ദോഹ: 74 മത് ഇന്ത്യൻ സ്വാതന്ത്ര്യ ദിനത്തോടനുബന്ധിച്ചു കൾച്ചറൽ ഫോറം ഖത്തർ സ്വാതന്ത്രമാണിന്ത്യ എന്ന തലക്കെട്ടിൽ സെമിനാർ സംഘടിപ്പിച്ചു. വെൽഫെയർ പാർട്ടി സംസ്ഥാന പ്രസിഡന്റ്‌ ഹമീദ് വാണിയമ്പലം ഉദ്ഘാടനം ചെയ്തു.

ജനാധിപത്യ വിരുദ്ധവും മതനിരപേക്ഷതക്ക് വിരുദ്ധവുമായ വംശീയ അജണ്ടകൾ ആണ് സ്വാതന്ത്ര ഇന്ത്യ നേരിടുന്ന ഏറ്റവും വലിയ വെല്ലുവിളി എന്നും ഈ സ്വാതന്ത്ര്യം ആഘോഷിക്കേണ്ടത് മത നിരപേക്ഷതയെ സംരക്ഷിക്കാനും വംശീയതക്കെതിരെ സംസാരി ച്ചുകൊണ്ടുമായിരിക്കണം എന്നും അദ്ദേഹം ഉദ്ഘാടന പ്രസംഗത്തിൽ സൂചിപ്പിച്ചു. പ്രശസ്ത എഴുത്തുകാരനും രാഷ്ട്രീയ നിരീകഷകനുമായ ഡോ. ടി ടി ശ്രീകുമാർ, മീഡിയ വൺ മാനേജിങ് എഡിറ്റർ സി ദാവൂദ് തുടങ്ങിയവർ സംസാരിച്ചു.

കൾച്ചറൽ ഫോറം ആക്ടിങ് പ്രസിഡന്റ്‌ മുഹമ്മദ്‌ കുഞ്ഞി അധ്യക്ഷത വഹിച്ച പരിപാടിയിൽ വൈസ് പ്രസിഡന്റ്‌ ശശിധര പണിക്കർ സമാപന പ്രഭാഷണം നിർവ്വഹിച്ചു. കൃഷ്ണ കുമാർ, വിമൽ വാസുദേവ്, അക്ബർ ചാവക്കാട് എന്നിവർ കവിത, ഗാന ആലാപനം നടത്തി. സംസ്ഥാന സമിതി അംഗം അനീസ് റഹ്മാൻ മാള, ഷാഹിദ് മുഹമ്മദലി എന്നിവർ പരിപാടി നിയന്ത്രിച്ചു.