പാറ്റ്‌ന: ഗുജറാത്ത് മുഖ്യമന്ത്രി നരേന്ദ്ര മോഡി ബീഹാറില്‍ പ്രവേശിക്കുന്നത് തടയാന്‍ ബീഹാര്‍ മുഖ്യമന്ത്രി നിതീഷ് കുമാറിന് കഴിയില്ലെന്ന് ആര്‍.ജെ.ഡി നേതാവ് റബ്രി ദേവി. മോഡിയെ തടയാനുള്ള ശക്തി നിതീഷ് കുമാറിനില്ലെന്നും അവര്‍ കൂട്ടിച്ചേര്‍ത്തു.

1990ല്‍ എല്‍.കെ അദ്വാനി നയിച്ച രഥയാത്ര ബീഹാറില്‍ പ്രവേശിക്കുന്നത് തടയാന്‍ തന്റെ ഭര്‍ത്താവായ ലാലുപ്രസാദിന് കഴിഞ്ഞിരുന്നുവെന്നും റബ്രിദേവി പറഞ്ഞു. ഒക്ടോബര്‍ 23നായിരുന്നു സമസ്തിപൂരില്‍ വച്ച് അദ്വാനിയെ പോലീസ് അറസ്റ്റ് ചെയ്തത്.

ബിജെപിക്കോ നരേന്ദ്ര മോഡിക്കോ ബീഹാറില്‍ യാതൊരു സ്വാധീനവും ചെലുത്താന്‍ കഴിയില്ലെന്നും റബ്രി ദേവി പറഞ്ഞു. കാലിത്തീറ്റ കുംഭകോണക്കേസില്‍ ഭര്‍ത്താവ് ലാലു പ്രസാദ് യാദവ് അറസ്റ്റിലായതോടെ പാര്‍ട്ടിയെ നയിക്കുന്നത് റബ്രി ദേവിയാണ്.