ഹൈദരാബാദ്: തദ്ദേശീയമായി വികസിപ്പിച്ച കോവിഡ് -19 വാക്സിൻ – കോവാക്സിൻ – എന്തെങ്കിലും പാർശ്വഫലങ്ങൾ ഉണ്ടാക്കുന്നുവെങ്കിൽ, സ്വീകർത്താക്കൾക്ക് നഷ്ടപരിഹാരം നൽകുമെന്ന് നിർമാതാവ് ഭാരത് ബയോടെക് ശനിയാഴ്ച പറഞ്ഞു.

55 ലക്ഷം ഡോസ് കോവാക്സിൻ വിതരണം ചെയ്യുന്നതിനായി കേന്ദ്ര സർക്കാരിൽ നിന്ന് വാങ്ങൽ ഓർഡർ ലഭിച്ച ഭാരത് ബയോടെക്, സ്വീകർത്താക്കൾക്ക് എന്തെങ്കിലും പ്രതികൂല ഫലങ്ങൾ ഉണ്ടായാൽ കമ്പനി നഷ്ടപരിഹാരം നൽകുമെന്ന് ഉറപ്പ് നല്‍കിയിട്ടുണ്ട്. വാക്സിൻ മൂലമുണ്ടാകുന്ന പാർശ്വഫലങ്ങൾക്ക് നിർമ്മാതാക്കൾ മാത്രമായിരിക്കും ഉത്തരവാദികളെന്ന് കേന്ദ്ര സർക്കാർ നേരത്തെ പറഞ്ഞിരുന്നു.

“എന്തെങ്കിലും ഗുരുതരമായ പ്രതികൂല സംഭവങ്ങള്‍ ഉണ്ടായാൽ സർക്കാർ നിയുക്തവും അംഗീകൃതവുമായ കേന്ദ്രങ്ങളിൽ/ആശുപത്രികളിൽ നിങ്ങൾക്ക് വൈദ്യശാസ്ത്രപരമായി അംഗീകൃത പരിചരണം നൽകും. ഗുരുതരമായ പ്രതികൂല സംഭവങ്ങൾക്കുള്ള നഷ്ടപരിഹാരം എസ്‌ഇ‌ഇ വാക്‌സിനുമായി ബന്ധപ്പെട്ടതാണെന്ന് തെളിഞ്ഞാൽ അത് സ്പോൺസർ (ബി‌ബി‌എൽ) നൽകും,” വാക്‌സിൻ സ്വീകർത്താക്കൾ ഒപ്പിടുന്ന സമ്മതപത്രത്തിൽ ഭാരത് ബയോടെക് ഇക്കാര്യം വ്യക്തമായി സൂചിപ്പിച്ചിട്ടുണ്ട്.

സെറം ഇന്‍സ്‌റ്റിറ്റ്യൂട്ടിന്റെ കോവിഷീല്‍ഡ്, ഭാരത് ബയോടെക്കിന്റെ കോവാക്‌സിന്‍ എന്നീ വാക്‌സിനുകള്‍ക്കാണ് രാജ്യത്ത് അടിയന്തര ഉപയോഗത്തിന് അനുമതി നല്‍കിയിട്ടുള്ളത്. രാജ്യത്ത് 55 ലക്ഷം ഡോസ് കോവാക്‌സിനാണ് ഭാരത് ബയോടെക് വിതരണം ചെയ്‌തിട്ടുള്ളത്.

ഇന്ന് രാജ്യത്ത് വാക്സിനേഷൻ കുത്തിവെപ്പ് ഔദ്യോഗികമായി ആരംഭിച്ചു. ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന്റേയും നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയുടേയും സംയുക്ത സംരംഭമാണ് ഭാരത് ബയോടെക് ഉല്പാദിപ്പിക്കുന്ന ‘കോവാക്സിന്‍.’ കോവാക്‌സിന്‍റെ മൂന്നാംഘട്ട പരീക്ഷണം പൂർത്തിയായിട്ടില്ലെന്നും തങ്ങൾക്ക്​ കോവിഷീൽഡ്​ വാക്​സിൻ നൽകിയാൽ മതിയെന്ന ആവശ്യവുമായി ഡോക്​ടർമാർ അടക്കം രംഗത്ത് വന്നിരുന്നു.