- Malayalam Daily News - https://www.malayalamdailynews.com -

കൊറോണ വൈറസ് ബാധയേറ്റ് മരിക്കുന്ന എല്ലാവരേയും കൊവിഡ് മരണപ്പട്ടികയില്‍ ഉള്‍പ്പെടുത്തേണ്ടെന്ന് സര്‍ക്കാര്‍

തിരുവനന്തപുരം: സംസ്ഥാനത്ത് കൊറോണ വൈറസ് ബാധയേറ്റ് മരിക്കുന്ന എല്ലാവരേയും കോവിഡ്-19 മരണപ്പട്ടികയില്‍ ഉള്‍പ്പെടുത്തേണ്ടെന്ന് സര്‍ക്കാര്‍. ഈ തീരുമാനത്തിനെതിരെ ഇപ്പോള്‍ വിമര്‍ശനം ശക്തമാകുകയാണ്. കഴിഞ്ഞ രണ്ടാഴ്ചയ്ക്കിടെയാണ് ഇത്തരത്തിലുള്ള ‘തരംതിരിവ്’ സര്‍ക്കാര്‍ കാണിച്ചുതുടങ്ങിയത്. ആദ്യ അഞ്ച് മാസം ഇങ്ങിനെയല്ലായിരുന്നു. കൊവിഡ് പോസിറ്റീവ് ആയി മരിച്ച 39 പേരെ കൊവിഡ് മരണപ്പട്ടികയില്‍ സര്‍ക്കാര്‍ ഇതുവരെ ഉള്‍പ്പെടുത്തിയിട്ടില്ല. ഇതില്‍ 31 പേരും ജൂലൈ 20ന് ശേഷം മരിച്ചവരാണ്.

അതേസമയം ആരോഗ്യവകുപ്പിന്റെ ദിവസേനയുള്ള ബുള്ളറ്റിനില്‍ ഈ മരണങ്ങള്‍ ഉള്‍പ്പെടുത്തിയിരുന്നു. പക്ഷേ, ഇന്നലെ മുതല്‍ അതും ഒഴിവാക്കി. അതായത് കൊവിഡ് പോസിറ്റീവ് ആയി മരിച്ചവരില്‍ 30 ശതമാനത്തിലേറെപ്പേരുടെ മരണകാരണം കൊവിഡ് അല്ലെന്നാണ് സര്‍ക്കാര്‍ നിലപാടെടുത്തിരിക്കുന്നത്. പ്ലാസ്മ തെറപ്പി നല്‍കി ജീവന്‍ രക്ഷിക്കാന്‍ ശ്രമിച്ചവരെപ്പോലും സര്‍ക്കാര്‍ ഒഴിവാക്കിയിരിക്കുകയാണ്. നിലവില്‍ 82 പേരാണ് സര്‍ക്കാരിന്റെ കൊവിഡ് മരണപ്പട്ടികയിലുള്ളത്.

എന്നാല്‍ ലോകാരോഗ്യ സംഘടനയുടെ മാര്‍ഗനിര്‍ദേശപ്രകാരമാണ് കൊവിഡ് മരണങ്ങള്‍ രേഖപ്പെടുത്തുന്നതെന്നായിരുന്നു മുഖ്യമന്ത്രിയുടെ വിശദീകരണം. പക്ഷേ, ഇത് ശരിയല്ലെന്ന് ലോകാരോഗ്യ സംഘടനയുടെ മാര്‍ഗനിര്‍ദേശങ്ങള്‍ വ്യക്തമാക്കിക്കൊണ്ട് മെഡിക്കല്‍ രംഗത്തെ വിദഗ്ധര്‍ പറയുന്നു.

ലോകാരോഗ്യ സംഘടനയുടെ മാര്‍ഗനിര്‍ദേശങ്ങള്‍ ഇവയാണ്…

അപകടമരണം പോലെ തികച്ചും വ്യത്യസ്തമായ കാരണം കൊണ്ടല്ല കൊവിഡ് നിര്‍ണയിച്ച ഒരാള്‍ മരിക്കുന്നതെങ്കില്‍ അത് കൊവിഡ് മൂലമുള്ള മരണമായി കണക്കാക്കാം.

കൊവിഡ് ബാധയെ തീവ്രമാക്കാന്‍ സാധ്യതയുള്ള കാന്‍സര്‍ പോലെയുള്ള മറ്റ് രോഗം കൂടിയുണ്ടെങ്കിലും മരണകാരണം അതാണെന്ന് പറയാന്‍ പറ്റില്ല.

മരണം സംഭവിച്ചത് ഹൃദ്രോഗം പോലെ മറ്റേതെങ്കിലും നേരിട്ടുള്ള കാരണം കൊണ്ടാവുകയും കൊവിഡ് ബാധ അതിന് സഹായകമാവുകയും ചെയ്താല്‍ മരണത്തിലേക്ക് നയിച്ച രണ്ടാമത്തെ കാരണമായി കൊവിഡ് രേഖപ്പെടുത്തണം.


Like our page https://www.facebook.com/MalayalamDailyNews/ [1] and get latest news update from USA, India and around the world. Stay updated with latest News in Malayalam, English and Hindi.
[2] [3] [4] [5] [6]