സംസ്ഥാനത്ത് കോവിഡ്-19 വ്യാപനം വര്‍ദ്ധിച്ചു വരുന്ന സാഹചര്യത്തില്‍ ശബരിമല വീണ്ടും തുറക്കുമ്പോള്‍ കര്‍ശന നിബന്ധനകള്‍ പാലിക്കേണ്ടതിന്റെ ആവശ്യകതയും പാലിക്കേണ്ട പ്രോട്ടോക്കോള്‍ വിവരവും വിദഗ്ദ്ധ സമിതി സർക്കാരിന് റിപ്പോർട്ട് സമർപ്പിച്ചു. ഇത്തവണത്തെ മണ്ഡല മകരവിളക്ക് സീസണിൽ സാധാരണ ദിവസങ്ങളിൽ സന്നിധാനത്ത് 1,000 പേരെ മാത്രം പ്രവേശിപ്പിച്ചാൽ മതിയെന്ന് വിദ​ഗ്ധ സമിതിയുടെ നിർദേശം.

വിദഗ്‌ധ സമിതിയുടെ നിർദേശങ്ങൾ പരിശോധിച്ച് സംസ്ഥാന സർക്കാർ നാളെ അന്തിമ തീരുമാനമെടുക്കുമെന്ന് ദേവസ്വം മന്ത്രി കടകംപള്ളി സുരേന്ദ്രൻ പറഞ്ഞു. ബുധനാഴ്ച മുഖ്യമന്ത്രിയുമായി നടത്തുന്ന ചർച്ചയ്ക്ക് ശേഷം മന്ത്രിസഭാ യോ​ഗത്തിൽ ആയിരിക്കും അന്തിമ തീരുമാനം എടുക്കുക.

ചീഫ് സെക്രട്ടറിയുടെ നേതൃത്വത്തിലുള്ള വിദഗ്‌ധ സമിതിയാണ് മണ്ഡല-മകരവിളക്ക് തീർത്ഥാടന നടത്തിപ്പ് സംബന്ധിച്ച റിപ്പോര്‍ട്ട് നല്‍കിയത്.

മണ്ഡലപൂജ ഉൾപ്പെടെയുള്ള വിശേഷ ദിവസങ്ങളിൽ 5000 പേരെ വരെ പ്രവേശിപ്പിക്കാമെന്നും വിദഗ്ധ സമിതി നിർദ്ദേശിക്കുന്നു. 10 നും 60 നും മധ്യേ പ്രായമുള്ളവർക്ക് മാത്രമായിരിക്കും പ്രവേശനം. മണ്ഡല- മകരവിളക്ക് തീർത്ഥാടന സമയത്ത് എത്ര തീർത്ഥാടകരെ പ്രവേശിപ്പിക്കാം, എന്തെല്ലാം മുൻകരുതൽ സ്വീകരിക്കണം തുടങ്ങിയ കാര്യങ്ങൾ നിർദേശിക്കാനാണ് ചീഫ് സെക്രട്ടറി അധ്യക്ഷനായ സമിതിയെ സർക്കാർ നിയോഗിച്ചത്.

തിരുപ്പതി മാതൃകയില്‍ ഓണ്‍ലൈനായി ദര്‍ശനം അനുവദിക്കുന്നത് പരിഗണിക്കണമെന്ന് റിപ്പോർട്ടിലുണ്ട്. ഇക്കാര്യത്തിൽ തന്ത്രിയുടെ കൂടി അഭിപ്രായമറിഞ്ഞേ സർക്കാർ തീരുമാനമെടുക്കൂ. തിങ്കൾ മുതൽ വെള്ളി വരെയുള്ള ദിവസങ്ങളിൽ പ്രതിദിനം ആയിരം തീർത്ഥാടകർക്ക് പ്രവേശനവും ശനി, ഞായർ ദിവസങ്ങളിൽ പരമാവധി രണ്ടായിരം തീർത്ഥാടകരെ വരെ അനുവദിക്കാം.

പത്ത് വയസിനു താഴെയുള്ളവർക്കും അറുപത് വയസിനു മുകളിലുള്ളവർക്കും വിലക്ക്. കോവിഡ് നെഗറ്റീവ് സർട്ടിഫിക്കറ്റ് അടക്കമായിരിക്കണം തീർത്ഥാടകർ രജിസ്റ്റർ ചെയ്യേണ്ടത്.

കോവിഡ് നെഗറ്റീവ് സര്‍ട്ടിഫിക്കറ്റ് ഉണ്ടെങ്കിലും എല്ലാവര്‍ക്കും നിലയ്‌ക്കലിൽവച്ച് ആന്റിജൻ പരിശോധന. പരമ്പരാഗത കാനനപാതയില്‍ യാത്ര അനുവദിക്കരുതെന്നും പമ്പവഴിയുള്ളതല്ലാത്ത എല്ലാവഴിയും വനം വകുപ്പ് അടയ്ക്കണമെന്നും വിദഗ്‌ധ സമിതി നൽകിയ റിപ്പോർട്ടിൽ നിർദേശിക്കുന്നു.