ചാള്‍സ്റ്റണ്‍ (വെര്‍ജീനിയ): രണ്ട് ദിവസം മുമ്പ് മുഖത്ത് വെടിയേറ്റ് ചികിത്സയിലായിരുന്ന വെസ്റ്റ് വെര്‍ജീനിയ പോലീസ് ഓഫീസര്‍ കെയ്സി ജോണ്‍സണ്‍ (28) മരിച്ചതായി വ്യാഴാഴ്ച സിറ്റി ഓഫ് ചാള്‍സ്റ്റണ്‍ പുറത്തിറക്കിയ പത്രക്കുറിപ്പില്‍ അറിയിച്ചു.

വാഹനം പാര്‍ക്ക് ചെയ്തതിനെക്കുറിച്ച് ലഭിച്ച പരാതി അന്വേഷിക്കുന്നതിനിടയിലാണ് ജോഷ്വാ ഫിലിപ്പ് (38) ഓഫീസര്‍ കെയ്സിയുടെ മുഖത്തേക്ക് നിറയൊഴിച്ചത്. ഗുരുതരമായി പരിക്കേറ്റ കെയ്സിയെ ആശുപത്രിയില്‍ പ്രവേശിപ്പിച്ചിരിക്കുകയായിരുന്നു.

2017-ല്‍ സര്‍വീസില്‍ ചേര്‍ന്ന കെയ്സി 2019-ലാണ് പട്രോള്‍ ഓഫീസറായി ചാര്‍ജെടുത്തത്. മറ്റൊരാള്‍ക്ക് അനുവദിച്ചിട്ടുള്ള പാര്‍ക്കിംഗ് സ്ഥലത്ത് വാഹനം പാര്‍ക്ക് ചെയ്തതിനെക്കുറിച്ച് ലഭിച്ച പരാതി അന്വേഷിക്കുന്നതിനാണ് വനിതാ ഓഫീസര്‍ സ്ഥലത്തെത്തിയത്. ഓഫീസറും ജൊഷ്വാ ഫിലിപ്പും അതേക്കുറിച്ച് തര്‍ക്കിക്കുകയും, ഫിലിപ്പ് തന്റെ കൈവശമുണ്ടായിരുന്ന റിവോള്‍വര്‍ ഉപയോഗിച്ച് വെടിയുതിര്‍ക്കുകയുമായിരുന്നു എന്നു പറയുന്നു. കെയ്സിയും തിരിച്ച് വെടിവെച്ചു. വെടിയേറ്റ ഫിലിപ്പും ചികിത്സയിലാണ്.

2020 ജനുവരിയില്‍ ആയുധം കൈവശം വെച്ചതിന് ഫിലിപ്പ് അറസ്റ്റിലായിരുന്നു. സംഭവം നടക്കുമ്പോള്‍ ഇയാള്‍ ജാമ്യത്തിലായിരുന്നു. സിറ്റിയിലെ പൗരന്മാരുടെ സുരക്ഷയ്ക്ക് മുന്‍ഗണന നല്‍കിയിരുന്ന ധീരയും, സേവന സന്നദ്ധതയുമുള്ള ഓഫീസറെയാണ് കെയ്സിയുടെ മരണത്തിലൂടെ നഷ്ടമായതെന്ന് ചാള്‍സ്റ്റണ്‍ പോലീസ് ചീഫ് ടൈക്കി ഹണ്ട് പറഞ്ഞു.