തിരുവനന്തപുരം: ലൈഫ് മിഷന്‍ കേസ് അന്വേഷണത്തിൽ ഇഡിയുടെ കണ്ടെത്തല്‍ സ്വർണ്ണക്കടത്ത് കേസിൽ എൻഐഎയ്ക്കും കസ്റ്റംസിനും തിരിച്ചടിയായി. സ്വപ്‌ന സുരേഷിന്റെ ലോക്കറിൽ നിന്ന് കണ്ടെത്തിയ ഒരു കോടി രൂപ എം ശിവശങ്കറിന് കിട്ടിയ കൈക്കൂലിയാണെന്നാണ് ഇഡിയുടെ കണ്ടെത്തല്‍.

സ്വർണ്ണക്കടത്തിന്റെ പണം സ്വപ്‌നയുടെ ലോക്കറിൽ നിന്ന് ലഭിച്ചതായാണ് കസ്റ്റംസും എൻഐഎയും പറഞ്ഞിരുന്നത്. ശിവശങ്കറിന്റെ ജാമ്യാപേക്ഷയ്‌ക്കെതിരെ പ്രിൻസിപ്പൽ സെഷൻസ് കോടതിയിൽ സമർപ്പിച്ച എതിര്‍ സത്യവാങ്മൂലത്തിൽ ഇ ഡി നടത്തിയ വെളിപ്പെടുത്തൽ ഇതുവരെയുള്ള സ്വർണ്ണക്കടത്ത് സംബന്ധിച്ച അന്വേഷണത്തെ ബാധിക്കാന്‍ സാധ്യതയുണ്ട്. ലൈഫ് മിഷൻ കരാറിലൂടെ ശിവശങ്കറിന് കൈക്കൂലിയായി ലഭിച്ച സ്വപ്ന ലോക്കറിൽ സൂക്ഷിച്ചിട്ടുണ്ടെന്നും ശിവശങ്കറിനെ രക്ഷിക്കാൻ സ്വപ്‌ന നുണ പറഞ്ഞതായാണ് ഇഡിയുടെ കണ്ടെത്തല്‍.

ലോക്കറിലെ പണം സ്വര്‍ണക്കടത്തിലേതല്ലെന്നു വ്യക്തമായാല്‍ നിലവിലെ അന്വേഷണത്തെ കാര്യമായി ബാധിക്കും. പുതിയ കണ്ടെത്തലിന്‍റെ അടിസ്ഥാനത്തില്‍ ശിവശങ്കറിനെ തിങ്കളാഴ്ച കസ്റ്റംസ് ചോദ്യം ചെയ്യും. തിരുവനന്തപുരം എസ്ബിഐയിലെ സ്വപ്ന സുരേഷിന്‍റെ ലോക്കറില്‍നിന്ന് 64 ലക്ഷവും ഫെഡറല്‍ ബാങ്ക് സ്റ്റാച്യൂ ശാഖയിലെ ലോക്കറില്‍നിന്ന് 46.50 ലക്ഷവുമാണ് എന്‍ഐഎ കണ്ടെടുത്തത്. ഈ തുക സ്വര്‍ണക്കടത്തില്‍ പ്രതിയുണ്ടാക്കിയ പണമാണെന്ന കണ്ടെത്തലിന്‍റെ അടിസ്ഥാനത്തിലാണ് എന്‍ഐഎ അന്വേഷണം തുടങ്ങിയത് തന്നെ. കസ്റ്റംസും ഈ നിരീക്ഷണത്തോട് യോജിക്കുന്ന കണ്ടെത്തലുകളാണ് നടത്തിയത്. കെ.ടി.റമീസാണ് സ്വര്‍ണക്കടത്തിന്‍റെ സൂത്രധാരനെന്നായിരുന്നു ഇരു ഏജന്‍സികളും വ്യക്തമാക്കിയത്.

സ്വര്‍ണക്കടത്തിന്‍റെ സൂത്രധാരന്‍ ശിവശങ്കറാണെന്നും ഇഡി പറയുന്നു. ഇതോടെ വെട്ടിലായത് മറ്റ് ഏജന്‍സികളാണ്. ലോക്കറിലെ പണം സ്വര്‍ണക്കടത്തിലേതല്ലെങ്കില്‍ എന്‍ഐഎയ്ക്കും കസ്റ്റംസിനും തുടരന്വേഷണം ദുഷ്കരമാകും.എന്‍ഐഎയും കസ്റ്റംസും ഇതുവരെ കോടതിയില്‍ നല്‍കിയ രേഖകളിലെല്ലാം ഈ പണം സ്വര്‍ണക്കടത്തി ലേതാണ് എന്ന് ആവര്‍ത്തിച്ച് പറഞ്ഞിട്ടുണ്ട്. എന്‍ഫോഴ്സ്മെന്‍റിന്‍റെ പുതിയ വാദത്തോടെ ശിവശങ്കറിനെ എന്‍ഐഎയ്ക്കും കസ്റ്റംസിനും വീണ്ടും ചോദ്യം ചെയ്യേണ്ടി വരുന്ന സ്ഥിതിയായി. എന്നാൽ എന്‍ഐ എ വിഷയത്തിൽ ഇതുവരെ നിലപാട് വ്യക്തമാക്കിയിട്ടില്ല.