തിരുവനന്തപുരം: പെരിയ കൊലക്കെസില്‍ അഭിഭാഷകരുടെ ഫീസ് ഇനത്തില്‍ സംസ്ഥാന സര്‍ക്കാര്‍ ചിലവിട്ടത് ഒരു കോടി രൂപയോളമെന്ന്. ഒരു സിറ്റിംഗിന് 25 ലക്ഷം രൂപ വരെ ഈടാക്കുന്ന അഭിഭാഷകരെ ഡല്‍ഹിയില്‍ നിന്നാണ് സംസ്ഥാന സർക്കാർ കൊണ്ടുവന്നത്.

രണ്ട് വാദികളുടെ കുടുംബങ്ങൾക്ക് വേണ്ടി ഹൈക്കോടതിയിൽ ഹാജരായ മുൻ ഡയറക്ടർ ജനറൽ പ്രോസിക്യൂഷൻ ടി. ആസിഫ് അലി ഫീസ് വാങ്ങാതെയാണ് കോടതിയില്‍ ഹാജരായത്. കേസ് സുപ്രീം കോടതിയിലെത്തിയപ്പോൾ ഹാജരായ മുൻ ഹൈക്കോടതി ജഡ്ജി വി ഗിരിയും ഫീസില്‍ ഇളവു നല്‍കി.

രാഷ്ട്രീയ താൽപര്യമാണ് ഈ കേസില്‍ സർക്കാർ പണമിറക്കി മുന്‍‌നിര അഭിഭാഷകരെ കൊണ്ടുവന്നത്. എന്നിട്ടും ഫലമുണ്ടായില്ല. ആദ്യം 25 ലക്ഷം നൽകി മുതിർന്ന സുപ്രീം കോടതി അഭിഭാഷകനായ രഞ്ജിത്ത് കുമാറിനെ കൊണ്ടു വന്നു. എന്നാൽ, വാദത്തിനിടെ ഹൈക്കോടതി നടത്തിയ പരാമർശങ്ങൾ തിരിച്ചടിയായതോടെ മുൻ അഡീഷണൽ സോളിസിറ്റർ ജനറൽ മനീന്ദർ സിംഗിനെ കൊണ്ടു വരികയായിരുന്നു. സിംഗ് ഇതുവരെ ഫീസായി വാങ്ങിയത് 63 ലക്ഷം രൂപയാണ്. ബിസിനസ് ക്ലാസ് വിമാനക്കൂലിയും താമസത്തിനുമായി മൂന്ന് ലക്ഷത്തോളം രൂപ സർക്കാർ വേറെ നൽകി. സുപ്രീംകോടതിയിൽ മനീന്ദർ സിംഗ് ഹാജരായതിന്റെ ഫീസ് ഇതുവരെ നൽകിയിട്ടില്ല. അത് കൂടിയാകുമ്പോൾ ആകെ ചെലവ് ഒന്നരക്കോടി കടക്കും.