തൃശൂർ: സർക്കാർ ഫണ്ടിൽ നിന്ന് 19 ലക്ഷം രൂപ തട്ടിയെടുത്തതിന് മുൻ ജില്ലാ വ്യവസായ വികസന ഉദ്യോഗസ്ഥയെ അറസ്റ്റ് ചെയ്തു. സി.പി.എമ്മിനു വേണ്ടി നിയമവിരുദ്ധമായി നിരവധി കൃത്രിമങ്ങള്‍ ചെയ്ത ഉദ്യോഗസ്ഥയായിരുന്നു അറസ്റ്റിലായ പത്തനംതിട്ട അടൂര്‍ ഏഴംകുളം പണിക്കശ്ശേരിയില്‍ ബിന്ദു എസ് നായര്‍ (47).

ജില്ലാ വ്യവസായ കേന്ദ്രത്തിൽ നിന്ന് പണം തട്ടിയെടുത്തതിന് ഇവരെ സസ്‌പെൻഡ് ചെയ്തിരുന്നു. എന്നാല്‍, സി.പി.എം മന്ത്രിമാർ ഇടപെട്ട് സസ്പെൻഷൻ പിന്‍‌വലിച്ചു. ജില്ലാ വ്യവസായ കേന്ദ്രത്തിന്റെ ലിക്വിഡേറ്ററായിരുന്നപ്പോൾ 19 ലക്ഷം രൂപ സ്വന്തം അക്കൗണ്ടിലേക്ക് മാറ്റി. അറസ്റ്റു ചെയ്ത ബിന്ദുവിനെ 14 ദിവസത്തേക്ക് കോടതി റിമാൻഡ് ചെയ്തു.

കോഫി ഹൗസുകളുടെ നിയന്ത്രണം പിടിച്ചെടുക്കാനുള്ള ശ്രമത്തിന്റെ ഭാഗമായാണ് ബിന്ദുവിനെ സിപിഎം അഡ്മിനിസ്ട്രേറ്ററായി നിയമിച്ചത്. പിന്നീട് തൃശൂര്‍ ടൗണ്‍ വനിതാ വ്യവസായ സഹകരണ സംഘം ലിക്വിഡേറ്ററായിരിക്കെ നടത്തിയ സാമ്പത്തിക ഇടപാടാണ് വിനയായത്. തൃശൂര്‍ ടൗണ്‍ വനിതാ വ്യവസായ സഹകരണ സംഘം ലിക്വിഡേറ്ററായിരിക്കെയാണ് സ്വന്തം അക്കൗണ്ടിലേക്കു 19 ലക്ഷം രൂപ മാറ്റിയെന്നാണു കേസ്.

തൃശൂര്‍ ടൗണ്‍ വനിതാ വ്യവസായ കേന്ദ്രത്തിന്റെ സ്ഥലം തൃശൂര്‍ കോര്‍പ്പറേഷന് വിറ്റ തുകയായ 22.8 ലക്ഷം രൂപ ലിക്വിഡേറ്ററുടെ പേരില്‍ തൃശൂര്‍ അയ്യന്തോണിലെ സ്‌റ്റേറ്റ് ബാങ്ക് ശാഖയില്‍ നിക്ഷേപിച്ചിരുന്നു. ഈ പണം പലപ്പോഴായി ബിന്ദുവിന്റെയും ഭര്‍ത്താവിന്റെയും അക്കൗണ്ടിലേക്ക് മാറ്റി. വകുപ്പ് തല അന്വേഷണത്തിലാണ് ഈ തിരിമറി നടത്തിയത്. തുടര്‍ന്ന് വ്യവസായ വാണിജ്യ ഡയറക്ടര്‍ നോട്ടീസ് നല്‍കി ബിന്ദുവിനെ സസ്‌പെന്റ് ചെയ്തു. പണം പോലും തിരിച്ചടയ്ക്കാതെ രാഷ്ട്രീയ സ്വാധീനം മൂലം ഇവര്‍ സര്‍വ്വീസില്‍ തിരിച്ചെത്തി. അറസ്റ്റ് ഒഴിവാക്കാന്‍ പരമാവധി ശ്രമിച്ചെങ്കിലും കോടതി ഇടപ്പെട്ടതോടെ ജയിലില്‍ പോകേണ്ടി വന്നു.

ഹൈക്കോടതി ജാമ്യം നിഷേധിച്ചതിനെ തുടര്‍ന്ന് ഇക്കഴിഞ്ഞ ഒക്ടോബര്‍ എട്ടിന് വെസ്റ്റ് പോലീസ് സ്‌റ്റേഷനില്‍ ഹാജരായെങ്കിലും സിപിഎം മന്ത്രിമാരുടെ സമ്മര്‍ദത്തെ തുടര്‍ന്ന് പോലീസ് വിട്ടയച്ചു. ജാമ്യം നിഷേധിക്കപ്പെട്ടതോടെയാണ് പോലീസ് അറസ്റ്റ് ചെയ്ത് ഇവരെ ജയിലിലേക്ക് അയച്ചത്.