ഡാളസ്: ഡി.എഫ്.ഡബ്ല്യു അന്താരാഷ്ട്ര വിമാനത്താവളത്തില്‍ പ്രവേശിക്കുന്ന യാത്രക്കാര്‍ ഉള്‍പ്പടെ എല്ലാവര്‍ക്കും ജൂലൈ 2 വ്യാഴാഴ്ച മുതല്‍ ഫെയ്സ് മാസ്ക് നിര്‍ബ്ബന്ധമാക്കി.

കൗണ്ടി, ഗവണ്മെന്റ് സ്ഥാപനങ്ങള്‍, എയര്‍ലൈന്‍സ് എന്നിവ മാസ്ക് നിര്‍ബന്ധമാക്കി ആഴ്ചകൾക്കുശേഷമാണ് ഡിഎഫ്ഡബ്ല്യുവില്‍ മാസ്ക്ക് നിര്‍ബന്ധമാക്കി ഉത്തരവ് പുറത്തിറക്കിയത്. എയര്‍പോര്‍ട്ട് ജീവനക്കാര്‍ക്ക് ഏപ്രില്‍ മുതല്‍ മാസ്ക്ക് നിര്‍ബന്ധമാക്കിയിരുന്നുവെങ്കിലും മറ്റുള്ളവര്‍ക്ക് ഇത് ബാധകമാക്കിയിരുന്നില്ല.

എയര്‍പോര്‍ട്ടിന് സ്വന്തമായ പൊലീസ് ഫോഴ്സ് ഉണ്ടെങ്കിലും നിയമം എപ്രകാരമാണ് നടപ്പാക്കുന്നതെന്ന് ഇതുവരെ വ്യക്തമാക്കിയിട്ടില്ല. ടെര്‍മിനലുകളെ തമ്മില്‍ ബന്ധിക്കുന്ന സ്കൈ ലിങ്ക് ട്രെയിനുകളില്‍ സഞ്ചരിക്കുന്നവരും മാസ്ക്ക് ധരിക്കണം.

യാത്രക്കാരുടെയും ജീവനക്കാരുടേയും സുരക്ഷിതത്വത്തിനു മുന്‍ഗണന നല്‍കുന്നതിനാണ് ഇങ്ങനെയൊരു നിയമം കൊണ്ടുവന്നതെന്ന് ഡിഎഫ്ഡബ്ല്യു എയര്‍പോര്‍ട്ട് സിഇഒ ഡണ്‍ഹൗ പറഞ്ഞു. എന്നാല്‍ രണ്ടു വയസ്സിനു താഴെയുള്ള കുട്ടികളെയും ആരോഗ്യപ്രശ്നങ്ങള്‍ ഉള്ളവരേയും ഈ നിയമത്തിന്റെ പരിധിയില്‍ നിന്ന് ഒഴിവാക്കിയിട്ടുണ്ട്.