വാഷിംഗ്ടണ്‍: പ്രസിഡന്റ് ഡൊണാൾഡ് ട്രംപിനെ സ്ഥാനത്തു നിന്ന് നീക്കുന്നതിനുള്ള 25-ാം ഭേദഗതി നടപ്പാക്കുന്നതിനെ എതിർക്കുന്നതായി യുഎസ് വൈസ് പ്രസിഡന്റ് മൈക്ക് പെൻസ് ചൊവ്വാഴ്ച സ്പീക്കർ നാൻസി പെലോസിക്ക് അയച്ച കത്തിൽ പറഞ്ഞു.

“രാഷ്ട്രപതിയുടെ കാലാവധിക്ക് എട്ട് ദിവസം മാത്രം ബാക്കി നിൽക്കെ, നിങ്ങളും ഡമോക്രാറ്റിക് കോക്കസും കോണ്‍ഗ്രസും ഞാന്‍ 25-ാം ഭേദഗതി നടപ്പാക്കണമെന്ന് ആവശ്യപ്പെടുന്നു. ഇത്തരമൊരു നടപടി നമ്മുടെ രാജ്യത്തിന്റെ ഏറ്റവും നല്ല താൽപ്പര്യത്തിനോ നമ്മുടെ ഭരണഘടനയ്ക്ക് അനുസൃതമോ ആണെന്ന് ഞാൻ വിശ്വസിക്കുന്നില്ല,” അദ്ദേഹം കത്തില്‍ സൂചിപ്പിച്ചു.

പ്രസിഡന്റ് ഡൊണാൾഡ് ട്രംപിന്റെ ഇംപീച്ച്‌മെന്റ് ബുധനാഴ്ച പരിഗണിക്കുമെന്ന് ഡെമോക്രാറ്റുകൾ പറയുന്ന സമയത്താണ് അദ്ദേഹത്തിന്റെ പ്രസ്താവന.

ട്രംപിനെ ചരിത്രത്തിൽ രണ്ടു തവണ ഇംപീച്ച് ചെയ്ത ആദ്യത്തെ പ്രസിഡന്റാക്കാനുള്ള ഡെമോക്രാറ്റുകളുടെ ആദ്യ പടിയാണിത്. ഏറ്റവും പുതിയ മാധ്യമ റിപ്പോർട്ടുകൾ പ്രകാരം, 25-ാം ഭേദഗതി പ്രക്രിയയ്ക്ക് തുടക്കമിടുന്നതിനും ട്രംപിനെതിരെ ഇംപീച്ച്‌മെന്റ് വോട്ടെടുപ്പ് നടത്തുന്നതിനും 210 ഹൗസ് അംഗങ്ങളെങ്കിലും അംഗീകാരം നല്‍കിയിട്ടുണ്ട്.

ഇപ്പോൾ ട്രംപിനെ മുൻ അനുയായികൾ ഒഴിവാക്കി, സോഷ്യൽ മീഡിയയിൽ നിന്ന് വിലക്കി, ജനുവരി 6 ന് കോൺഗ്രസിനെതിരെ ആക്രമണത്തിന് പ്രേരിപ്പിച്ചുവെന്നാരോപിച്ച് രണ്ടാമത്തെ ഇംപീച്ച്‌മെന്റ് നേരിടുന്നു.