വാഷിംഗ്ടണ്‍: തിരഞ്ഞെടുപ്പില്‍ തന്റെ ഡെമോക്രാറ്റിക് എതിരാളി ജോ ബൈഡനോട് തോറ്റാൽ താന്‍ അമേരിക്ക വിട്ടുപോകുമെന്ന് യുഎസ് പ്രസിഡന്റ് ഡൊണാൾഡ് ട്രംപ് ഭീഷണിപ്പെടുത്തി.

“എന്താണെന്ന് നിങ്ങൾക്കറിയാം? അമേരിക്കൻ രാഷ്ട്രീയ ചരിത്രത്തിലെ ഏറ്റവും മോശം സ്ഥാനാർത്ഥിക്കെതിരെ മത്സരിക്കുന്നത് എന്നെ സമ്മർദ്ദത്തിലാക്കുന്നു,”ജോർജിയയിലെ മക്കോണിൽ വെള്ളിയാഴ്ച നടന്ന പ്രചാരണ റാലിയിൽ ട്രംപ് പറഞ്ഞു.

അടുത്ത മാസം നടക്കാനിരിക്കുന്ന 2020 ലെ പ്രസിഡന്റ് തിരഞ്ഞെടുപ്പ് മത്സരത്തില്‍ താന്‍ തോറ്റാല്‍ മറ്റൊരു രാജ്യത്തേക്ക് എനിക്ക് പോകേണ്ടിവരുമെന്ന് ട്രംപ് ജനക്കൂട്ടത്തോട് പറഞ്ഞു.

“ഞാൻ തോറ്റാൽ എന്തായിരിക്കുമെന്ന് നിങ്ങൾക്ക് ഊഹിക്കാമോ? എന്റെ ജീവിതകാലം മുഴുവൻ ഞാൻ എന്തു ചെയ്യും? ഞാൻ പറയാൻ പോകുന്നത്, രാഷ്ട്രീയ ചരിത്രത്തിലെ ഏറ്റവും മോശം സ്ഥാനാർത്ഥിയോട് ഞാൻ പരാജയപ്പെട്ടു! എനിക്ക് അതത്ര സുഖം തോന്നുന്നില്ല. ഒരുപക്ഷേ എനിക്ക് രാജ്യം വിടേണ്ടിവരും, എനിക്കറിയില്ല,”ട്രംപ് കൂട്ടിച്ചേർത്തു.

രണ്ടാം തവണ അധികാരമേൽക്കുന്നതിൽ പരാജയപ്പെട്ടാൽ ട്രംപ് ഒന്നിലധികം പ്രോസിക്യൂഷനുകൾ നേരിടേണ്ടി വരും. അതിനുപുറമെ, പ്രസിഡന്റ് സ്ഥാനത്തിരുന്നുകൊണ്ട് നടത്തിയ കോഴ, അഴിമതി എന്നീ ആരോപണങ്ങള്‍ക്കും മറുപടി പറയേണ്ടി വരും.