ഡിപ്ലോമാറ്റിക് ബാഗ് വഴി സ്വര്‍ണ്ണം കടത്തിയ കേസില്‍ എന്‍ ഐ എയുടേയും കസ്റ്റംസിന്റേയും അന്വേഷണം പുരോഗമിച്ചുകൊണ്ടിരിക്കെ തിരുവനന്തപുരത്തെ യു എ ഇ കോണ്‍സുലേറ്റ് ഉദ്യോഗസ്ഥന്‍ (അറ്റാഷെ) റാഷിദ് ഖാമിസ് അലി മുസൈഖിരി രാജ്യം വിട്ടതായി റിപ്പോര്‍ട്ട്. രണ്ടു ദിവസം മുമ്പാണ് അദ്ദേഹം യു എ ഇയിലേക്ക് പോയതെന്നാണ് അറിവ്.

സ്വര്‍ണ്ണക്കടത്തുമായി ബന്ധപ്പെട്ട് യു എ ഇയിലും അന്വേഷണം നടക്കുന്നുണ്ട്. അതിന്റെ ഭാഗമായാണ് അറ്റാഷെയെ തിരിച്ചു വിളിച്ചതെന്നാണ് വിവരം. ഗുരുതരമായ വീഴ്ചയാണ് സംഭവിച്ചതെന്നും അന്വേഷണം നടത്തി കനത്ത ശിക്ഷ കുറ്റക്കാര്‍ക്ക് നല്‍കുമെന്നും യു എ ഇ വ്യക്തമാക്കിയതിനു പിറകെയാണ് അറ്റാഷെയുടെ കള്ളക്കടത്തിലെ ബന്ധം കസ്റ്റംസ് കണ്ടെത്തുന്നത്.

ഞായറാഴ്ചയാണ് റാഷിദ് ഖാമിസ് അലി മുസൈഖിരി ഡല്‍ഹിക്ക് പോയത്. അവിടെ നിന്ന് രണ്ടു ദിവസം മുന്‍പ് യുഎഇയിലേക്ക് പോകുകയായിരുന്നു. സ്വര്‍ണക്കടത്ത് കേസില്‍ അറസ്റ്റിലായ പ്രതികള്‍ മൊഴി നല്‍കിയതിന് പിന്നാലെയാണ് അറ്റാഷെ രാജ്യം വിടുന്നത്. നയതന്ത്ര പരിരക്ഷയുള്ള അറ്റാഷയെ ചോദ്യം ചെയ്യാന്‍ അന്വേഷണ സംഘം ആലോച്ചിരുന്നു. ഇത് സംബന്ധിച്ച നീക്കം കേന്ദ്ര സര്‍ക്കാര്‍ ആരംഭിക്കുകയും ചെയ്യുന്നതിനിടെ ആരോപണ വിധേയനായ ഉദ്യോഗസ്ഥനെ യു എ ഇ തിരിച്ചു വിളിക്കുകയായിരുന്നു. അറ്റാഷെയുടെ മടങ്ങി പോക്ക് കേന്ദ്ര സര്‍ക്കാരിന്‍റെ അറിവോടെയാണെന്ന വിവരങ്ങളും പുറത്തുവന്നിട്ടുണ്ട്. ഇന്ത്യന്‍ സര്‍ക്കാരിനെ അറിയിച്ച ശേഷം യുഎഇ അറ്റാഷെയെ മടക്കി വിളിക്കുകയായിരുന്നു.

ഇതിനിടെ, യു.എ.ഇ കോണ്‍സുലേറ്റിലെ അറ്റാഷെയുടെ പേരിലുള്ള കത്ത് പുറത്തായിട്ടുണ്ട്. സരിത്ത് സ്വര്‍ണ്ണക്കടത്തിന് ഉപയോഗിച്ച കോണ്‍സുലേറ്റിലെ ഉദ്യോഗസ്ഥന്‍റെ പേരിലുള്ള കത്താണ് പുറത്തായത്. തന്‍റെ പേരില്‍ ബാഗേജ് അയക്കാന്‍ ഫൈസല്‍ ഫരീദിനെ ചുമതലപ്പെടുത്തുന്നതാണ് കത്തിന്‍റെ ഉള്ളടക്കത്തിലുള്ളത്. അറ്റാഷെ റാഷിദ് ഖാമിസ് അലി മുസൈഖിരിയുടെ പേരിലാണ് അധികാരപത്രം ഉള്ളത്. കത്ത് താന്‍ തയ്യാറാക്കിയതാണെന്ന് സരിത്ത് കസ്റ്റംസിന് മൊഴി നല്‍കിയിരുന്നു. കത്തില്‍ കോണ്‍സുലേറ്റ് ഉദ്യോഗസ്ഥന്‍റെ ഒപ്പിട്ടത് താനാണെന്നും സരിത്തിന്‍റെ മൊഴിയില്‍ പറഞ്ഞിട്ടുണ്ട്. ദുബൈയിലെ കരാമയില്‍ ഫൈസലിനൊപ്പം ജോലി ചെയ്തിരുന്നതായും സരിത്ത് മൊഴി നല്‍കി.