തിരുവനന്തപുരം: സംസ്ഥാനത്ത് ലോക്ക്ഡൗണുകളില്‍ ഇളവു വരുത്തിയെങ്കിലും നിയന്ത്രണങ്ങള്‍ കാറ്റില്‍ പറത്തി ജനങ്ങള്‍. സര്‍ക്കാര്‍ നിബന്ധനകളൊന്നും ബാധകമല്ലെന്ന തരത്തിലാണ് എല്ലാവരും. ഇന്ന് 107 പേര്‍ക്കാണ് കൊവിഡ്-19 പോസിറ്റീവ് സ്ഥിരീകരിച്ചത്. മലപ്പുറത്ത് 27 പേര്‍ക്കും പത്തനംതിട്ടയില്‍ 13 പേര്‍ക്കും കൊല്ലത്ത് 9 പേര്‍ക്കും ആലപ്പുഴയില്‍ 7 പേര്‍ക്കും പാലക്കാട്ടും കോഴിക്കോട്ടും ആറ് പേര്‍ക്ക് വീതവും തിരുവനന്തപുരത്ത് 4 പേര്‍ക്കും കോട്ടയത്തും കാസര്‍കോട്ടും 3 പേര്‍ക്ക് വീതവും കണ്ണൂര്‍ ജില്ലയില്‍ നിന്നുള്ള രണ്ട് പേര്‍ക്കും ഇടുക്കി ജില്ലയില്‍ നിന്നുള്ള ഒരാള്‍ക്കുമാണ് ഇന്ന് കൊവിഡ് സ്ഥിരീകരിച്ചിരിക്കുന്നത്.

കോവിഡ് ബാധ പോസിറ്റീവ് സ്ഥിരീകരിച്ചവരില്‍ 71 പേര്‍ വിദേശ രാജ്യങ്ങളില്‍ നിന്നും 28 പേര്‍ മറ്റ് സംസ്ഥാനങ്ങളില്‍ നിന്നും വന്നവരാണ്. സമ്പര്‍ക്കത്തിലൂടെ എട്ട് പേര്‍ക്കും രോഗം ബാധിച്ചു. അതേസമയം രോഗം സ്ഥിരീകരിച്ച് ചികിത്സയിലായിരുന്ന 41 പേരുടെ പരിശോധന ഫലം നെഗറ്റീവായിട്ടുണ്ട്. ഇനി സംസ്ഥാനത്ത് 1095 പേരാണ് രോഗം സ്ഥിരീകരിച്ച് ചികിത്സയിലുള്ളത്. 803 പേര്‍ കൊവിഡ് മുക്തരായി.

സംസ്ഥാനത്തെ വിവിധ ജില്ലകളിലായി 1,91,481 പേര്‍ നിരീക്ഷണത്തിലുണ്ട്. ഇന്ന് പുതിയതായി 6 ഹോട്‌സ്‌പോട്ടുകള്‍ കൂടി ഉള്‍പ്പെടുത്തി. കണ്ണൂര്‍ ജില്ലയിലെ എരുവശ്ശേരി, ഉദയഗിരി, മങ്ങാട്ടിടം, കുറ്റിയാട്ടൂര്‍, പാലക്കാട് ജില്ലയിലെ കൊടുവായൂര്‍, വയനാട് ജില്ലയിലെ പനമരം എന്നിവയാണ് പുതിയ ഹോട്‌സ്‌പോട്ടുകള്‍. ഇതോടെ സംസ്ഥാനത്ത് നിലവിലുള്ള ഹോട്‌സ്‌പോട്ടുകളുടെ എണ്ണം 144 ആയി.