ലൈംഗിക പീഡന കേസുകൾ രജിസ്റ്റർ ചെയ്യുന്നതിനും ബലാത്സംഗത്തിനും കുട്ടികളെ ദുരുപയോഗം ചെയ്യുന്നതിനും കടുത്ത ശിക്ഷ നൽകുന്നതിനും ഫലപ്രദമായ പോലീസ് നടപടി ഉറപ്പാക്കുന്നതിനുമായി മൂന്ന് ഘട്ട ബിൽ തങ്ങളുടെ സർക്കാർ ഉടൻ അവതരിപ്പിക്കുമെന്ന് പാക്കിസ്താന്‍ പ്രധാനമന്ത്രി ഇമ്രാൻ ഖാൻ പറഞ്ഞു.

ഫിനാൻഷ്യൽ ആക്ഷൻ ടാസ്ക് ഫോഴ്സുമായി ബന്ധപ്പെട്ട നിരവധി ബില്ലുകൾ പാസാക്കിയതിന് ശേഷം ബുധനാഴ്ച പാർലമെന്റിന്റെ ഇരുസഭകളുടെയും സംയുക്ത സമ്മേളനത്തിൽ സംസാരിക്കവെയാണ് ഖാൻ ഇക്കാര്യം അറിയിച്ചത്. ഇത്തരം സംഭവങ്ങൾ ഇരകളുടെ ജീവിതത്തെ നശിപ്പിക്കുകയും അവരുടെ കുടുംബങ്ങളും ദുരിതത്തിലേക്ക് തള്ളിവിടുകയും ചെയ്യുന്നുണ്ടെന്ന് അദ്ദേഹത്തെ ഉദ്ധരിച്ച് പാക് മാധ്യമങ്ങള്‍ റിപ്പോര്‍ട്ട് ചെയ്തു.

സെപ്റ്റംബർ 9 ന് ലാഹോറിലെ ഒരു ഹൈവേയ്ക്ക് സമീപം ഒരു ഫ്രഞ്ച്-പാക്കിസ്താന്‍ യുവതി തന്റെ മൂന്ന് കുട്ടികൾക്കു മുന്നിൽ കൂട്ടബലാത്സംഗത്തിനിരയായ സംഭവത്തെ പരാമർശിച്ചാണ് ഖാൻ ഇക്കാര്യം പറഞ്ഞത്. ഈ സംഭവം രാജ്യത്ത് വ്യാപകമായി പ്രതിഷേധം അരങ്ങേറി. കേസിലെ പ്രതികളെ തിങ്കളാഴ്ച അറസ്റ്റ് ചെയ്യുകയും കുറ്റം സമ്മതിക്കുകയും ചെയ്തിട്ടുണ്ട്. കൂട്ടബലാത്സംഗക്കേസിലെ പ്രധാന പ്രതി ഒരു സ്ഥിരം കുറ്റവാളിയാണെന്ന് ഖാൻ പരാമർശിച്ചു.

ഇത്തരത്തിലുള്ള കുറ്റകൃത്യങ്ങൾ ചെയ്യുന്നവർ പതിവ് കുറ്റവാളികളാണെന്ന് ആഗോള ഡാറ്റ കാണിക്കുന്നുണ്ടെന്നും അവയുമായി ബന്ധപ്പെട്ട വിവരങ്ങളുടെ ഡാറ്റ തയ്യാറാക്കേണ്ടത് പ്രധാനമാണെന്നും അദ്ദേഹം പറഞ്ഞു. ബിൽ തയ്യാറാക്കുന്നത് ബലാത്സംഗത്തിനും കുട്ടികളെ ദുരുപയോഗം ചെയ്യുന്നവർക്കും കർശനമായ ശിക്ഷ നൽകുമെന്ന് മാത്രമല്ല, ലൈംഗിക ചൂഷണക്കാരെ രജിസ്റ്റർ ചെയ്യുന്നതിനും ഫലപ്രദമായ പോലീസ് നടപടി സ്വീകരിക്കുന്നതിനും ഇത് വ്യവസ്ഥ ചെയ്യുമെന്നും ഖാൻ പറഞ്ഞു.