കൊച്ചി: ദിലീപ് ഉള്‍പ്പെട്ട നടിയെ ആക്രമിച്ച കേസിലെ പ്രധാന സാക്ഷിക്ക് നിരന്തര ഭീഷണിയെന്ന് പരാതി. ദിലീപ് ജയില്‍‌വാസം അനുഭവിച്ച ഈ കേസ് കേരളത്തില്‍ ഏറെ ഒച്ചപ്പാടുണ്ടാക്കിയതാണ്. ഇതിനോടകം നിരവധി സാക്ഷികള്‍ കൂറു മാറുകയും ചെയ്തു. പൊന്നമ്മ ബാബു,ഇടവേള ബാബു,സിദ്ദിഖ് ഭാമ എന്നിവരടക്കം കൂറുമാറിയിരുന്നു .നടിയെ ആക്രമിച്ച കേസിൽ മൊഴി മാറ്റാൻ ഭീഷണിയുണ്ടെന്ന് മുഖ്യസാക്ഷി വിപിന്‍ ലാലാണ് പരാതി നല്‍കിയിരിക്കുന്നത്. പൊലീസിന് നൽകിയ മൊഴി കോടതിയിൽ തിരുത്തണമെന്ന് ഭീഷണിപ്പെടുത്തിയതായി വിപിൻ ലാൽ പൊലീസിന് നൽകിയ പരാതിയിൽ പറയുന്നു.

ഫോണിലൂടേയും കത്തിലൂടേയും ഭീഷണിയുണ്ടെന്നാണ് വിപിൻലാൽ പരാതിയിൽ പറയുന്നത്. പരാതിയിൽ പൊലീസ് കേസെടുത്തിട്ടുണ്ട്. സാക്ഷി മൊഴി നൽകാനുള്ള ദിവസം അടുത്തു വരുന്നതിനിടെയാണ് തനിക്ക് ഭീഷണി വരുന്നതെന്ന് വിപിൻ പരാതിയിൽ പറയുന്നു.

കാസർഗോഡ് സ്വദേശിയാണ് വിപിൻ ലാൽ. വിപിന്റെ പരാതിയിൽ ബേക്കൽ പൊലീസ് 195 എ, 506 വകുപ്പുകൾ പ്രകാരം കേസെടുത്തിട്ടുണ്ട്. കേസിൽ ആരേയും പ്രതിചേർത്തിട്ടില്ലെന്നും അന്വേഷണം തുടങ്ങിയതായും പൊലീസ് പറഞ്ഞു.