- Malayalam Daily News - https://www.malayalamdailynews.com -

ഹരിയാനയില്‍ ഗോ മാംസം കടത്തിയെന്നാരോപിച്ച് യുവാവിനെ ക്രൂരമായി മര്‍ദ്ദിച്ചു

ഗോമാംസം കടത്തിയെന്ന സംശയത്തെത്തുടർന്ന് യുവാവിനെ ക്രൂരമായി മര്‍ദ്ദിച്ചതായി റിപ്പോര്‍ട്ട്. ഹരിയാനയിലെ ഗുഡ്ഗാവ് ജില്ലയിലാണ് വെള്ളിയാഴ്ച രാവിലെ സംഭവം നടന്നതെന്നും പ്രതികളിൽ ഒരാളെ അറസ്റ്റ് ചെയ്തതായും പോലീസ് പറഞ്ഞു. ഞായറാഴ്ച സംഭവത്തിന്റെ വീഡിയോ സമൂഹമാധ്യമങ്ങളില്‍ പ്രചരിച്ചതോടെയാണ് പുറം‌ലോകം വിവരമറിയുന്നത്.

വീഡിയോയിൽ, ഒരു കൂട്ടം ജനങ്ങള്‍ ലുക്ക്മാൻ എന്ന് തിരിച്ചറിഞ്ഞ 27 കാരനെ വലിച്ചിഴച്ച് മർദ്ദിക്കുന്നത് കാണാം. ഒരു വലിയ ജനക്കൂട്ടം നിശബ്ദമായി ആ രംഗം നിരീക്ഷിക്കുന്നുണ്ടായിരുന്നുവെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്തു.

വീഡിയോയിലെ പുരുഷന്മാരിലൊരാൾ ചുറ്റിക ഉപയോഗിച്ച് യുവാവിനെ ശാരീരികമായി ആക്രമിക്കുന്നതായും വീഡിയോയില്‍ കാണാം. ഇരയുടെ അരികിൽ ഒരു പോലീസുകാരനും നിൽക്കുന്നുണ്ടെന്നും റിപ്പോർട്ടിൽ പറയുന്നു.

നൂഹിൽ നിന്ന് ഗുഡ്ഗാവിലെ സദർ ബസാർ പ്രദേശത്തേക്ക് തന്റെ ട്രക്കില്‍ എരുമ മാംസം കടത്തുകയായിരുന്നുവെന്ന് യുവാവ് പോലീസിനോട് പറഞ്ഞു. ഗുഡ്ഗാവിലെത്തിയപ്പോൾ മോട്ടോർ സൈക്കിളുകളിൽ ചിലർ പിന്തുടരുന്നത് കണ്ട് ട്രക്ക് അതിവേഗം ഓടിച്ചുപോയെങ്കിലും ഇടയ്ക്ക് അവര്‍ തടസ്സപ്പെടുത്തി മര്‍ദ്ദിക്കുകയായിരുന്നുവെന്ന് പോലീസിനോട് പറഞ്ഞതായി പി ആര്‍ ഒ സുഭാഷ് ബോക്കൺ മാധ്യമങ്ങളോട് പറഞ്ഞു.

പിന്നീട് അവർ യുവാവിനെ സോഹ്‌നയ്ക്കടുത്തുള്ള മറ്റൊരു സ്ഥലത്തേക്ക് കൊണ്ടുപോയി മർദ്ദിക്കുകയും വാഹനത്തിന് കേടുപാടുകൾ വരുത്തുകയും ചെയ്തു. യുവാവിനെ ആശുപത്രിയിൽ പ്രവേശിപ്പിക്കുകയും കേസ് രജിസ്റ്റർ ചെയ്യുകയും ചെയ്തു. പ്രതികളിലൊരാളായ പ്രദീപ് യാദവിനെ അറസ്റ്റ് ചെയ്തതായും മറ്റുള്ളവരെ തിരിച്ചറിഞ്ഞതായും അദ്ദേഹം പറഞ്ഞു. അവരെ പിടികൂടാനുള്ള ശ്രമങ്ങൾ നടക്കുന്നുണ്ടെന്നും അദ്ദേഹം പറഞ്ഞു. ആക്രമണത്തിന്റെ പിന്നിലെ ലക്ഷ്യം വ്യക്തമല്ല, പക്ഷേ ഗോമാംസം കടത്തുന്നതിൽ സംശയമുണ്ടാകാം. ഇറച്ചിയുടെ സാമ്പിളുകൾ എടുത്തിട്ടുണ്ട്,’ അദ്ദേഹം കൂട്ടിച്ചേര്‍ത്തു.

യുവാവിനെ മര്‍ദ്ദിക്കുന്നതു കണ്ട് ഇടപെടാൻ ശ്രമിച്ചവരെ അക്രമികൾ ആക്രമിച്ചതായി മസ്ജിദ് മാർക്കറ്റ് പ്രസിഡന്റ് പറഞ്ഞു. അതേസമയം, ഇറച്ചി എരുമയാണെന്നും 50 വർഷമായി വാഹന ഉടമ ഈ ബിസിനസിൽ ഏർപ്പെട്ടിരിക്കുകയാണെന്നും എൻ‌ഡി‌ടി‌വി റിപ്പോർട്ട് ചെയ്തു. പരിശോധനയ്ക്കായി ഉദ്യോഗസ്ഥർ മാംസം ഒരു ലാബിലേക്ക് അയച്ചിട്ടുണ്ടെന്നും റിപ്പോര്‍ട്ടില്‍ പറയുന്നു.

ഹ്യൂമൻ റൈറ്റ്സ് വാച്ചിന്റെ കണക്കനുസരിച്ച് 2015 മുതൽ 2018 വരെ പശുവുമായി ബന്ധപ്പെട്ട അക്രമത്തിൽ 44 പേർ ഇന്ത്യയില്‍ കൊല്ലപ്പെട്ടിട്ടുണ്ട്.

ഇന്ത്യൻ പ്രധാനമന്ത്രി നരേന്ദ്ര മോദിയുടെ കീഴിൽ ന്യൂനപക്ഷങ്ങൾക്കെതിരായ വര്‍ഗീയപരമായ അതിക്രമങ്ങൾ വർദ്ധിച്ചതായി 2019 ൽ യുഎസ് സ്റ്റേറ്റ് ഡിപ്പാർട്ട്‌മെന്റ് റിപ്പോർട്ട് ചെയ്തിരുന്നു.

മുസ്ലീങ്ങളെയും താഴ്ന്ന ജാതിക്കാരായ ദലിതരെയും പ്രത്യേകിച്ചും ഗോമാംസം ഭക്ഷിക്കുന്നവരെ ലക്ഷ്യമിട്ടിട്ടുണ്ടെന്നും റിപ്പോര്‍ട്ടില്‍ പ്രത്യേകം പരാമര്‍ശിച്ചിട്ടുണ്ട്. അടുത്ത കാലത്തായി, കോപാകുലരായ ജനക്കൂട്ടം ഇന്ത്യയിലെ പാർശ്വവത്കരിക്കപ്പെട്ട ഗ്രൂപ്പുകളിൽ നിന്നുള്ള നിരവധി പേരെ, പ്രത്യേകിച്ച് മുസ്‌ലിംകളെയും പുരാതന ജാതിവ്യവസ്ഥയുടെ ഏറ്റവും താഴ്ന്ന ഭാഗത്തുള്ള ദലിതരെയും പശു കശാപ്പിനെക്കുറിച്ചുള്ള സംശയത്തെത്തുടർന്ന് കൊലപ്പെടുത്തിയിട്ടുണ്ട്.


Like our page https://www.facebook.com/MalayalamDailyNews/ [1] and get latest news update from USA, India and around the world. Stay updated with latest News in Malayalam, English and Hindi.
[2] [3] [4] [5] [6]