കണ്ണൂര്‍: കഴിഞ്ഞ കുറച്ച് ദിവസങ്ങളായി തുടര്‍ച്ചയായ മഴയും ചുഴലിക്കാറ്റും മൂലം ദുരിതത്തിലായത് ജില്ലയിലെ പെരിങ്ങോം പ്രദേശത്തെ കര്‍ഷകരാണ്. മഴയും ചുഴലിക്കാറ്റും കാരണം നിരവധി കർഷകരുടെ വാഴത്തോട്ടങ്ങൾ നശിപ്പിക്കപ്പെട്ടു. എല്ലാത്തിനുമുപരി, ബാക്കിയുള്ളവ വിളവെടുത്തപ്പോള്‍ വാങ്ങാന്‍ ആളുമില്ല വില കുറയുകയും ചെയ്തു.

കാര്‍ഷിക വായ്‌പ എടുത്തും മറ്റുമാണ് മിക്കവരും കൃഷി ചെയ്‌തിരിക്കുന്നത്. വലിയ രീതിയിലുള്ള കൃഷിനാശം ഉണ്ടായതിന് പിന്നാലെ ശേഷിച്ച വിളകള്‍ വിളവെടുത്ത് വില്‍ക്കാനൊരുങ്ങുന്ന കര്‍ഷകര്‍ക്ക് പരമാവധി 20 രൂപ വരെയാണ് നല്‍കുന്നത്. ഇത് കൊണ്ട് കടക്കെണിയില്‍ കഴിയുന്ന കര്‍ഷകര്‍ക്ക് യാതൊരു വിധ പ്രയോജനവും ലഭിക്കുകയില്ല. കൂടാതെ വിള ഇന്‍ഷുറന്‍സ് പദ്ധതിയില്‍ ചേര്‍ന്നിട്ടുണ്ടെങ്കിലും അതില്‍ നിന്നും ഇതുവരെ യാതൊരുവിധ സഹായവും ഉണ്ടായിട്ടില്ലെന്നും കര്‍ഷകര്‍ വ്യക്‌തമാക്കുന്നുണ്ട്.

തങ്ങളുടെ പ്രശ്‌നങ്ങള്‍ ചൂണ്ടിക്കാട്ടി കര്‍ഷകര്‍ പഞ്ചായത്തുകളിലും, കൃഷിഭവനിലും സമീപിച്ചെങ്കിലും പ്രയോജനമൊന്നും ഉണ്ടായിട്ടില്ല. കൃഷിഭവനുകളുടെ കീഴില്‍ നടത്തുന്ന ഇക്കോ ഷോപ്പുകളിലും തനി നാടന്‍ ഉല്‍പന്നങ്ങള്‍ക്കു മുന്‍ഗണന ലഭിക്കുന്നില്ലെന്നാണ് കര്‍ഷകര്‍ വ്യക്‌തമാക്കുന്നത്. അന്യസംസ്‌ഥാനങ്ങളില്‍ നിന്നും ഇറക്കുമതി ചെയ്യുന്ന വാഴക്കുലകള്‍ വിപണിയില്‍ കുറഞ്ഞ വിലക്ക് വില്‍ക്കുന്നതോടെയാണ് നാട്ടില്‍ ജൈവകൃഷിയില്‍ ഉല്‍പാദിപ്പിച്ച വാഴക്കുലകള്‍ക്കും മറ്റും ആവശ്യക്കാരില്ലാതെ പോകുന്നതെന്ന് കര്‍ഷകര്‍ പറയുന്നു.