ഡാളസ്: ഡാളസില്‍ വീണ്ടും കോവിഡ് 19 സ്ഥിരീകരിച്ചവരുടെ എണ്ണത്തില്‍ റെക്കോര്‍ഡ്. ബുധനാഴ്ച 3500 പേര്‍ക്ക് കോവിഡ് സ്ഥിരീകരിച്ചു. മരണസംഖ്യയിലും റെക്കോര്‍ഡായിരുന്നു. 30 പേരാണ് കോവിഡ് ബാധിച്ചു മരിച്ചത്.

ഡാളസ് കൗണ്ടിയില്‍ മാത്രം ഇതുവരെ രോഗം സ്ഥിരീകരിച്ചവരുടെ എണ്ണം 212188 ആയി. നോര്‍ത്ത് ടെക്‌സസിലെ മറ്റു പ്രധാന കൗണ്ടികളിലെ രോഗികളുടെ എണ്ണം ടറന്റ് കൗണ്ടി (199521), കോളിന്‍ കൗണ്ടി (56499), ഡന്റന്‍ കൗണ്ടി (48196).

ഇതോടെ നാലു പ്രധാന കൗണ്ടികളില്‍ ആകെ മരിച്ചവരുടെ എണ്ണം 4599 ആയി ഉയര്‍ന്നു. ടെക്‌സസ് സംസ്ഥാനത്ത് 2.1 മില്യന്‍ പേര്‍ക്ക് കോവിഡ് സ്ഥിരീകരിച്ചപ്പോള്‍ 1.7 മില്യന്‍ പേര്‍ കോവിഡിനെ അതിജീവിച്ചു. 33000 മരണമാണ് ടെക്‌സസില്‍ ഇതുവരെ റിപ്പോര്‍ട്ട് ചെയ്യപ്പെട്ടിട്ടുള്ളത്.

ഡാളസ് ഫെയര്‍ പാര്‍ക്കില്‍ ബുധനാഴ്ച 14850 ഡോസ് കോവിഡ് വാക്‌സീന്‍ നല്‍കി. ഈയാഴ്ച 3000 ഡോസുകള്‍ കൂടെ നല്‍കുമെന്ന് ആരോഗ്യവകുപ്പ് അധികൃതര്‍ അറിയിച്ചു. ലാറ്റിനോ, ബ്ലാക്ക് വിഭാഗത്തില്‍പെട്ടവര്‍ക്കാണ് മുന്‍ഗണന നല്‍കുകയെന്നും അധികൃതര്‍ അറിയിച്ചു.