നയതന്ത്ര ബാഗേജിലൂടെ കടത്തിയ സ്വര്‍ണ്ണം സ്വപ്ന സുരേഷിന്റെ ഫ്ലാറ്റില്‍ എത്തിക്കുന്ന സിസി ടിവി ദൃശ്യങ്ങള്‍ എന്‍ ഐ എയ്ക്ക് ലഭിച്ചു. സരിത്തും സന്ദീപും സ്വപ്നയും ചേര്‍ന്ന് സ്വര്‍ണ്ണമടങ്ങിയ ബാഗ് സ്വപ്ന സുരേഷിന്റെ അമ്പലമുക്കിലെ ഫ്ലാറ്റിലേക്ക് കൊണ്ടുവരുന്ന ദൃശ്യങ്ങളാണ് അന്വേഷണ സംഘത്തിന് ലഭിച്ചിരിക്കുന്നത്. രാത്രിയിൽ ഉൾപ്പെടെ ബാഗുകളുമായി സ്വപ്ന ഫ്‌ളാറ്റിൽ എത്തിയിട്ടുണ്ട്‌.

ഒരു മാസം മുമ്പാണ് അമ്പലമുക്കിലെ ഫ്ലാറ്റ് സ്വപ്ന വാടകയ്ക്ക് എടുക്കുത്. സരിത്തും സ്വപ്നയും ചേര്‍ന്നാണ് ഫ്ലാറ്റ് നോക്കാന്‍ ആദ്യം പോകുന്നത്. പിന്നീട് കുടുംബസമേതം സ്വപ്ന ഇവിടേക്ക് താമസം മാറുകയായിരുന്നു. മിക്ക ദിവസങ്ങളിലും സന്ദീപും സരിത്തും ഫ്ലാറ്റില്‍ നിത്യ സന്ദര്‍ശകരായിരുന്നു.

നിത്യവും രാവിലെ ഫ്ളാറ്റില്‍ നിന്നാണ് സ്വപ്ന ജോലിക്ക് പോയിരുന്നത്. ആ സമയങ്ങളില്‍ ഹാന്‍ഡ് ബാഗ് മാത്രമാണ് കൈയ്യില്‍ ഉണ്ടാകുക. എന്നാല്‍, ചില ദിവസങ്ങളില്‍ തിരിച്ചെത്തുമ്പോള്‍ മറ്റൊരു ബാഗും കൈവശമുണ്ടാകുന്നതായി സിസിടിവി ദൃശ്യങ്ങള്‍ പറയുന്നു. ഇത് ശരിവയ്ക്കുന്ന മൊഴികള്‍ കസ്റ്റംസിന് ലഭിച്ചിട്ടുമുണ്ട്. ചില മൊഴികളുടെ അടിസ്ഥാനത്തില്‍ ദൃശ്യങ്ങള്‍ പരിശോധിച്ചപ്പോഴാണ് ഇത് കണ്ടെത്താനായത്. വിമാനത്താവളത്തില്‍ ബഗേജ് പിടിച്ചെടുത്തതിന് തൊട്ടടുത്ത ദിവസങ്ങളില്‍ ഫ്ലാറ്റില്‍ സൂക്ഷിച്ചിരുന്ന ബാഗുകള്‍ മാറ്റിയതായും കസ്റ്റംസിന് വിവരം ലഭിച്ചിട്ടുണ്ട്. ഒളിവില്‍ പോകുതിനുമുമ്പ് അറ്റാഷെയുമായി കൂടിക്കാഴ്ച നടത്തിയശേഷം ഫ്ലാറ്റിലെത്തിയ സ്വപ്ന കംപ്യൂട്ടര്‍, ലാപ്ടോപ് എന്നിവയില്‍ സൂക്ഷിച്ചിരുന്ന സാമ്പത്തിക ഇടപാടുകളുടെ വിവരങ്ങളും ചില ഫോട്ടോകളും ഡിലീറ്റ് ചെയ്യുകയുമുണ്ടായി.