണ്ണം മൂന്നക്കത്തിലേക്ക് കടക്കുന്നത്. സംസ്ഥാനത്തെ കൊവിഡിന്റെ സ്ഥിതി രൂക്ഷമാകുന്നു എന്നാണ് ഇത് കാണിക്കുന്നതെന്നും മുഖ്യമന്ത്രി പിണറായി വിജയന്‍ പറഞ്ഞു.