Flash News

വിമർശനത്തോട് അസഹിഷ്ണുത പുലർത്തുന്ന സ്വേച്ഛാധിപതികളാണ് മോദിയും പിണറായിയും: മുല്ലപ്പള്ളി രാമചന്ദ്രന്‍

November 22, 2020

സൈബർ ആക്രമണം തടയുന്നതിനായി പോലീസ് നിയമത്തിൽ സംസ്ഥാന സർക്കാർ ഭേദഗതി വരുത്തിയത് മാധ്യമങ്ങളുടെ വായ് മൂടിക്കെട്ടാനും നിർഭയമായ അഭിപ്രായ സ്വാതന്ത്ര്യത്തിന് വിലക്കേര്‍പ്പെടുത്താനുമാണെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ പറഞ്ഞു. ഇതൊരു തരം ഫാസിസമാണെന്നും അദ്ദേഹം കൂട്ടിച്ചേര്‍ത്തു.

സ്വർണക്കടത്ത്, മയക്കുമരുന്ന് ഇടപാട്, കള്ളപ്പണം വെളുപ്പിക്കൽ, ബിനാമി ഭൂമി ഇടപാട് എന്നിവ ഉൾപ്പെടെയുള്ള ഗുരുതരമായ ആരോപണങ്ങളും തെളിവുകളും എല്ലാ ദിവസവും സർക്കാരിനെയും മന്ത്രിമാരെയും കേന്ദ്രീകരിച്ച് പുറത്തുവരുന്നു. ഇവയിൽ പലതും മാധ്യമങ്ങൾ പുറത്തുകൊണ്ടുവന്നു. സർക്കാരിനെതിരായ പ്രതിപക്ഷ ശബ്ദങ്ങൾ നിശബ്ദമാക്കാനുള്ള ഗൂഢാലോചനയുടെ ഭാഗമാണ് ഈ പത്രമാരണ നിയമം. സർക്കാരിനെ വിമർശിക്കുന്നവരെ ജയിലിലടയ്ക്കാനുള്ള ഫാസിസ്റ്റ് നിയമമാണ് മുഖ്യമന്ത്രി നടപ്പാക്കുന്നതെന്ന് മുല്ലപ്പള്ളി പറഞ്ഞു.

അഭിപ്രായ സ്വാതന്ത്ര്യം ഹനിക്കുന്ന 2000ലെ ഐടി ആക്ടിലെ 66 എ, 2011 ലെ കേരള പോലീസ് ആക്ട് 118(ഡി) വകുപ്പുകള്‍ സുപ്രീംകോടതി റദ്ദാക്കിയിരുന്നു. ഇത്തരമൊരു കരിനിയമത്തെ കുറിച്ച് സിപിഎം ജനറല്‍ സെക്രട്ടറി സീതാറാം യെച്ചൂരി എന്തുകൊണ്ട് പ്രതികരിക്കാന്‍ തയ്യാറായില്ല. യെച്ചൂരിയുടെ മൗനം ഈ കരിനിയമത്തെ പൂര്‍ണ്ണമായും അനുകൂലിക്കുന്നതിന് തുല്യമാണ്. ഇത് ദൗര്‍ഭാഗ്യകരമാണ്. മാധ്യമസ്വാതന്ത്ര്യം തകര്‍ക്കുന്ന നരേന്ദ്ര മോദിയുടെ പാതയില്‍ തന്നെയാണ് മുഖ്യമന്ത്രിയും സഞ്ചരിക്കുന്നത്. വിമര്‍ശനങ്ങളെ അസഹിഷ്ണുതയോടെ നേരിടുന്ന ഏകാധിപതികളാണ് ഇരുവരും. ബിജെപിയുടെ മാധ്യമവിരുദ്ധ നയങ്ങളാണ് കേരളത്തില്‍ മുഖ്യമന്ത്രി നടപ്പാക്കുന്നതെന്നും മുല്ലപ്പള്ളി പറഞ്ഞു.

പത്രമാരണ നിയമം ജനാധിപത്യവിരുദ്ധവും മൗലികാവകാശങ്ങളുടെ ലംഘനവുമാണ്. വാറന്റില്ലാതെ അറസ്റ്റ് ചെയ്യാനുള്ള അധികാരം പോലീസിന് നൽകുന്ന ഈ ഭേദഗതി വ്യാപകമായി ദുരുപയോഗം ചെയ്യപ്പെടാൻ സാധ്യതയുണ്ട്. സ്ത്രീകൾക്കെതിരായ അതിക്രമങ്ങളും സൈബർ കുറ്റകൃത്യങ്ങളും കർശനമായി തടയണം. എന്നാൽ ഇത്തരമൊരു കരിനിയമത്തിലൂടെയല്ല അതിനെ നേരിടേണ്ടത്. സ്വതന്ത്രവും നിർഭയവുമായ പത്രപ്രവർത്തനത്തെ നിയന്ത്രിക്കുകയും പത്രപ്രവർത്തകരെ തടവിലാക്കുകയും ചെയ്യുന്ന പത്രസ്വാതന്ത്ര്യ നിയമം ഒരിക്കലും അംഗീകരിക്കാൻ കഴിയില്ലെന്ന് മുല്ലപ്പള്ളി പറഞ്ഞു.


Like our page https://www.facebook.com/MalayalamDailyNews/ and get latest news update from USA, India and around the world. Stay updated with latest News in Malayalam, English and Hindi.

Print This Post Print This Post
To toggle between English & Malayalam Press CTRL+g

Leave a Reply

Your email address will not be published. Required fields are marked *

Read More

Scroll to top