വാഷിംഗ്ടണ്‍: സുരക്ഷിതവും ഫലപ്രദവുമായ കോവിഡ് വാക്സിൻ വികസിപ്പിക്കുന്നതിൽ തന്റെ സർക്കാർ മുൻപന്തിയിലാണെന്ന് യുഎസ് പ്രസിഡന്റ് ഡൊണാൾഡ് ട്രംപ് പറഞ്ഞു. മറ്റേതൊരു സർക്കാരിനും കോവിഡ് വാക്സിൻ നിർമ്മിക്കാൻ കുറഞ്ഞത് അഞ്ച് വർഷമെങ്കിലും എടുക്കുമെന്നും അതുകൊണ്ട് ഇത് പലരുടെയും ജീവൻ രക്ഷിക്കുമെന്നും ഇക്കാര്യത്തിൽ രാഷ്ട്രീയം കളിക്കരുതെന്നും ട്രംപ് പറഞ്ഞു.

ചില രാഷ്ട്രീയ കാരണങ്ങളാൽ ന്യൂയോർക്ക് സംസ്ഥാന ഗവർണർ വാക്സിനുകൾ വിതരണം ചെയ്യാൻ അനുവദിക്കുന്നില്ല. ഇത് നല്ല ആശയമാണെന്ന് താൻ കരുതുന്നില്ലെന്നും എന്നാൽ വാക്സിൻ നീട്ടിക്കൊണ്ട് അവർ രാഷ്ട്രീയം കളിക്കാൻ ശ്രമിക്കുകയാണെന്നും ട്രംപ് പറഞ്ഞു. ഏപ്രിലിൽ ന്യൂയോർക്ക് ഒഴികെ രാജ്യത്തിന്റെ മറ്റു ഭാഗങ്ങളിൽ കോവിഡ് വാക്സിൻ വിതരണം ചെയ്യുമെന്ന് ട്രംപ് നേരത്തെ പറഞ്ഞിരുന്നു. ന്യൂയോർക്ക് സ്റ്റേറ്റ് വാക്സിൻ സ്വീകരിക്കാൻ തയ്യാറാണെങ്കിൽ വാക്സിൻ വിതരണം ചെയ്യുമെന്നും ട്രംപ് പറഞ്ഞു. അംഗീകാരം ലഭിക്കുന്നത് വരെ വാക്‌സിൻ ന്യൂയോർക്കിലെത്തിക്കില്ലെന്നും ഇത് പറയുന്നതിൽ തനിക്ക് വേദനയുണ്ടെന്നും ട്രംപ് പറഞ്ഞു. വാക്‌സിൻ 90 ശതമാനത്തിലധികം സുരക്ഷിതവും ഫലപ്രദവുമാണ്. എന്നാൽ ഇത് വിതരണം ചെയ്യണമെങ്കിൽ ന്യൂയോർക്ക് ഗവർണർ ആവശ്യപ്പെടണമെന്നും ട്രംപ് വ്യക്തമാക്കി.